Ads by Google Ads by Google

Talosaga Tusitala Falani - Fia Alu Ese Mai Syria

O se tasi o tama’ita’i tusitala sa i ai fa’atasi ma le tama’ita’i tusitala ua fa’ailoa mai na maliu ina ua osofa’ia le nofoaga o lo’o i ai uma tusitala i Homs Syria, ua talosaga nei i le malo o Syria e tatau lava ona tu’ua e ia le latou malo ina ia faia sona ta’otoga ona e ogaoga tele ona manu’anu’a o i ai i ona vae.

Na osofa’ia le a’ai i Homs i le aso Lulu ma lavevea ai le tele o ali’i ma tama’ita’i tusitala e lipotia mai ai mea o tutupu i lea fo’i atunu’u ua fa’ateteleina ai fetauia’iga o latou lava tagata, peita’i e afua i faigamalo.

O Edith Bouvier na lavea o ia fa’atasi ai ma Marie Covin ma Remi Ochlik i le itumalo o Baba Amr. I se ata video ua mafai ona fa’aalia i luga o feso’ota’iga tau initeneti, ua fa’ailoa mai ai e Ms Bouvier o lo’o ua gau le ivi malosi o lona vae, ma e tatau lava ona vave faia sona ta’otoga.

Ua fa’atalosagaina e ia se tau matu’u mai o taugafana ae se’i fa’ao’o mai se ta’avale e mafai ona fa’ataoto lelei ai o ia, ma fa’auia atu le tuaoi ma Lepanona. I se isi ata video e lua a’i ata o fa’asalalauina, ua fa’ailoa mai ai e le ali’i pu’eata o Paul Conroy mai Peretania sa lavea ai fo’i o ia i lea osofa’iga o le au fa’asalalau, ua ia fa’ailoa mai  o lo’o va’aia o ia e le aufaigaluega i le falema’i e le vaega au a Syria lea e sa’oloto i latou.

Ua fa’ailoa mai e ia, o lo’o tausia o ia o se tagata taua ia i latou, ma e tusa lava pe tolu manunu’a tetele i lona vae, ae o lo’o lelei lava mea uma ia te ia. Ua tele na’ua le vevesi i Damascus ma ua faigata atili ai ala e taumafai ona ‘ave’esea mai ai le tama’ita’i tusitala ua manu’a nei. Ua fa’ailoa mai ua silia ma le 2 vaiaso e le o mafai lava ona sao mai se tasi mai totonu o Homs.

I le aso ananafi lava latou, ua fa’aalia ai i ni ripoti fa’asalalau, e i le va o le 50-60 tagata ua fasiotia a’o taumafai e kolosi mai Homs e fia o ese mai lea a’ai o vevesi i le taimi nei i Syria. I lea lava ata video o fa’alauiloa mai, ua fa’afetaia lava e Ms Bourier le galuega mae’ae’a a foma’i o lo’o faia mo ia, ae pau lava lea o se fesoasoani e mafaia e nei foma’i ona faia i le nofoaga o i ai, ae tatau lava ona alu ‘ese mai o ia i lona malo.

E toatasi le tusitala sa i ai i le taimi na pomua ai le nofoaga o i latou, ae le o fa’amanu’alia o ia, na’o le ali’i o William Daniels ua ia fa’aalia fo’i ona agaga fa’afetai i le Atua e le’i lavea fa’atasi se mea o ia i le pomuga o le mea sa i ai uma i latou. O lo’o fa’amalosi mai fo’i le talosaga e Daniel i le la’ua malo o Falani ina ia alofagia le talosaga ma ia ave’ese vave mai i la’ua ma le ua manu’a.

Ua mafai ona ia fa’ailoa mai, e matua le lava mea’ai ma e leai se eletise o le nofoaga o lo’o nonofo ai. Ua fa’aalia fo’i se manatu o le ali’i Peresetene o le malo o Falani Nicolas Sarkozy, e tusa ai o le fasiga o e na tusitala fa’asalalau mai Homs, “O le fasioti tagata lava lea ua fa’atino i Homs.” Na ia toe saunoa fo’i, “O i latou na faia lea mea, e ao ina tali i o latou solitulafono ua faia.”O le aotelega, e to’atasi le tama’ita’i tusitala ua maliu ai, e to’atolu isi tusitala ua manunu’a, ae to’atasi fo’i le tusitala e le o fa’amanu’alia.

saunia: Leua Aiono Frost