Ua talosagaina e le afioga i le ali’i Senatoa ia Tuiasina S. Esera le tatau lea ona faia se suiga i se vaega o tulafono tau Femalagaaiga, ina ia puipuia ai le avanoa o lo o tu’u atu i tagata mai fafo ua silia i le ta’i 20 tausaga talu ona aumau i le teritori, latou te ‘sponsor’ ina ai isi tagata mai fafo e ulufale mai ma nonofo i le teritori.

Na fa’amatala e Tuiasina le mafua’aga o lana talosaga e fa’apea, e le gata e alofa i le lumana’i o fanau a le atunu’u, ae o se auala fo’i e puipuia ai Amerika Samoa mai le soona lolofi mai i ai o tagata mai fafo, aemaise lava i tagata mai atunu’u i Asia.

“Ou te alofa ia Amerika Samoa, ou te alofa fo’i i fanau lalovaoa pe afai e fa’atupulaia pea le fa’afitauli lea, e le iloa po o le isi 20 tausaga ua nofoia e ni isi o tagata nei mai fafo nofoa o le Fono Faitulafono a le atunu’u, a o fea la e tua i ai a tatou fanau?”, o le saunoaga lea a Tuiasina i le taimi na ia fa’aleoina ai lona finagalo e fa’atatau i le mataupu lenei, i le taimi o folafolaga a le maota maualuga i le aso Faraile na te’a nei.

E le o se taimi muamua lenei ua tula’i ai le ali’i senatoa ma saunoa i le mataupu lenei i luma o le maota, aemaise ai lava, o ia o le sui o le senate i totonu o le Komiti Fa’afoe o Femalagaaiga.

Na fa’apupula atili e Tuiasina le mataupu e fa’apea, o le vaega o le tulafono lea e agava’a ai tagata mai fafo ua silia i le ta’i 20 tausaga talu ona aumau i le teritori, e avea ai ma tagata nofomau i totonu o le atunu’u, o lo o tu’u atu ai fo’i ma le avanoa e mafai ai ona sponsor e le tagata lea tagata mai fafo.

E talitonu Tuiasina, o le vaega lea o le tulafono e tatau ona sui, ina ia taofi le toe tu’uina atu o le avanoa lea i le tagata mai fafo na te sponsor ina ai tagata mai fafo, a ia faia suiga o le tulafono ma toe fa’afo’i le Fa’avae o le malo i le tulaga sa amata mai ai.

Saunoa le afioga i le ali’i peresetene o le Senate ia Gaoteote Palaie Tofau, o le mataupu lea ua mana’o i ai Tuiasina, ua atagia mai ai “lona mana’o e fuli atoa le lalolagi”, ona o lea ua talanoa i le suiga o le Tulafono ma le Fa’avae.

Na toe fa’amanatu e le afioga i le Tama’ita’i o le Ao ia Tuiasina, e le fou le mataupu lea o lo o ia talanoa mai ai i le maota, o se mataupu fo’i sa latou taumafai ai ma faipule i le maota o sui a o avea o ia ma faipule i tausaga ua mavae e talanoa ma soalaupule, peita’i na uma lava le tele o nofoaiga e le i maua i ai se tasi.

Na fautuaina e Gaoteote ia Tuiasina e fa’apea, afai o le finagalo o le Komiti Fa’afoe o Femalagaaiga ia fai se suiga i le tulafono, ona fa’atulaga lea o a latou suiga ae ave e silasila i ai le afioga i le ali’i kovana, ma tu’uina mai ai sona finagalo e tusa ai o lea mataupu.

Na toe tula’i Tuiasina ma ia saunoa e fa’apea, e le o taumafai e fuli le lalolagi pe taumafai fo’i e fai se gaioiga e tete’e atu ai i tagata mai fafo ua afu la latou tautua i le atunu’u, ae o lona manatu alofa i le atunu’u aemaise ai fanau lalovaoa.

Na saunoa le afioga i le ali’i senatoa ia Laolagi Fonoti Savali Vaeao e fa’apea, afai ua manatu le Komiti Fa’afoe o Femalagaaiga ua matuia tele le mataupu lenei, e le tatau ona ui sa’o mai i le Fono Faitulafono, ae ave muamua sa latou fautuaga i le ali’i kovana, ona fa’aulu mai lea e le kovana ma le faigamalo se pili e sui ai le tulafono po o le fa’avae e pei ona saunoa i ai le ali’i senatoa.

Na fa’amanino e Laolagi i luma o le maota e fa’apea, o lo o manino lava le tulafono mo tagata mai fafo ua nofomau i Amerika Samoa, e na o tagata o latou aiga e mafai ona latou ‘sponsor’ ma aumai i le teritori, ae le fa’atagaina ona latou soona aumaia ni isi tagata.

Ae na toe tula’i Tuiasina ma fa’atula’i le fesili, pe fa’apefea la ona iloa e le Ofisa o Femalagaaiga, o le tagata lea ua sponsor e le tagata nofomau mai fafo, o tagata moni ia a lona aiga.

“Le mafua’aga tonu lena o lea ou te finau atu ai, e manaomia ona toe teuteu le tulafono, ina ia aua ai ne’i nunumi le vaega lea tatou te finau ai, ina ne’i mao sasalu Amerika Samoa o tagata o le aiga o lo o sponsor e le tagata mai fafo, ae emo ane le ata o tagata eseese mai lona atunu’u o lo o aumai e saili manuia iinei”, o le toe tali atu lea a Tuiasina.

Na taua e Tuiasina i le Samoa News e fa’apea, o se tasi o suiga o lo o manatu e tu’u i le tulafono, o ulugali’i mai fafo na aumai i lalo o konekarate ae fananau ai a latou fanau i Amerika Samoa, e le tatau ona taua fanau nei o ni Nesionale o le Iunaite Setete, ae tatau lava ona taua i latou o sitiseni o le atunu’u sa malaga mai ai matua.

Na taua e se tasi o ofisa sinia a le Ofisa o Femalagaaiga e le fa’ataga ona talanoa i mataupu faapenei i tusitala e fa’apea, na pau tagata o lo o taua i le tulafono e mafai ona sponsor e le tagata mai fafo ua nofomau, o tagata o lona aiga e aofia ai lona to’alua ma lana fanau.