Na taofia e leoleo i le faaiuga o le vaiaso na te’a nei se aiga e to’afa mai Pava’ia’i, ona o se mataupu e mafua mai i se fanua i Faleniu, ina ua o latou o atu i le fale o le aiga na aafia ma faia i ai ni uiga tau faamata’u e aofia ai ma le faaoolima i se fafine o le aiga, e pei ona taua i faamaumauga a le faamasinoga.

O i latou ua molia, ua aofia ai Lufilufi Peneueta, o lona toalua o Perekina Peneueta, o lana tama o Jeffrey Fuamatu ma lona tuagane o Mikaele Tauasosi.

Ua teena uma e i latou nei e toafa moliaga o le save’uina lea o le nonofo filemu o tagata lautele, atoa ai ma le faaoolima i le tulaga tolu, ina ua latou tutulai i luma o le faamasinoga i le taeao o le Aso Gafua na te’a nei ma ua poloaina i latou e le alii faamasino ia John Ward II ina ia aua nei o latou toe faatupuina se vevesi i le nofoaga na tulai mai ai lenei faalavelave, pe toe taumafai foi e faafesootai le aiga o lo o aafia i soo se auala.

Ua faasa ona o latou toe tutu i le fanua poo le fale o le aiga, a ia avea i latou o ni tagatanuu lelei e tausi i tulafono a le malo i soo se taimi.

I faamaumauga a le faamasinoga o lo o taua ai e faapea, o le vevesi na afua mai ina ua o Lufilufi ma lona aiga e ave se tusi i le aiga na aafia e faailoa i ai, ua tatau ona o latou o ese ma le fanua, peitai e fetaui lava le taunuu atu o lo o faia se fefaatauaiga o oloa (yard sale) a le aiga na aafia i luma o le latou fale.

Fai mai le malo, o le gaioiga muamua lava na faia e le alii o Mikaele na momoli atu ai se feau i tagata o le aiga, e i ai le faalavelave o le a tulai mai, ina ua alu atu Mikaele ma se oti uaea (bolt cutter) ma taumafai e ulufale faamalosi i totonu o le faitotoa o le fale, peitai sa le mafai ona alu i totonu ona o lo o tutu mai ai le tina na aafia, o le olomatua matua o le aiga ma lana tama teine, i le faitotoa o le fale.

Na valaau le aiga i le ofisa o leoleo mo se fesoasoani, ma faailoa ai e le tina matua na aafia, sa faaoolima Lufilufi ma lona tuagane ia te ia.

Na faamatala e le tina na aafia e faapea, a’o la taumafai ma lana tama e taofi le ulufale faamalosi atu o Lufilufi ma lona tuagane i totonu o le fale, na tago mai Lufilufi ua uu lona tuaua ae una’i ese o ia ma le faitoto’a.

Sa taua foi le faaaoga e le alii o Jeffrey o se ‘pepper spray’ e faga solo i tagata sa o atu e faatau i le ‘yard sale’ a le aiga sa fai.

O lo o taua foi i faamaumauga a le faamasinoga e faapea, sa tago le toalua o Lufilufi i lana tootoo lea e faaaoga e savali ai, ma tau sasau atu i le olomatua na aafia i se auala tau faamata’u.

Ua toe tolopo lenei mataupu ae ua taoto atu nei i le loia a le malo mo le faaauauina o suesuega a leoleo, ma vaavaai pe ono i ai ni moliaga e ono faila faasaga ia i latou ua molia.