Talosagaina pisinisi....latou manatu siitaga totogi amata
Ua tuuina atu se talosaga a le afioga i le kovana sili, Lolo Matalasi Moliga, i le fa’alapotopotoga a le au fai pisinisi i Amerika Samoa, ina ua tuuina atu i le malo tulaga o a’afiaga tau tupe i pisinisi pe afai e fa’ataunu’u isi siitaga o totogi amata i le teritori.
O le isi si’itaga e 50 sene i le itula ua faatulaga i le aso 30 o Setema o le tausaga nei. Ua ma’ea ona fa’alauaitele se popolega i le faalapotopotoga a le au fai pisinisi i se aafiaga tele i kamupani ‘ia i le teritori pe afai e faaauau isi siitaga i totogi i le lumana’i.
I sana tusi i le aso 30 o Iuni sa tuuina atu i le taitai fono o le faalapotopotoga a le au fai pisinisi sa faailoa ai e le afioga i le kovana ia David Robinson e faapea o le siitaga o totogi amata e aafia ai pisinisi ma tagata lautele.
O lo’o galulue le malo e tuu faatasi so latou manatu i lenei mataupu, ae o lo’o mana’omia foi se manatu o le au faipisinisi e aofia ai kamupani ‘ia.
Saunoa le kovana e faapea, o lo’o fia maua e le malo se manatu o le faalapotopotoga i le aafiaga o le siitaga o totogi amata se ia oo atu lava i le $7.25 i le itula e pei ona faatulaga mai e le tulafono a le fetarale.
Ua le gata i lea, o lo’o manaomia foi e le kovana gaoioiga a pisinisi tua e tali atu ai i se tulaga faaletonu i a latou kamupani pe afai e faaauau pea le siitaga o totogi amata.
Saunoa Lolo e faapea, o faamaumauga uma mai le faalapotopotoga a le au faipisinisi ae maise manatu mai kamupani ‘ia o le a tuufaatasia ai se manatu e tasi o Amerika Samoa e tuuina atu i le Konekeresi, i le aafiaga o Amerika Samoa pe afai e faaauau pea siitaga o totogi amata e pei ona faatulafono mai e le malo tele.
Talu ai ona ua utiuti le taimi, ua talosaga ai le afioga i le kovana ia Robinson ina ia faao’o atu i le malo tusitusiga a le faalapotopotoga a le au faipisinisi i le aso 10 o Iulai, 2015.
Taua e Lolo e faapea o le manatu autu i le malo ina ia soifua lelei ma soifua manuia tagata lautele ma ia olaola foi pisinisi i totonu o le teritori.
Ina ua fesiligia le susuga ia Robinson, sa ia faailoa mai i le Samoa News e faapea o lo’o ua tuufaatasia nei so latou manatu ma faamaumauga mo le kovana.
I le faaiuga o le vaiaso ua te’a sa taua ai e Robinson se manatu mautu o le faalapotopotoga a le au faipisinisi i lenei mataupu. Sa ia saunoa e faapea, o le faatulagaina o totogi amata maualalo e tatau lava ona faia e Amerika Samoa, fuafua i luga o lona tamaoaiga.
Saunoa foi Robinson e fa’apea, e i ai lava nisi o pisinisi i totonu o Amerika Samoa atonu e le afaina i le isi siitaga o le 50 sene i le itula, ae peitai o le popolega tele o lo’o i ai o kamupani ‘ia a lua i le teritori, aua so’o se taimi lava e sii ai i luga le faafoeina o ia pisinisi o le a faigata ai foi ona latou tauva ma isi atunu’u i Asia ma le Pasefika o lo’o maualalo tau o le faafoeina o pisinisi.
I le fonotaga a le kapineta sa faia i le masina ua te’a, na saunoa ai le afioga i le kovana sili i lona lagolagoina o le si’i o totogi amata, ae talosaga le malo tele e faatupeina se isi vaega o le siitaga.