Ads by Google Ads by Google

Taofi Sailiga Tamaloa Leiloa i le Sami

Ua fa’ailoa mai ua taofia nei le sailiga tele sa faia mo le tamaloa Solomona ua lipotia sa taumafai e toe fo’i i lona aiga, ina ua mae’a se latou fiafia na faia i le nu’u o Nukumaroro i Choiseul Province, i le atu Solomona.

Ua atoa lelei le fitu aso o faia lenei sailiga, ae peita’i, e na’o le va’a o lenei tamaloa, o lo’o i ai i luga nisi o ana meatotino, na tafea atu i le matafaga o le nu’u o Kilokaka i le Isabel Province, lea e tuaoi ma Choiseul Province.

 Mai le sailiga atoa lenei, ua mae’a sailia le tusa ma le 700 kilomita le mamao o le vasa o le atu Solomona lava, ma e ono lelei va’a sa fa’atautaia ai lea sailiga, ma le tasi o le va’alele a le RAMSI, po’o le va’alele fesoasoani mai Niu Sila mo Solomona.

Na amata leiloa mai lenei ali’i o Solo Ngatonga i le aso Gafua o lenei lava vaiaso, ae na faailoa mai e i latou na mulimuli va’aia o ia ma mafuta fo’i i ai Solo a’o le’i folau ese mai lea motu o Nukumaroro, “Sa faia le latou fiafia ma Solo, ma ua fai mai lava e toe fo’i i lea lava aso mo Hay Cook Island” i lona va’a. Peita’i, o le toe taimi lava lea na va’aia ai o ia o ola pea.

Ua fa’aalia e le ali’i  Fa’atonu o leoleo o lo’o fa’atautaia le sa’iliga i luga o le sami, Edward Tokuru, “I le taimi nei ua fa’alauiloa ua leiloa le ali’i o Solo Ngatonga i le sami ma ua i ai masalosaloga ua malemo i ia ina ua mae’a tu’ua e ia lona va’a e fa’atafea lea na maua i le matafaga o Kilokaka i le motu o Isabel.”

“O lo’o i ai masalosaloga, sa taumafai o ia e a’au aga’i atu i lea motu, ona ua uma le kesi o lona va’a, aua ua iloga mai, e le o i ai le tane kesi o le va’a lea e soso’o i le afi o le va’a, ma ua misia fo’i lona tino ma ona lavalava, ae o ona se’evae ma lona ofuvae ma le fusipa’u o lo’o i ai pea i totonu o le va’a ua maua.”

Ua fa’aalia e Edward, ua fa’ataunu’u lava le sailiga o lenei ali’i e ui ina o lo’o tatalia e ia le fa’atagaga mai lana tupe fa’asoa mo le tausaga atoa.

saunia: Leua Aiono Frost