Ads by Google Ads by Google

Talosaga Soliai solofua tagi faasaga ia te ia ma Saulo

Ua i luma nei o le Vaega o Faamasinoga Apili o le Faamasinoga Maualuga a Amerika Samoa, se talosaga mai le Komesina o Palota ia Soliai Tuipine Fuimaono, tauala mai lea i lana loia o Gwen Tauiliili-Langkilde, ina ia solofua le tagi na faaulu e Lucia Bartley ma Esther Wall faasaga ia te ia ma Florence Saulo, ona e leai se malosiaga o le Faamasinoga e iloilo ai le mataupu i le agavaa o Saulo e avea ma sui tauva.

O le aso 19 o Novema na faila ai e Soliai lana tali i luma o le faamasinoga.

O lo o ta’ua e Wall ma Bartley i la laua tagi, e le’i agavaa Saulo e avea ma sui tauva mo le itumalo o Tualauta, leaga o ia o se tagatanuu o le malo o Samoa Tutoatasi ma e lei fesiligia e le Komesina o Palota ia le pepa fanau o Saulo, e faamaonia ai lona tagatanuu.

Na fa’aalia e Soliai i lana tali ua i luma o le faamasinoga, i le lisi sa fa’alauiloa i le aso 2 o Setema 2012 mo sui ua agavaa ona tauva mo le palota a le itumalo #15 a Tualautai, sa aofia ai le suafa o Saulo.

Fai mai Soliai, e le’i o’o atu i laua o lo o tagi i lenei mataupu, e fesiligia le aia tatau o Saulo e avea ai o ia ma sui tauva mo le palota, i aso faatulagaina, e pei ona ma’oti mai i tulafono palota.

O le masina o Oketopa ao loma le palota, o lo o taua e Wall, sa ia fesiligia ai Soliai e uiga i lenei mataupu.

O le aso 13 o Novema, 2012 na faila ai e Wall ma Bartley le la tagi i luma o le faamasinoga e faaleaoga ai  le avea o Saulo ma sui tauva, ae o le aso 15 o Novema na fa’ato’a maua ai e Soliai le kopi o lea tagi.

AGAVAA O SAULO E AVEA AI MA SUI TAUVA

I le isi vaega o le tagi a Wall ma Bartley, o lo o tuuaia ai Soliai i lona le fesiligia o Saulo i lona pepa fanau ina ia faamaonia ai le avea o ia ma sui tauva, e le gata foi i lea, o le gagana sa faaaoga i pepa palota mo le itumalo a Tualauta #15.

I le tali a Soliai sa ia taua ai e faapea, na tuuina atu e Sauloa lona pepa fanau e faamaonia ai lona agavaa e avea ma sui tauva mo le palota.

O lo o taua e Soliai i totonu o lana tagi, le le talafeagai o lenei tagi ma tulaga o tulafono tau palota.

Na siitia e Soliai le faaiuga a le Faamasinoga Apili i le mataupu a Pili v Tuipine, AP No. 14-06 (Slip Op. 12/11/2006, lea na teena ai e le Faamasinoga Apili le talosaga a se sui tauva na tulai ai le loia lea foi ua tulai mo le mataupu lenei, ina ua le ausia tulaga uma e tatau ona agavaa ai le failaina o le tagi.

FAAUPUGA O LE PALOTA

I le mataupu e faatatau i le gagana sa faaaoga i le pepa palota a le itumalo o Tualauta #15 na taua ai e Soliai e faapea, ua tuai le taimi e fesiligia ai lea vaega o le galuega.

Sa ia taua e faapea, i lalo o le vaega 6.0304 o tulafono tau palota, o lo o taua mai ai le i ai o le aia o sui o lo o tagi e iloilo ai pepa palota taitasi, peitai e lei mafai e i laua ona faatinoina lea vaega ao lumana’i ai le palota i le aso 6 Novema.

I le maea ai ona faamanino e Soliai o vaega uma o lana tali e faatatau i lenei mataupu, na ia talosagaina ai loa le Faamasinoga ina ia solofua le tagi ua faia faasaga ia te ia ma Saulo.