Ua talosagaina e le afioga i le ali’i kovana ia Lolo Matalasi Moliga le fesoasoani a pulega a ali’i ma faipule o afioaga ma itumalo uma i le atunu’u, ina ia tutu fa’atasi e saili se auala e foia ai fa’afitauli ua maitauina le tutupu mai i totonu o le atunu’u i le taimi nei, ma a’afia ai soifua o leoleo o lo o galulue e tausi le saogalemu o tagata ma puipui tulafono a le malo.

“O lea ua tatou iloa fa’afitauli ua tutupu i le atunu’u i le taimi nei, o ni isi fo’i o nei fa’afitauli e le fou, ae o le fesili la lea ua tula’i mai, o le a la tatou vaega e fai ina ia foia ai nei fa’afitauli”, o le saunoaga lea a Lolo i lana kapeneta i le aso Gafua na te’a nei, i se fonotaga fa’apitoa sa faia e talanoaina ai le fa’alavelave na manu’a ai se ali’i leoleo, atoa ai ma le tau sailiina o ni auala e foia ai le toe tutupu mai o ni fa’alavelave matuia fa’apenei i le lumana’i.

“O le mea moni lava ia, afai ua fa’ao’olima tagata o le atunu’u i leoleo o le malo, ua lava lena e ta’u mai ai ua le amanaiaina e tagata le malo ma le atunu’u atoa”, o le isi lea saunoaga a le ali’i kovana ma ia talosagaina ai loa le Ofisa o Mataupu Tau Samoa o lo o i lalo o le ta’ita’iga a le Alo o Salamasina ia Satele Galu Satele Sr, ina ia fa’atulaga ni fonotaga a Falelima i Sisifo ma Sasa’e, e talanoaina ai ni auala e foia ai fa’afitauli nei.

“E leai se isi auala e malu ai le atunuu, ua na o le fa’amatai ma le aganu’u, e fou nei mai lava leoleo ae o le aganu’u ma le fa’amatai sa ola mai ai Samoa i aso anamua, lea lava o lo o tauave mai pea lena mamalu e oo mai i le taimi nei”, o le isi lea saunoaga a Lolo.

Na taua e le ali’i kovana i ta’ita’i fa’aleaganu’u e fa’apea, afai e le mafai e nu’u ona fa’afilemu vevesi ma fa’afitauli fa’apenei e tutupu mai, lona uiga ua lava lena e ta’u mai ai ua le aganu’u sa ola mai ai Samoa i tausaga ua mavae.

“O le aganu’u lava e tua i ai aiga uma o Samoa, e leai se fanau e le tofu ma ni matua, e leai fo’i ni matua e le tofu ma ni fanau, lona uiga, e faigofie ona faafilemu mataupu faapenei pe afai e le galulue fa’atasi le pulega a ali’i ma faipule o nu’u ma itumalo ta’itasi, e fa’amalosi leoleoga i totonu o le nu’u, fesoasoani atu ma le aumaga e lagolago galuega a leoleo o le malo”, o le isi lea saunoaga a Lolo.

Na taua e le ali’i kovana e fa’apea, e mafua ona tutupu fa’afitauli matuia fa’apenei i totonu o nu’u, o le fa’atamala o matai o lo o taitaia le nu’u.

Sa ia taua fo’i e fa’apea, e le tau o fua ni leoleo e vaavaai ma puipui tagata Samoa uma o lo o nonofo i nuu taitasi, o le tiute lena a matai ma le nuu atoa, o le puipui o le nuu ma faatonutonu amioga a tagata o le nu’u.

“Afai e o leoleo e tau puipui ma vaavaai tagata Saina ma Kolea, ua tatau ai, e leai ni a latou pulega fa’amatai i nuu ma nofoaga o lo o nonofo ai, ae o nuu uma i le atunuu, e le tau manaomia ni leoleo e vaavaaia i latou, o le tiute lena o le nuu, matai ma le aumaga”, o le isi lea saunoaga a le alii kovana, ma ia fautuaina ai loa le loia sili lagolago ia Mitzie Jessop, faapea ai lana loia fautua ia Steve Watson, ina ia galulue fa’atasi e toe iloilo suiga i le tulafono, ina ia mafai ona fai i ai ni suiga mo le mautinoa lea o le saogalemu o le atunuu atoa.

Sa ia tofia fo’i i le taimi lava lea le afioga a Save Liuato Tuitele e galulue ma le Sui Komesina o Leoleo ia Vaimaga Maiava, fa’apea ai le Ta’ita’i Leoleo ia Tauese Va’a Sunia i le su’esu’eina o le mataupu e pei ona manu’a ai se ali’i leoleo i le amataga o le vaiaso nei.

Ua talosagaina fo’i e le ali’i kovana ofisa uma o le malo e mafai ona ofo atu la latou fesoasoani i le leoleo ua a’afia ma lona aiga, ina ia amata nei loa ona galulue e fa’atino lea tautua, e pei o le tu’uina atu o galuega fa’a faufautua ina ia fesoasoani ai i ali’i leoleo na a’afia fa’atasi ai ma o latou aiga.

Saunoa le afioga i le alii lutena kovana ia Lemanu Peleti Mauga e fa’apea, e tele fesoasoani mai matagaluega a le malo o lo o manaomia e leoleo na aafia i le faalavelave ma o latou aiga, aemaise lava i le leoleo na manu’a, atoa ai ma isi ali’i leoleo e to’alua sa latou i ai fa’atasi i totonu o le ta’avale.

Na lagolagoina e Satele ma le afioga a Fai’ivae Alex Godinet le fautuaga e tatau ona fono falelima mo le sailiina o se fofo o le fa’afitauli.

Ae na taua e Lemanu e fa’apea, o suesuega a le militeli i ituaiga fa’alavelave fa’apenei, aemaise lava pe afai e lavea se fitafita i se fana, o le 99% o tagata e manunu’a faapea e le mafai ona toe tuuina i totonu o le galuega fa’afitafita, ma, e i ai lona talitonuga e fa’apena fo’i le ali’i leoleo lea ua manu’a nei, e le tatau fo’i ona toe galue o ia i le galuega fa’aleoleo, ona o puipuiga lava i a’afiaga o lona mafaufau mai le fa’alavelave sa tupu.

O lo o i ai le fa’anaunauga a ta’ita’i o le atunu’u, o le a mafai e pulega a ali’i ma faipule ona saili se auala e foia ai lenei fa’afitauli.

Talu mai le aso Sa na manu’a ai le ali’i leoleo seia oo mai ananafi, o lo o i ai pea o ia i le falema’i o le LBJ i Fagaalu, ae o lo o fa’aauau pea su’esu’ega a leoleo i le mafua’aga o lenei fa’alavelave.