O le manatu o le auuso e to’alua, e leai se mea ono tupu mai i le la’ua eliga oneone sa faia i se nofoaga sa i ai le tano peita’i, ina ua loloto lea eliga oneone, sa pa’u mai le tano ma tanumia ai le tasi o i la’ua, lona uso la’ititi e na’o le 11 tausaga le matua.

O Nicholas Nelson ma Kyle e fiafia e elia le oneone i autafa o lo latou fale i Saranac Michigan, e tusa ma le 25 maila mai le Grand Rapids, i le afiafi o le aso Sa, ae o le taimi a’o i ai Nicholas i lalo o le la’ua pu na elia i le oneone, ae pa’u loa le tasi vaega o le tano, ma ua tanumia ai o ia.

Ua taumafai Kyle e eli i ona lima le oneone e ‘ave’ese ae ua ia iloa e le taitai ona vave e pei ona mana’omia ona fa’asaoaina ai Nicholas, o lea sa ia vala’aua ai le 911 ma fa’ailoa i ai le mea ua tupu i lona uso e 11 tausaga.

“Ua ou iloa e tusa lava pe taumafai ma’ua uma ma lo’u tina e eli ese le oneone, e le taitai ona vave lea e tusa ai ma le taimi e tatau ai ona aumaia i luga lo’u uso!” O se fa’amatalaga lea a Kyle ua faia i le 911 ina ua vili i ai e fia maua le fesoasoani.

Ua matua le to’a lava le mafaufau o Kyle, ona ua le mautinoa lelei po’o gafea tonu o le la’ua pu na elia o tanumia ai lona uso, aua ua pa’u atu nei le fale o le tano ma ua le mautinoa tonu le nofoaga tolu o i ai si ona uso laititi.

I le nofoaga sa maua atu i ai Nicholas ina ua solo atu le fale o le tano, o lo’o nofo lava o ia, ma ua ia fa’amatala ina ua malamalama, “sa i lo’u mafaufau, e ao ina ou faia sa’u fa’atofa i lo’u uso ma lo’u tina.”

Ina ua maua atu o ia, sa i ai nai avanoa sa i ai le ea, ma o nai ea na ua fa’asaoina lona ola, ma nai avanoa na e le’i fa’atumuina e le oneone, ua mafai ai ona toe fa’aolaina mai o ia nai lo le tanumia a’ia’i ma maliu ai.

I se fa’amatalaga a Nicholas, sa ia fa’apea ai, “Ona o si tama’i avanoa sa i ai i o’u autafa, o se avanoa lea sa mafai ai pea ona ou manava, ma sa o’u le toe maua se ea ma ou le toe iloa ai se mea, o se mea na ou fefe ai, ae fa’afetai lava ua ou toe ola mai.”

Na muamua lava maua le lima o le ali’i o Nicholas e tagata fuimu sa vala’auina mo le fesoasoani. E aumaia o ia i fafo, e le o toe manava o ia, peita’i, ina ua mae’a ona faia le fa’amanava e masani ai foma’i, sa toe fa’asaoina mai ai le ola o lenei ali’i talavou.

Na fa’avave atu Nicholasi i le falema’i mo ni togafitiga, ma fa’amoe ai se’ia o’o i le aso na soso’o ai, e tau fuafua ai, pe mata e i ai nisi fa’aletonu e toe alia’i mai lona ola, peita’i, na toe fa’afo’i o ia i lona aiga i le aso Gafua, ua malosi lelei lava.

O sana tala mai sa ia fa’apea ai, “O lo’o i ai se tagata i lalo o lo’o ia alofagia a’u ma aumaia lea avanoa i autafa o o’u foliga, sa ou maua ai le manava ola, aua o lea lava tama’i avanoa, sa umi ai ona ou ola pea ma mafaufau ai sa’u fa’atofa, ma ua o’o ina ou toe ola ai.”

saunia: Leua Aiono Frost