Ads by Google Ads by Google

Taofi si’i Falema’i pe afai e totogi malo se vaega o lana aitalafu

“Afai e mafai e le malo ona totogi mai se vaega tupe o lana aitalafu mo ni masina se tolu, o le a taofi si’i a le falema’i, ae a le mafai e faataunuu pea lava si’i ua fuafuaina.”

O lea saunoaga mai le afioga ia Moananu Va na tuuina atu i luma o le komiti, ina ua fesiligia o ia e le alii faipule ia Maneafaiga Faoa, i se auala e mafai e le malo ma le Fono ona uia e fesoasoani ai i le Falema’i ma taofia ai siitaga ua fuafuaina.

Saunoa Moananu, e tatau foi ona fuafua tatau si’itaga a le falemai ina ia gafatia e le atunuu. Mo se faataitaiga na ia taua ai, afai e mama’i faatasi o ia, o lona toalua ma lona atalii i le aso e tasi, o fea o le a aumai ai e lona aiga le $150 e totogi mo le vaaiga o le foma’i?

E tusa ai ma se tusi na tu’uina atu e le pulega a le Falema’i i le Fono Faitulafono, o lo o taua ai le silia i le $5 miliona o le tupe e lei totogia atu e le malo, mai tupe ua maea ona faatulafono e fesoasoani ai i galuega ma le faatautaiga a le falemai.

Na taua e le Pulesili a le falemai o Michael Gerstenberger i luma o le komiti, e na o le 37% o tupe ua faatulafono ua maea ona totogi atu e le malo, ae o le isi 63% e lei totogiina atu. Ona o lea faaletonu, ua taofia ai nisi o vaega tupe fesoasoani sa masani ona maua mai e le falemai mai le feterale, tauala mai i le polokalame a le Medicaid.

O le iloiloga a le komiti a le maota o sui ma le pulega a le falemai lea na faia i le vaiaso nei, na valaauina e le taitaifono o le komiti, afioga Puleleiite Liamatua Tufele, i le maea ai lea ona faalauiloa e le falemai o ana siitaga i totogi o ana tautua, lea ua faamoemoe e amata faamamalu i le po o le kerisimasi o loo lumanai nei.

O ia siitaga e aofia ai le sii o le tupe e vaai ai le fomai i soo se talavai, mai le $10 o loo i ai nei i le $50, sii le potu fanau i le $200, potu taofia e $100 i le po, fualaau o le a $40, ma le fale faamama toto o le a sii atu i le $250.

Na faaalia e afioga i alii faipule le tulaga pagatia o le a i ai le atunuu ona o siitaga ua fuafua e le falemai.

Na taua e Larry Sanitoa,  o siitaga a le falemai, o se avega o le a faaopoopo atu i le vaega o loo amo e le atunuu i le taimi nei, i le maualuga o le tau o le soifuaga, faatasi ai ma le maualuga o le pasene o tagata e leai ni galuega, lea ua oo atu nei i le 25%.

“O lo’u itumalo e pito i toatele tagata o loo nonofo ai, ma o le toatele o aiga o le a safa ma pagatia ona o sii a le falemai lea ua faalauiloa mai, aua e toatele e leai ni galuega, e vaivai fo’i le tamaoaiga o isi aiga,” o le saunoaga lea a Sanitoa.

Saunoa le alii faipule ia Vaamua Henry Sesepasara, ua mafua lenei faafitauli ona o le faatamala o le malo e totogi tupe ua uma ona faatulafono mo le falemai.

Na fesili Vaamua ia Gerstenberger pe o i ai se fuafuaga a le malo e toe totogi uma atu le tupe lea o loo aitalafu ai, na tali Gerstenberger, sa latou faailoa i le alii kovana i se latou fonotaga e lei mamao atu le tulaga e uiga i le aitalafu a le malo, ae o le tali a le alii kovana, o loo feagai le malo ma tulaga faaletonu i ana tupe maua.

Na faailoa e Togiola Tulafono i lana polokalame i le aso Toonai i ona tua atu, ua maea ona ia faatonuina le Teutupe a le malo e totogi tului mo tagata faigaluega a le malo, ina ua ia maitauina le tulaga lelei o tupe ao a le malo i lenei taimi.

Na faamaonia foi e Gerstenberger i luma o le komiti, le tele o le avanoa e mafai ai ona taofi siitaga a le falemai ua fuafuaina, pe afai e totogi atu e le malo le 63% o lana aitalafu o loo i ai.

Ae na taua e le alii faipule ia Tapumaia Galu Satele Jr, o lona popolega i siitaga a le falemai, o le a toatele tagata e nonofo lava i o latou aiga ma tausi ai o latou gasegase, ona o le a latou le gafatia le taugata o pili, ma o lea faaiuga mai tagata lima vaivai e ono oo atu ai i se tulaga pagatia le gasegase ma i’u ina maliu ai se tasi.

Saunoa Tapumanaia, o se tasi o faafitauli e ono tulai mai ai siitaga a le falemai lea ua fuafuaina nei, o le faaitiitia lea o tupe e maua mai ai, aua o le a toatele tagata e filifili e le o i le falemai, ae nonofo lava i o latou aiga ma saili fofo Samoa, pe agai foi i Apia e talavai ai.

O nisi o faipule sa latou fautuaina le pulega a le  falemai ina ia toe silasila i a latou siitaga lea ua fuafua, pe o talafeagai ma le taimi o loo i ai le tamaoaiga o le atunuu o loo i ai, faapea ai ma le agai atu o aiga uma i le faaiuga o lenei tausaga.

O faipule na auai i lenei iloiloga e aofia ai le Puleleiite, Faoa, Vailiuama Steve Leasiolagi, Tapumanaia, Talia Faafetai Iaulualo, Toeaina Faufano Autele, Taotasi Archie Soliai, Sanitoa ma Vaamua.