Taofi le Sauaga o Tina - Totonu o Aiga

Soaluapule le ASADSV ma Sosaiete Eseese Mai Fafo

 

E ui ina umi o tauasa mai e le ASADSV le fita o le vaofilifili o taumafaiga ia maua se laugatasia o finagalo ma alo fa’atasi ai le sa i luma o taumafaiga ia mautu se sosaiete e fa’auia mai ai tima’iga ma taumafaiga so’otau’au i tina mafatia i sauaga, ae o lea ua o’o mai lena taeao pupula ma le matagofie tele!

 

O le fonotaga i lenei tausaga, ua fa’atupea lea e le Matagaluega o Criminal Justice ma ua vala’auina fo’i le tele o sosaiete ma matagaluega mai isi teritori o Amerika e aofia ai Puerto Rico, Guam, CBMI ma Saipan ae maise o setete e pei o Oakland, Kalefonia ma Minnesota.

 

O lenei taumafaiga alo fa’atasi, ua matua sapaia lava e le US Justice Department, ma ua auai mai fo’i so latou sui i le fonotaga lea. O lo’o ua i ai fo’i le sao o le tatou matagaluega i lona fa’atonu Keith Gebauer ma lona sui e va’ai toto’a i polokalama e fa’atupe e le Matagaluega Criminal Justice, Leonard Seumanutafa.

 

 “E aoga tele lo outou fa’asoa mai, aua ua umi ona outou fa’atautaia nei ituaiga o ofisa fesoasoani mo tina i latou mafatiaga i a latou mafutaga i totonu o aiga, ma e aoga le fefa’asoa’i e aga’i ai i luma le tatou taumafaiga fa’atasi.” O se tima’i lea a Gebauer i lana tautalaga.

 

Sa i ai le sui o le Ofisa o le Loia Sili, Mitzie Folau, e fa’ailoa fo’i le anoanoa’i o fa’amasinoga e fa’aulu mai, e afua lava i sauaga i totonu o aiga. Ona ua mafai ona tutu mai Tina ma fa’ailoa mai nei afaina, ua le natia i fatu a lavai fa’afitauli, ae ua taga’i toto’a i ai le malo i ona itu uma e ono fesoasoani fa’afo’ia nei fa’afitauli i totonu o aiga.

 

O le matagaluega fo’i o Alamanuia o Tagata Lautele o le Malo, sa auai mai o latou sui e fa’ailoa, e moni olo’o i ai lea fa’afitauli i Amerika Samoa, ma ua tatau lava ona fa’afo’ia, ma ia fesoasoani i Tina e toe fa’aleleia o latou a’afiaga.

 

O le fonotaga lenei sa tatalaina i le aso Lua, ae fa’aauau pea se’ia o’o i le aso Tofi ma mae’a ai. O lo’o talanoaina ma fefa’asoa’i sui usufono i ala e fa’afo’ia ai le tulaga tau le tupe na toina mai mo le polokalama, fa’atasi ai ma ala e tatau ona fa’atautaia ai le tautuaina o tina ua fa’amaonia sa sauaina.

 

O le ta’ita’ifono o lea fonotaga o le tama’ita’i o Condencia Brade, fa’atonu o lana polokalama SCESA e va’ai toto’a fo’i i afaina o lo’o feagai ai ma tina i totonu o lona fo’i malo.

 

I le tautalaga fa’apitoa a le faletua o le Kovana Sili, sa ia fa’ailoa ai “O lenei le auaunaga e vavalalata i lo’u fatu, sa ou galue ai mo se taimi umi e tusa ma le 25 tausaga talu ai, peita’i, ua faafetaia le galulue ma le onosa’i o uso a tina ua au mai ai le auaunaga i lenei vaitau, ma ua suia fo’i sosia e fa’atino ai le auaunaga mo uso ua mafatia i sauaga i totonu o aiga.”

 

“Afai e fa’atino le alofa le alofa o le Malo i tina mafatia, ia tatau ona o’o le tautua i tina uma o sauaina fa’atasi ai ma fanau, ia le va lo tatou naunau e fa’atino galuega ia toe fa’afo’i le fiafia ma le alofa i loto o tina o mafatia!”

 

E o’o i le fa’auluuluga o le Matagaluega o Tautua mo Tagata Lautele i le vaega o Tina ma Fanauiti, sa auai mo lana fo’i folasaga i so latou matau atu i le fa’afitauli sa fa’atupula’ia, ae ua mae’a fa’asalaina i latou ua faia nei sauaga, ma ua tautuaina tina ma fanau, o le tele o fautuaga ma fa’atalanoaga ma i latou i totonu o aiga, ua soloia nisi o fa’afitauli matuia sa iloga i totonu o le atunu’u ma sa fa’auia ai le vasega o Fa’amasinoga.

 

“O lenei mataupu, e le o se fa’afitauli na’o Amerika Samoa, ae o se fa’afitauli o lo’o ua fa’atupula’ia i malo o le Kelope atoa! Ua laugatasia i tatou uma, ma ua mafua ai ona tatou vala’au fa’aaloalo i uso a tuaoi, o setete mamao fo’i o lo’o fa’ata’ita’i i ai a tatou polokalama fa’atautaia mo se vaifofo o nei fa’afitauli, ina ia fa’asoa mai lo latou sosia ma puna’oa fo’i, ina ia tatou fa’alanu fa’atasi ai!” O se tautalaga lea a le ali’i fa’atonu sili Keith Gebauer o le Criminal Justice.

 

I le i’uga o lenei vaiaso o fa’amanuiaga sasa’a mai fafo i ala e fa’atino ai le auaunaga, fautuaga ma ala e fa’atupe ai, o le a mafai ona e le ASADSV ona tautuaina o tatou tina sauaina i totonu o aiga.

 

 

Comment Here