Taofi se fa’aiuga a Senatoa pili tupe na pasia Faipule

I le tapunia ai o le Fono Fa’apitoa sa valaauina e le ali’i kovana i le aso Gafua na te’a nei mo le umi e 5 aso, e foliga mai e le o mataupu uma o le Fono Faapitoa sa valaauina na pasia e le Fono, ina ua faia le fa’aiuga a le Senate e taoto pea i le Komiti o le Paketi le pili tupe na pasia e le maota o sui i le vaiaso na te’a nei.

 

I le aso mulimuli o le Fono Faapitoa, o le aso foi lea na faitau muamua ai i luma o le senate le pili tupe e $625,000 na pasia e le maota o sui i le aso Faraile na te’anei, na tula’i ai le afioga i le alii senatoa ia Laolagi Fonoti Savali Vaeao ma saunoa e faapea, “talu ai e le i mautu sa tatou faaiuga e uiga i le pili tupe lenei $625,000 a le alii kovana, ua ou talosaga atu ai i le mamalu o le tatou maota, e tuu maia le pili se’i ma momoe i lenei taimi, sei maea gaioiga o lo o tatou taumafai i ai ona toe fai lea i ai o se faaiuga.”

 

O le uiga o le saunoaga a Laolagi i luma o le maota, o le taoto i le laulau a le komiti o le Paketi a le maota maualuga le pili, se’i mautu gaioiga e pei ona fuafua i ai le maota, mo le tuuina atu o le mataupu i luma o le Fa’amasinoga, e fa’amanino mai ai le tulaga sa’o e tatau ona taoto ai le gagana o le tulafono e fa’atatau i le malosi i le ‘veto override’ o lo o umia e le alii kovana.

 

Na faafetaia e le peresetene o le senate ia Gaoteote Palaie Tofau le faaiuga a Laolagi, ina ia taoto pea i le komiti le pili se’i mae’a galuega o lo o taumafai atu i ai le maota.

 

O le agaga o le maota o sui na latou pasia ai le pili tupe a le kovana faatasi ai ma suiga, e le gata ia faigofie ai i le maota maualuga ona latou pasia lenei pili taua, ae ia mafai ai fo’i ona tuuina atu lea vaega tupe e faatupe ai le faaleleia o auala i le itu i Sasa’e o le motu o Tutuila.

 

O suiga a le maota o sui e pei ona latou pasia i le pili tupe a le kovana, e ave le $300,000 e faaopoopo i le paketi a le fono, ae ave le $325,000 e faatupe ai galuega mo le fa’aleleia o auala i le itu i Sasa’e.

 

O mataupu na pasia e le fono  e aofia ai le tofia o le alii loia ia Fiti Sunia e avea ma Sui Fa’amasino o le Fa’amasinoga a Amerika Samoa, o le pili tupe e faasoasoa atu ai le $200,000 e faatupe ai le polokalame a fanau aoga mo le tau mafanafana, faapea ai ma se vaega o totino o le komiti o le litaea sa tofia e le kovana.

 

Na tau fai faafetaia e taitai fono o maota e lua afioga i senatoa ma faipule, e tusa ai o lo latou tali atu i le fono faapitoa sa valaauina e le alii kovana, mo le faamaonia o ni isi o mataupu aua le faaleleia o le auaunaga a le faigamalo mo le atunuu

Comment Here