O le vaiaso nei na talosagaina ai e le afioga i le ali’i Senatoa ia Soliai Tuipine Fuimaono le Peresetene o le Senate, i se avanoa la te feutana’i ai ma le Fofoga Fetalai o le Maota o Sui, pe le talafeagai se asiga a le Fono Faitulafono mo le afioga i le ali’i kovana o lo o fa’ataotolia i Honolulu ona o gasegase o le tino.

Saunoa le afioga a Soliai e faapea, na tupu fo’i le tulaga fa’apea i taimi a’o tautua o ia i le Fono Faitulafono, ina ua faataotolia le afioga ia Galea’i Poumele i fafo a’o avea ma Lutena Kovana, sa masii ai le asiga a le Fono, ona o le ta’ita’i o le malo.

“O le maota lenei o tama o le atunuu, o lo o sasa’a ai le tofa ma le faautautaga loloto, i lo’u talitonuga, o se avanoa lelei lenei tatou te asia ai le afioga i le faaao o le malo, o lea ua leva ona faataotolia i fafo ona o lona gasegase,” o le saunoaga lea a Soliai.

O le taeao ananafi na toe lagaina ai e le afioga i le ali’i senatoa ia Mauga Tasi Asuega le mataupu lava lenei i luma o le maota maualuga.

Saunoa le afioga i le Maoputasi e faapea, talu ai ua leva tele ona faataotolia ai le alii kovana i fafo ona o lona gasegase, ua ia manatu ai e faataua le finagalo o le afioga i le alii senatoa ia Soliai.

Na taua e Mauga e faapea, ua ia maua tala o lo o fuafua se asiga a le Kapeneta mo le ali’i kovana, ae o le malaga a le va’alele i le po nanei, o le toe avanoa lea mo le fono pe afai o lo o i ai se fuafuaga e talia le fautuaga a Soliai.

“O tatou o tama o le atunuu, o le maota fo’i lenei e tua i ai le alii kovana ma le faigamalo, ou te tatalo atu, e tatau ona tatou vaavaai toto’a i le tulaga lenei,” o le saunoaga lea a Mauga.

O se tasi o auala na taua e Mauga e mafai ona faaaoga e le Fono e ui ai lana asiga, o le malaga lea o le Teutupe a le malo lea o lo o fuafua e malaga i le po nanei, ma se vaega o le asiga a le Fono pe afai e manatu i ai tama o le atunuu.

Na saunoa le alii peresetene ia Gaoteote Palaie Tofau e faapea, e ui o se mataupu taua lenei mataupu, ae ao fo’i ona silasila toto’a le maota i le taimi ua i ai, ona o lea ua maua tala, o le po nanei e toe taliu mai ai le alii kovana i le atunuu, e tusa ai o se la talanoaga ma le kovana le tumau ia Lemanu Peleti Mauga.

Ui o lea, o le taeao nei i le mae’a ai o le tauaofiaga a le maota maualuga e pei ona saunoa Gaoteote, o le a soalaupule ai loa le maota e tusa ai o le fautuaga a Soliai, mo se asiga e alu i le tofa i le tootoo ia Lolo Matalasi Moliga, lea o lo o i ai nei i Honolulu.

I se feiloaiga a tusitala ma le afioga Lemanu i le vaiaso na te’a nei, sa ia taua ai le te’a i tua o le ali’i kovana mai le falema’i i Honolulu lea na toe faia ai le isi ana siaki, ma le fa’amoemoe e tatau ona taliu mai i fanua i se taimi o le vaiaso nei.