Ads by Google Ads by Google

Tama Aivao?

Ua fa’ailoa mai e le Associated Press, mai le a’ai o Berlin, e le latou vaega o leoleo, le tete’i o i latou i se tamaititi e na’o le 16-20 tausaga le matua, e matua lelei lava lana tautala i le Igilisi, peita’i, e le iloa ma malamalama i le fa’a-Siamani.

I se tala na fa’ailoa mai e le ali’i o Ray, ae ua ia le iloa lona fa’ai’u, ua atoa le lima tausaga o feoa’i solo i la’ua i le vao ma lona tama, peita’i, ua atoa fo’i le 9 masina o taofia fa’anana e Leoleo a Siamani lenei ali’i talavou, se’i taumafai e sailia patino po o fea na fanau ai, ma ola a’e ai, ae pe moni fo’i lana tala ua fa’amatala mai.

E mautinoa, e le o se Siamani le tamaititi lenei, ona o lana tautala i le Igilisi e matua lelei lava.  E leai fo’i se fa’aleoga o upu peretania e fa’ailo ai, o se tagata mai Siamani ma atunu’u tulata. Ua fa’ailoa mai e le ali’i Leoleo o Thomas Neuendorf, “O taumafaiga uma lava sa tau sailia ai lea tamaititi ma lona tupu’aga mai, ua faigata nei, ma ua mafua ai ona fa’alauiloa mai e le latou ofisa le tamaititi lenei, ina ia sailia ai nisi fo’i fa’amaumauga e aga’i i ai le sailiga.”

O le fa’asalalauga fa’alaua’itele o le ata o lenei tamaititi, atonu o le a avea ma mea e iloa ai e se tasi ma latou fa’ailoa mai ai nisi mea e uiga ia Ray. O le aso 5 o Setema, 2011 sa savalivali ane ai lea atali’i i le a’ai o Berlin, ae o’o mai i le aso, ua le mailoa lava se mea e maua ai se isi tala e fa’atatau ia te ia.

O le tala mai a le ali’i o Ray e tusa o lona olaga, sa ia fa’ailoa i leoleo,  o lona tama e na te vala’aua o ia ia Ray, ae le iloa e ia sona fa’ai’u. Na fanau mai o ia i le aso 20 Iuni, 1994. O lona tina e igoa ia Doreen ma na otio ia ina ua lavea le latou ta’avale, ona sosola ai loa lea o ia ma lona tama i le vaomatua ma nonofo ai mo le 5 tausaga.

Na ia fa’amatala fo’i i leoleo, e matele ina nonofo i la’ua i ana ma fale’ie ma e fa’aaoga e i la’ua fa’afanua ma le komupasi e fa’ailoa ai le mea e aga’i i ai. Na ia fa’ailoa i leoleo na maliu lona tama ia Aukuso 2011, ona ia tanua lea i le vao ae toe sopo ai loa i le vao ma alia’i ane ai i Berlin, alu sa’o lava i le City Hall.

Ua le mafai e leoleo ona fa’amaonia atoa lenei fa’amatalaga a le ali’i o Ray, ma ua i ai fo’i masalosaloga o le vasega o leoleo i lenei ali’i talavou. Ina ua tu’uina o ia i le a’oga, sa matua lelei atoatoa le fa’aaogaina e ia o le Komipiuta ma lana telefoni fe’avea’i. Ua fa’ailoa ai i leoleo, e le’i motusia feso’ota’iga a Ray ma le tekonolosi fa’aonaponei mai le lima tausaga lea sa ia ta’ua na nofo ai ma ‘aivao i le vao.

Ua iloga mai fo’i e vave tele le piki a le tama i le gagana Siamani, i totonu lea o le potu a’oga, ae fiafia tele o ia i le laptop po’o komipiuta fe’avea’i. E le’i fa’aletonu pe ofo i ni mea i totonu o le a’ai, e iloga ai se tasi e le’i masani mai ai i lea olaga.

Peita’i ina ua fa’aalia ata o le ali’i o Ray, sa vave ona maua mai le feso’ota’iga mai se tasi o tina i le a’ai o Netalani, sa ia fa’apea mai o le ata lenei o lana tama fai e igoa ia Robin van Helsum ma ua atoa le 20 o ona tausaga. E matua leai lava se fa’aletonu tau le mafaufau o Robin, ae o ia e sau mai le a’ai o Hengelo i le itu i sasa’e o Netalani.

Ua fa’aauau pea sailiga a leoleo, ae ua fa’amaonia le tonu o le igoa ma le olaga o lea tamaititi, peita’i, ua sailia le afuaga o lona manatu e sola ese mai lona tina fai, ae mautinoa lava, o lenei tama, sa fa’anana ona avea ma tama a le tina sa vala’au mai i leoleo. Ua taumafai le vaega o leoleo, e sailia tonu se mea e mana’o i ai ‘Ray’ Robin, atonu e aoga i lona olaga.

saunia: Leua Aiono Frost