Ads by Google Ads by Google

Talosaga Togiola i le Fono e manaomia lo latou galulue faatasi

Na ogatotonu saunoaga a le kovana sili ia Togiola Tulafono i le latou feiloaiga ma le Fono i le taeao ananafi, e taua lo latou galulue faatasi i soo se mataupu e tulai mai ai ni fesili, ina ia foia ai le pasia atu e le fono o mataupu ae teena mai e lona ofisa, ma faigofie ai ona saili tali mo manaoga o Tutuila ma Manu’a.

Mo se faataitaiga o le mataupu i le paketi a le malo, lea ua talosaga ai le kovana i le fono, e manaia le toe fai i ai o ni nai suiga laiti i le paketi ua pasia nei, ina ia toe tuu ai i totonu pili e faatupe ai nisi o matagaluega na aveese e le fono, peitai e manaomia lo latou talanoa muamua ina ia tasi o latou finagalo i mea e tatau ona pasia, ma foia ai le tulai mai o faafitauli e pei ona maitauina i le pasia ma le teena mai o pili a le fono.

Na tomua le feiloaiga a le Fono ma le alii Kovana i le taeao ananafi i le malu taeao na mafuta faatasi ai senatoa, o faipule atoa ai ma faatonusili o matagaluega eseese a le malo, faapea ai le afioga i le kovana sili ma le lutena kovana.

E tele mataupu o loo fia maua i ai e le fono se malamalamaaga na faamanino e Togiola i lana folasaga, e pei ona tomua ai i le paketi a le malo mo le tausaga tupe fou, lea ua ia sainia se vaega ae teena nisi o vaega.

Na faamalulu Togiola i le fono ona ua ela le malo i le faamaninoina o nisi o mataupu e uiga i le paketi a le malo, peitai o le mataupu e pei ona aveese ai e le fono matagaluega e lua a le malo mai totonu o le paketi, e pei o le matagaluega o Faamaumauga (Dept. Information Technology-IT) faapea ai ma le matagaluega o le ARRA.

Saunoa Togiola, e taua tele matafaioi a matagaluega nei e lua i le va feagai o le malo tele ma Amerika Samoa i soo se mataupu e moomia ai le malamalama o le atunuu, peitai o lea ua sele molemole e le fono ma le manatu, e toe tuu atu i lalo o le ofisa o le kovana e faatupe mai ai, ae i ai lona talitonuga afai ae taoto pea matagaluega ia i lalo o le ofisa o le kovana, o le a  pu moomoo le lautele o le la tautua mo le malo.

$6.8 MILIONA

O se tasi o mataupu na aofia i le folasaga a le alii kovana i lea feiloaiga, o le tupe e $6.8 miliona lea o lo o gugulu ma nenefu ai le fono, peitai na faamanino e Togiola e faapea, o le tupe lea o loo i ai pea i lalo o le Ofisa o le Initeria, ae na mafua ona latou tuuina i totonu o le paketi mo le tausaga tupe fou, e le gata sa latou faailoa mai i le fono tupe maua uma a le malo, ae ia mafai ai foi ona faaauau tautua a le malo o loo fuafua e faatupe mai i le tupe lea, mulimuli ane ai fai se talosaga i le Initeria mo le faamatuu mai o se vaega o lea tupe.

Na faamanino e le kovana e faapea, o le tupe lea o loo maua mai i le maliliega o le Tapaa mai le Initeria, o loo faamoemoe e totogi ai le nonogatupe sa faia e Amerika Samoa mai le Faletupe a le malo tele, ae talu ai ua i ai se faasiliga o lea tupe e pei ona faailoa mai e le Initeria i lenei tausaga, ua mafua ai loa ona faailoa mai ai ma le $6.8 miliona e pei ona taua.

Na faafetaia e sui o le Fono le alii kovana e tusa ai o le latou feiloaiga, lea ua manino ai nisi o mataupu sa nenefu i ai le Fono.

Saunoa Galeai Tuufuli e faapea, e faigofie lava ona malamalama le fono ma le atunuu, pe afai e manino mataupu e folasia, peitai o le faafitauli sa tulai mai na faa faigata ai ona fai faaiuga a le fono, e lei manino lelei mataupu na tuuina mai e molimau a le malo.

I le saunoaga a le peresetene ia Gaoteote Palaie Tofau, e le gata sa ia faafetai ai i le kovana e tusa ai o galuega lelei mo le malo, ae sa ia faamaualalo ai foi e fai ma sui o le fono ona o ni fatia ua sola sa tulai mai ai feeseeseaiga i le va o le fono ma le kovana.

Saunoa Gaoteote, o lea ua lata ina maea le nofoaiga a le kovana ma le fono, e tatau foi ona lulu lima ma faailoa le agaga faafetai o le isi i le tasi, ona o galuega sa galulue punoua’i ai mo se manuia o le atunuu.