Ua talosagaina e le faipule mai Pago Pago ia Vaamua Henry Sesepasara le Faatonusili o le Matagaluega o le Gataifale (DMWR) ia Dr. Ruth Matagi, e tatau ona i ai se fesoasoani a lana matagaluega mo le Aufai Faiva a Tutuila ma Manu’a, ona ua silia i le 20 tausaga e le’i toe fesoasoani atu lava le ofisa i le aufai faiva.

O lea talosaga a Vaamua na tuuina ina ua iloilo e le Komiti Soofaatasi o le Paketi a le Fono le paketi a le matagaluega o le DMWR mo le tausaga tupe 2014.

Na amata fesiligia e Vaamua le tamaitai faatonu i le mafuaaga ua tuai ai ona faaleleia tama’i uafu laiti ia e taula ai alia fagota i gatai o le uafu i Malaloa, ae na taua e Dr. Matagi e faapea, o lo o faatali galuega a le ofisa sei uma galuega a le FEMA ona faatoa aga’i atu loa lea o le latou ofisa e faaleleia tulaga ia mo le aufai faiva.

Saunoa Vaamua, e foliga mai ua mafuli le matagaluega i le faia o a latou suesuega i tulaga o le gataifale ae ua faatuatuana’i ai ma le isi latou matafaioi e tatau ona i ai, o le tuuina atu lea o le latou fesoasoani mo le aufai faiva a le atunuu.

Fai mai Vaamua, afai o lo o faaaoga e le Matagaluega faamaumauga mai le aufai faiva a le atunuu e faavae ai tupe fesoasoani mai le feterale mo le matagaluega, e tatau foi la ona i ai sina tupe e tuu atu e le matagaluega e fesoasoani ai i le tau atina’eina o vaa alia a le aufai faiva.

“Ua tele naua tulafono a le feterale ua fetaia’i ma le aufai faiva, ma ua le gafatia e ni isi o le aufai faiva ona faatino nei mau tulafono, ua faigata ai fo’i ona faaleleia le atina’eina o vaa fagota a isi fai faiva,” o le saunoaga lea a le alii faipule.

“O le tele o tagata faifaiva ua faaaoga lava a latou tupe e faaleleia ai a latou va’a, ae o le matafaioi lea a le tou ofisa o le fesoasoani i le faaleleia o tulaga nei,” o le isi lea saunoaga a Vaamua.

Na faamanino e Vaamua i le tamaitai faatonu ma luma o le komiti e faapea, ua avea le tele naua o tulafono a le feterale ua faigata ai i ni isi o le aufai faiva ona faaleleia a latou vaa ona o le lima vaivai atoa ai ma le taugata o mea e manaomia ona faaleleia ai a latou vaa.

Na taua e Dr. Matagi e faapea, ua uma ona tuuina atu le fesoasoani a le matagaluega e faatau ai ni isi o mea e manaomia i luga o vaa alia (safety equipment), ina ua faamamalu le tulafono a le US Coast Guard mo vaa fagota alia i le atunuu, ae na tali Vaamua, e na o le 15 alia na faamanuiaina i le tupe sa fesoasoani atu ai le matagaluega, ae le i mafai ona aofia ai ma tagata faifaiva i Manu’a.

Na fautuaina e Vaamua ia le tamaitai faatonu ina ia faaaoga le $40,000 lea o lo o faaagaga i totonu o lana paketi mo malaga a le ofisa i fafo e fesoasoani ai i le aufai faiva a le atunuu.

Na taua e le alii faifaiva o Ameperosa Amituana’i o Aua e faapea, ana tele se fesoasoani tau tupe latou te maua mai i le malo e faaleleia ai a latou vaa fagota, o le isi lea atina’e e ono tula’i mai ma fesoasoani i le malo i se taimi o i luma, aua e mafai ona latou sapalai i’a i faleaiga po o le kamupani i’a foi.

O ni isi o mataupu sa fesiligia e isi sui o le komiti i le taimi o le iloiloga, o auala e faatamaia ai e le matagaluega ni isi o manu faalafua e pei o le ‘mynah bird’ lea ua avea ma faalafua i totonu o le atunuu.

Na taua e le alii faipule ia Atualevao Gafatasi Afalava e faapea, o se tasi o faafitauli ua maitauina i le vaomatua o le atunuu, ua le toe vaaia manu a Samoa e pei o le Manu Tagi ae ua taatele le ‘Minah Bird’ i so o se vaega o le atunuu.

Na taua e Dr. Matagi e faapea, o se tasi o galuega o lo o gafa ma le matagaluega i le taimi nei, o le taumafai lea e tuu faatasi a latou faamaumauga i suesuega o lo o faia, i le aofai o manu o le Mynah Bird ua i ai, o fea nofoaga o lo o tele ai le manu, ae pe i ai foi ni isi manu Samoa ua faatamaia e le manu lea.

O le taua o faamaumauga nei e pei ona taua e le tamaitai faatonu, o le a mafai ai ona malamalama le atunuu i le tulaga o lo o i ai manu i le siosiomaga, aemaise ai foi o ituaiga meaola o lo o maua i le sami.