Ads by Google Ads by Google

Taofi Militia Libya - Latou Malaeva’alele Fa’avaomalo

O le militia a le malo o Libya ua latou taofia feoa’iga i va’alele e fa’aaoga ai le latou malae va’alele fa’avaomalo i le latou taulaga o Tripoli, se’ia vagana ua latou tatala maia se tasi o latou ta’ita’i sa le mailoa po’o fea o saisaitia ai talu mai le aso Sa o le vaiaso ua te’a.

Peita’i, a’o taumafai pea ona feutaga’i se maliliega e toe tatala ai le malae va’alele e le Militia lea, ae ua ofo mai le isi au leoleo po ma se isi fo’i vaega militia a le Malo o Libya o le a latou sofa’ia le malaeva’alele ma ave’esea fa’amalosi le au militia fia malolosi lea ua latou faia lea taofi fa’alemafaufau i le malae va’alele o le malo.

Ua fa’ailoa mai, o le ulua’i osofa’iga a le militia lea ua latou fa’asaina le malaeva’alele, na latou sofa’ia lava malaeva’alele taofia uma ma le sese’e pe toe lele ese atu o se va’alele mai lea malae fa’avaomalo i Tripoli. O le militia lea ua fa’aigoaina  o le “al-Awfia.”

Ua fa’ailoa mai, i le taimi ua sofa’ia ai le auleoleo po ma le militia a le Malo o Libya le vaega leaga lea, na vave lava e le’i i ai se umi o taugafana ae le toe fa’alogoina se papa o ni fana.

Ua fa’ailoa mai e le tusitala a le BBC Rana Jawad, e na te le o mailoa pe o le mea na tafana ni tagata o e na latou taofia le malaeva’alele, pe na tafana i le ea a latou pulufana ia na fa’alogoina e le to’atele le papa mai.

E tusa ma le 20+ totino o le Militia al Awfia lea na latou taofia feoa’iga o va’alele pe toe sese’e atu fo’i se va’alele i lea malae va’alele mo se umi e tusa ma le 3 i le 4 itula. Na molimauina e le to’atele o sui fa’asalalau mai nusipepa ma televise, le o’o ane o le tele o ta’avale ua tutumu i fitafita o le militia ma leoleo po, ua paka atu ma latou sofa’ia loa nofoaga o lo’o fa’amautu i ai gaoioiga a le Militia al Awfia.

Ua iloga mai ua mumusu pea lava al Awfia e tu’ua le malaeva’alele, ae ua latou fai mai, e fia taua’aoina atu muamua lava le latou ta’ita’i o lo’o saisaitia. E le o faigofie la le tulaga o i ai le taofiga fa’amalosi o le malae va’alele, e tau fai malolosi uma fo’i mau a itu na lua o lea finauga, peita’i, ina ua fa’atonuina e tu’ua e le vaega o tusitala le nofoaga sa fa’amautu i ai i le malae va’alele, sa va’aia le o atu i totonu o le malaeva’alele le tusa ma le 30 ta’avale o lo’o mae’a fa’a’au’upegaina.

Ua fa’ailoa mai e se tasi o ta’ita’i o le Tripoli Brigade, “O lea ua matou o i totonu e ave’esea le Militia al Awfia mai le malaeva’alele, ona ua va’ai atu e leai se aoga e tau feutaga’i ai i ni ala o talanoaga lea mataupu.”

E ui ina tele na’ua fetaua’iga na fa’alogoina le papa, ae le o mautinoa lava po’o tafana sa’o aga’i i tagata o le isi Militia pe leai. Ua fa’ailoa mai e le o mailoa pe o le mea na ‘avea fa’amalosi le ta’ita’i o al Awfia lea o lo’o sailia, pe o le mea o lo’o faia ni ona su’esu’ega e le malo.

Ua fa’ailoa mai i va’alele uma o lo’o tutu i le malaeva’alele, ua mae’a fa’amauina i ai pomu  e le vaega tete’e, ma ua fa’atutu uma lava nei va’alele i luga o le malae sese’e i ai va’alele. Ua tumu le malae va’alele i va’alele ua mae’a fa’apomu uma e le militia lea, ma e o’o lava i le pakaga a le malaeva’alele ua fa’atutu ai.

saunia: Leua Aiono Frost