Ua mae’a fa’atautaia se fonotaga fa’ai’u a le vasega e to’a 22 tamaiti a’oga i le Iunivesite o le Pasefika i Saute i Alafua Samoa, o nisi na malaga i Iapani mo le fa’amoemoe e amatalia ai se latou so’o ma tamaiti a’oga fo’i a lea Malo.

O le pasese, nofoaga e alaalata’i ai, ma totogi o feuiuia’iga uma i totonu o Iapani a lenei ‘aumalaga fa’atasi ai ma le latou fa’atonu fa’apitoa, na totogia uma e Iapani. Ua le na’o tamaiti a’oga USP a Samoa Tuto’atasi na maua lea fa’amanuiaga, ae sa i ai le aumalga o fanau a’oga mai Fiti, Tonga ma le Atu Malesala sa auai potopoto i lea fa’amoemoe i Kizuna. Iapani i le fa’ai’uga o le tausaga ua te’a, 2012.

E ui ina ua umi o tatalia lenei toe fa’alauiloaga aloa’ia o mea uma na faia i lea malaga i Kizuna, ae ua fa’ailoa mai, “Ona sa po’ia le atunu’u i le afa mata’utia i le fa’aiuga o le tausaga ua te’a, ua matele ina fa’aleagaina ai feso’ota’iga tai initeneti ma isi so’otaga fa’ale-vaomalo, o lea ua fa’atuai ai lea fa’alauiloaga, ae peita’i, ua fa’afetaia, ua fa’ataunu’uina nei, a’o loma le isi malaga fa’apenei fo’i, a nisi tamaiti fou, i le masina fou, i le tu’uaga fo’i o a’oga.” O se tala mai lea a le tama’ita’i fa’atonu o le aumalaga, Selepa Tipama’a.

I le polokalama fa’asolo sa fa’atino ai ni molimau patino a le fanau na filifili e malaga e to’atolu, avea ai i latou ma sui iloga o le to’a 22 o i latou na masi’i. O le susuga Polito sa avea ma sui e saunia le tautalaga fa’asamoa, Miss Fatu sa saunia le lipoti mae’ae’a i le gagana peretania ma le tama’ita’i o Edwina Atonio sa saunia le lipoti i le gagana Iapani.

O Ruben Matafeo sa ia saunia le polokalama i le masini viliata, ma o ia lea sa fa’amatalaina nofoaga uma sa mafai ona asia e i latou. O lea lipoti mae’ae’a sa fa’ailo ai mafuaga e tolu sa mafai ai e Iapani ona totogia nei aumalaga o talavou a’oa’oina mai atunu’u o le pasefika, e asia o latou laufanua.

- Ia auina mai i fafo tala sa’o i tulaga o le olaga o tagata Iapani, le tulaga o i ai le tamaoaiga ma ana oloa fa’atau mai i atunu’u i fafo, ma le lipoti o aotelega o ni mea ua latou va’aia o se’ei ai le soifuaga o tagata Iapani talu mai ona mae’a ona sofa’i e mafui’e ma galulolo tetele.

- Ia fa’ailoa mai i o latou malo, le lava o tapenaga a Iapani ina ia fesoasoani ai i malo tau atina’e lo latou tamaoaiga ma ia mautu tomai fa’atekonolosi i na lava fo’i malo.

- Ia aumaia fo’i i o latou malo se tala e tusa o taumafaiga a Iapani ina ia so’ofa’atasi mai ma atunu’u uma o le lalolagi e ala i le tausia o le va lelei i mataupu tau faigamalo ma feso’ota’iga tau oloa fa’atau atu i fafo.

O nofoaga sa asia e aofia ai le falegaosi eletise o Iapani lea na matua papa ona tane o lo’o i ai vaila’au o’ona ma sa masalomia ai le fa’aleagaina o le tele o latou oloa fa’atau mai i isi malo uma o le lalolagi. Na asia fo’i e i latou le fale va’ai tau o lea malo, ma ua va’aia e le fanau a’oga, le matua mamao o le atamai fa’atekonolosi o lo’o i ai Iapani pe’a fa’atusalia mai ia i tatou i le vasa pasefika.

O lea lava fa’atasiga, na tomua ai lava se tautalaga a le tama’ita’i Pule Sili o le USP i Alafua Atualevao Ruby Va’a, ma sa ia mua’i fa’ailoa mai, “Ona o lenei sao e ao lava ina faia, e tusa pe ua tulata i le 6 masina talu ona tatau ona fa’atino. O lenei sao e mo’omia mo le toe fuafuaina o le isi faigamalaga e soso’o mai, ae le fesiligia le aoga o lea malaga i le soifua fia iloa ma le tausaili o tatou alo na malaga fa’apitoa ai, e fai ma ave fu’a a le tatou fo’i malo!”

O lea fa’atasiga, ina ua mae’a, sa faia se tausamiga mama e fa’ailoa ai le fiafia tele o le fanau sa malaga, fa’atasi ai ma le Pulega a le USP Alafua.