O se iugafono na faaulufale e le afioga i le alii Faipule mai Aunuu ia Talaimatai Elisara Su’a, o lo o ia talosagaina ai le kovana sili ia Lolo Matalasi Moliga, i ni auala e mafai ona faatau ai se va’a a le malo e faaaoga mo femalagaaiga a tagata i Aunu’u.I le tino o le iugafono o lo o taua ai e faapea, e silia i le 300 tagata Aunuu e autovaa mai i Tutuila i aso uma mo galuega, aoga, pisinisi ma isi tulaga.Ae na pau auala o femalagaaiga o lo o mafai ona faaaoga e tagata Aunuu, o va’a alia mo fagotaga a aiga lea o lo o faaaoga e la’u ai tagata ma uta, ae a o’o ina fa’aaoga e aiga a latou va’a, ua leai loa ni va’a mo femalagaiga a tagata Aunu’u.Ma ua avea lea tulaga ma auala ua le amanaia ai le aofai faatapulaa o tagata e faataga ona la’u e le vaa mo le malaga e tasi, ua le popole foi le ave vaa i tulaga o faasalaga pe a sili tagata e ave i le malaga ona o le naunau o tagata ia aua nei tuai i galuega ma aoga, o ni isi foi o taimi e ova ai le mamafa o uta e la’u e vaa alia nei.E talitonu Talaimatai na pau le auala e mafai ai ona foia le anoanoa’i o nei mau faafitauli o lo o feagai ma tagata o lona nuu, o le sailia lea e le malo o se vaa lelei ma lapo’a e mafai ona faaaoga mo fela’uaiga e le gata i le va o Aunuu ma Auasi, ae i le va o Aunuu ma le uafu i Fagatogo.Fai mai le alii faipule, e le mamao le va o Aunuu ma Tutuila e pei o le va o Tutuila ma Manu’a, ae o ni isi o taimi, e tele ai ina malu le va o motu ia e lua, e seasea foi tapunia le alavaa ona o le leaga o le tau.“O se vaa talafeagai lava ma sili ona aoga mo le vainuu lea, o se vaa alamini e mafai ona ofi ai ni tagata pe toa 20 pe sili atu foi, faatasi ai ma uta e la’u ai i malaga ta’itasi, e le pei o le va ma Manu’a, e malaga i le vasa sou ma e manaomia ai ni va’a u’amea e fai ona saogalemu ai pasese,” o se vaega lea o le iugafono na faaulu e le alii faipule mai Aunuu.Na taua foi e le alii faipule e faapea, “O se mea aoga mo le malo atoa foi ma tagata o Aunuu, ina ia saili se vaa laupasese e mafai ona la’u ai ni tagata se toatele, nai lo le alia e le mafai ona ia faafeiloaia manaoga mo femalagaiga.”O le kopi o lenei iugafono ua tuuina atu nei i le afioga i le kovana sili, atoa ai ma le faatonusili tofia o le Matagaluega o Pulega o Uafu ma Taulaga, ae ua taoto atu nei le iloiloina o lenei iugafono i le komiti o Uafu ma Taulaga a le maota o sui, lea foi o lo o taitaifono ai le alii faipule mai Aunuu.E le o se taimi muamua lenei ua laga ai lenei mataupu i luma o le Fono, ona o se manaoga i ni auala e faaleleia ai tautua mo Aunuu.I le nofoaiga na mavae atu nei, na laga ai foi e le afioga i le alii Senatoa ia Fuata Dr. Iatala le mataupu lava foi lenei, ma ia talosagaina ai le malo ina ia fausia se falema’i, faalelei le suavai taumafa, toe faafou faleaoga ma ia i ai se vaa e feoa’i ai tagata Aunuu.