Ads by Google Ads by Google

Talosaga Va’amua ia Savali fai se fa’aiuga ia Mageo

Ua tu’uina atu nei e le afioga i le ali’i faipule mai Pago Pago ia Va’amua Henry Sesepasara, sana tusi i le Fofoga Fetalai o le Maota o Sui o le Fono Faitulafono ia Savali Talavou Ale, ina ia iloilo fa’amaumauga uma e fa’atatau i le solitulafono lea na ta’usala ai le susuga a Meauta Mageo i Amerika, ina ia mafai ai ona faia se fa’aiuga mautu pe alaga tatau ona avea Mageo ma faipule o Pago Pago i le nofoaiga fou a le Fono Faitulafono o lo o lumana’i nei.

 

Na taua e le fa’amasinoga i lana fa’aiuga sa tu’uina mai i le amataga o le masina lenei e fa’atatau i le mataupu a Va’amua ma Mageo, e le o se tiute a le fa’amasinoga le iloilo pe alaga tatau ona nofoia e se sui ua manumalo mai le palota le nofoa o le Fono, ae o le tiute lena a le Maota o Sui.

 

O le susuga a Mageo na manumalo i le nofoa a le afioaga o Pago Pago i le maota o sui, i le faiga palota tele sa faia ia Novema na te’a nei, peita’i na taua e Va’amua, lea ua sosoo nofoaiga e tolu o ia umia le tofi a le afioaga, e le o agava’a le avea o Mageo ma faipule ona o lo o i ai vaega o le tulafono e le mafai ona ia ausia.

 

Sa tu’uina atu fa’atasi e Va’amua ia Savali lana tusi, atoa ai ma isi fa’amaumauga e fa’atatau i le solitulafono sa ta’usala ai Mageo i Oregon i le 2010, ina ia lagolago ai lana fa’afinauga, e le agava’a le avea o Mageo ma faiuple.

 

Na taua e Va’amua i lana tusi ia Savali i le aso 16 Tesema 2014 e fa’apea, talu ai lona vaai maualuga i le mamalu ma le tulaga fa’aaloalogia o le fono faitulafono, e tatau fo’i la i sui uma o le Fono Faitulafono ona latou ausia ta’iala maualuluga ua tu’uina mai e le Atua ma le Fa’a Samoa, e lima ta’ita’ina ai galuega a le fono, ma, o le mafua’aga tonu lea ua ia manatu ai, e tatau ona tu’uina atu i le Fono le mataupu e fa’atatau ia Mageo, e le gata na te le o ausia ta’iala e pei ona fa’ataoto mai e le tulafono, e le agava’a fo’i ona avea o ia ma sui o le fono.

 

Sa tu’uina fa’atasi e Va’amua i lana tusi fa’amaumauga mai le Ofisa o Leoleo i Lane County Sheriff Office, e fa’atatau i le taimi na taofia ai Mageo i le falepuipui, lea o lo o pipi’i ai lona ata, o lona suafa atoa, fa’apea ai lona aso soifua.

 

Na si’itia e Va’amua se vaega o le faavae lea o lo o fa’amanino mai ai le tulaga lea, “e le agava’a se tagata sa ta’usala i se solitulafono mamafa i lalo o tulafono a Amerika Samoa, Iunaite Setete, poo soo se setete o le Iunaite Setete, ona nofo i le Fono Faitulafono ....”

 

Na fa’ailoa e Va’amua ia Savali e fa’apea, sa ia taumafai fo’i e fa’asa’o le mataupu lenei i luma o le fa’amasinoga i le masina o Novema na te’a nei, peita’i o le fa’aiuga a le fa’amasinoga sa tu’uina mai, o le fa’aiuga o le mataupu lenei e fai e le maota o sui.

 

“Ou te le o taumafai e fa’amalie ni o’u lagona fa’aleaga i lenei mataupu, e le o i ai fo’i so’u manatu ou te tauva i se faiga palota fa’apitoa mo lo’u nu’u o Pago Pago, pe afai e finagalo le Fono Faitulafono e teena le nofoa o Mageo”, o se vaega lea o le tusi a Va’amua ia Savali.

 

“I le faiga palota na se’i mavae atu nei, na fa’ailoa ai e tagata palota a Pago Pago lo latou fa’anaunauga ua tatau ona sui se latou faipule i le Fono Faitulafono, ma ou te fa’aaloalo tele i le latou fa’aiuga lena, peita’i, ua ou manatu e auina atu lenei tusi, ina ia fa’atumauina ai pea le mamalu o le Fono Faitulafono, ma tu’u atu ai i tagatanuu o Pago Pago se sui e fa’aaloalogia ma fa’amaoni e talafeagai mo i latou”, o se vaega lea o le tusi a Va’amua.

 

Saunoa Va’amua e fa’apea, e le o nofo lelei lava lona mafaufau i le solitulafono mamafa lea na ta’usala ai Mageo, i lona teena lea ma lona iloa o le fa’atinoina o lona tiute o le tausia lea o lana fanau, e pei ona fa’atonu ai o ia e le fa’amasinoga, peita’i sa ia fa’atamala e fa’ataunu’u lea tulaga.

 

“Afai ua fa’atamala le susuga a Mageo e fa’atino ona tiute i le tausiaina lea o lana lava fanau, e fa’apefea la ona tu’u atu le fa’atuatuaga na te tausia ai fanau a Amerika Samoa”, o le saunoaga lea a Va’amua.

 

Sa ia taua fo’i e fa’apea, e ui i le solitulafono a Mageo sa ta’usala ai o ia, ae sa ia tauva lava mo le nofoa a lona nu’u i le Fono Faitulafono, ma o lea tulaga ua atagia mai ai, e le gata ua ia taumafai e fa’asese le au fai palota, ae ua ia fa’aseseina fo’i i latou uma sa lagolago ma palota ia te ia.

 

“Ona o nei mafua’aga uma, ua ou talosagaina ai lau afioga ina ia silasila toto’a i fa’amaumauga uma ua ou tu’uina atu e lagolago ai la’u talosaga, ma faia ai sa outou fa’aiuga, pe talafeagai ona avea se tagata sa ta’usala i se solitulafono mamafa ma faipule o le Fono Faitulafono”, o le fa’aiuga lea o le tusi a Va’amua ia Savali.

 

O le kopi o lenei tusi sa tu’uina atu i le Peresetene o le Senate ia Gaoteote Palaie Tofau, o Senatoa e to’atolu o le itumalo o le Maoputasi, loia a le Fono Faitulafono, fa’apea ai faipule uma o le maota o sui.