Talosagaina Faipule ina ia tau solomua i latou tausiga filemu totonu nuu

O le fa’alavelave lea na tuaai ai e ni isi i Fagaitua ma Aua le pasi aoga na momoli mai ai le au taaalo a le Aoga Maualuga i Tafuna i le po o le aso Lua na te’a nei, ma manunu’a ai ni tamaiti aoga mai Tafuna, na mafua ai ona talosaga le faipule mai Ituau/Leasina i faipule uma o le Fono Faitulafono, ina ia faaaoga lo latou tofi e taulamua ai i latou i le sailiina o auala e puipuia ai le toe tula’i mai o faalavelave matuia faapenei i totonu o nu’u ma afioaga i le atunuu.

 

Na saunoa le afioga i le alii faipule ia Atualevao Gafatasi Afalava ananafi e faapea, ina ua ia faalogo i le tala e faatatau i le pasi aoga sa taua’i e ni isi i ma’a, sa lagona lona le fiafia ona o lea e tigaina le Matagaluega o Aoga a le malo e tau saili ni isi alagatupe e faatau ai ni isi pasi aoga mo fanau, a’o lenei e tau solomua i isi tupulaga ona faaleaga mea totino a le malo, ae sili ai ona matuia ona o lea ua manunu’a ai ma isi fanau aoga.

 

“E i ai lo’u manatu e le aoga ona tatou inaina i le malo i faaletonu o lo o tula’i mai ai, ae le mafai ona tatou foia faafitauli o lo o tutupu i totonu o tatou nu’u ma alalafaga,” o le saunoaga lea a Atualevao.

 

Na taua e le alii faipule e faapea, ua tupu so o tele le faalavelave lea o le tauai i ma’a o pasi aoga, ae foliga mai e le o faia lava i ai se galuega a pulega a alii ma faipule e taofia ai tupulaga mai lo latou faia o nei uiga mataga.

 

“O la’u tatalo i a outou afioga i faipule, fa’aaoga o tatou tofi faipule e taulamua ai tatou i le unaia o auala e puipuia ma taofia ai le toe tula’i mai o faafitauli faapenei i totonu o tatou nuu, o le tauai e tupulaga o tatou nuu o pasi ma manunu’a ai fanau aoga toe faaleagaina ai meatotino a le malo,” o le saunoaga lea a le alii faipule.

 

Na taua e Atualevao e faapea, sa aafia fo’i tupulaga a lona nuu i amioaga faapea i taimi ua tuana’i, peita’i o le taimi nei, ua le toe i ai se isi e ula i faaiuga a alii ma faipule o le nuu, ina ua faasala e le nuu tupulaga ma o latou aiga na aafia i le faia o uiga mataga faasaga i isi tagata.

 

“Tatou mataala i le vaavaaia o mataupu faapenei e tutupu mai i totonu o tatou nuu, aua o ni isi nuu ua ni ni faatasi tupulaga amio le mafaufau ma tupulaga amio lelei, ae o le fautuaga, afai e maua i latou o lo o faia nei uiga mataga, fai i ai faasalaga mamafa, a le o lena, faasala latou matua ina ia lagona ai e matua le faatamala e faatino latou tiute,” o le saunoaga lea a le alii faipule.

 

Na taua foi e Atualevao e faapea, e sili musa lava i nuu o lo o tele i ai atina’e ma fesoasoani a le matagaluega o aoga, ona latou faia uiga mataga le tau pulea faapenei i pasi aoga ma fanau aoga a le atunuu, peitai o amioga nei e le iloa ai se tagata toa.

 

Na vave ona faauilavea le fofoga fetalai o le maota ia Savali Talavou Ale e faatatau i le mataupu lenei, ma ia talosagaina ai loa komiti e tolu a le maota ina ia galulue faatasi mo le sailia o se fofo o lenei faafitauli.

 

O komiti e tolu a le maota ua tofia e galulue mo le sailia o se fofo o le faafitauli e aofia ai le Komiti o Aoga, Komiti Puipuiga o le Saogalemu Lautele, atoa ai ma le Komiti o Mataupu Tau Samoa.

 

Na faailoa e le taitaifono o le Komiti o Aoga a le maota o sui ia Vaetasi Tuumolimoli Saena Moliga, i se feiloaiga ma le Faatonusili o Aoga a le malo i le vaiaso nei e faapea, afai e le mafai ona taofia le tutupu mai o faafitauli faapenei ma aafia ai le saogalemu o fanau, e sili ai loa pe a taofi taaloga a fanau o lo o faagasolo, se’i vagana ua mautinoa le saogalemu o fanau aoga.

 

E tusa ai ma ripoti ua taunuu mai i le Samoa News, o le faalavelave na tula’i mai ina ua maea se taaloga volipolo i le va o le au a tama aoga a Fagaitua ma Tafuna sa faia i le fale taalo a le aoga maualuga i Fagaitua, ma manumalo ai le au a Tafuna.

 

O luma o le Ofisa o Leoleo i Fagaitua na tauai muamua ai le pasi, ma toe tauai faalua ai ina ua o o mai i Aua.

Comment Here