Ads by Google Ads by Google

Talosaga Soliai i tagata palota ina ia palota uma

Ua talosagaina e le Komesina o le Ofisa o Palota, le susuga Soliai Tuipine Fuimaono, ia tagata palota uma ua maea ona lesitala o latou suafa, ina ia faatino la latou aia tatau e palota ai mo le sailia o se kovana ma le lutena kovana o le malo, pe a oo i le aso a taeao lea o le a sailia ai tofi tetele ia o le atunuu.

E ui e lata i le to’a 18,000 tagata palota sa lesitala i le tausaga palota lenei, e ova laititi ma le toa 13,000 na mafai ona palota, e tusa ai ma faamaumauga a le ofisa o palotaga.

O le tausinioga i le aso a taeao, o le a sailia ai se kovana sili ma se lutena kovana i le va o le paga a Lolo Matalasi Moliga/Lemanu Peleti Sialega Mauga, ma le paga a Faoa Aitofele Sunia/Taufetee John Faumuina.

I se faatalatalanoaga ma Soliai i luga o le telefoni, sa ia taua ai le faamoemoega a le latou Ofisa ina ia toatele tagata e o e palota, ina ia mafai ai ona filifili ni isi e fai ma taitai o le malo mo le isi 4 tausaga

Sa ia taua foi e faapea, e faamanuiaina se malo pe afai e faailoa uma leo o tagata mo le filifilia o so latou taitai, e ala i le faia o a latou palota, aemaise ai foi, o se tasi lea o itu taua i faiga malo faatemokarasi, ina ua palota uma tagata e sailia ai so latou taitai.

O le itula e 6:00 i le taeao a taeao lea ua faatulaga e tatalaina ai fale palota uma i le atunuu, ae tapunia i le itula e 6:00 i le afiafi.

PALOTA

Afai e tulaga lelei ai pea le tau, o le itula e 7:00 i le taeao nei lea ua faamoemoe e malaga atu ai le Segaula e momoli atu pusa palota i Manu’a, lea o le a malaga faatasi atu ai ma le au fai palota ma le faamoemoe, o i latou o lo o nofo fale o le a muamua faia a latou palota.

Fai mai Soliai, o le a taoto atu lava i le pailate pe muamua alu i Ta’u pe muamua Ofu, fuafua lava i le tulaga lelei o le tau.

O se taimi foi o le aso lea ua faamaonia mai e Soliai, o le a malaga atu ai le aufai palota i vaa, mo le faataunuuina o palota a i latou o lo o alala i le motu o Aunu’u, ma ua faamoemoe foi o le a lelei le tai i le taimi e faataunuuina ai lea faamoemoe.

Ua i ai le faamoemoe o fale palota i Aunuu ma Manu’a o le a vave tapuni i se taimi o le aoauli o le aso a taeao, ma momoli mai ai loa pusa palota mo le faitauina a’o le’i tapunia fale palota i Tutuila nei.

Ae mo fale palota uma i Tutuila nei, na saunoa Soliai, e leai lava se eseesega o galuega o le a faia i le aso a taeao, ma galuega sa faia i le palota.

Saunoa Soliai, o tagata palota uma i Tutuila nei, e tatau ona taunuu i fale palota i le te’a laititi o le itula e 6:00 i le taeao a taeao, ae o le faatinoina o palota a i latou o lo o gasegase i totonu o aiga, e tatau ona maea i le tapunia ai o galuega i le aso, o le taimi foi lea ua faamoemoe e tapunia ai palota a i latou o lo o alala i fafo.

I lalo o tulafono tau palota o lo o taua ai e faapea, e tatau ona i ai pea le tagata palota i le nofoaga o lo o faia ai le palota mo le umi e lima minute, mo le faia lea o lana palota, afai loa e maea ona faia lana palota, ona ia tuua lea o le fale palota, e le mafai ona toe ulufale atu o ia.

ISI MATAUPU TAU PALOTA

Ua talosagaina e Soliai le fesoasoani a pulenu, taitai o nuu faapea ai sui o paga o le a tauva ina ia tausisi ma usitaia tulafono o palota, ina ia mautinoa e le faalavelaveina le auala e ui atu ai tagata palota i le fale palota.

Fai mai Soliai, e le tatau ona toe faalavelave se isi lava tagata i le tagata palota, a’o agai atu mo le faia o lana palota.

E oo lava foi i faleie o le tapena ai taumafaga a komiti, e tatau ona 150 futu le mamao ese mai le fale palota, e le faatagaina foi ni musika leotetele poo nisi lava ituaiga mea faaleotele leo e latalata ma faalavelave i tafatafa o le fale palota.

Fai mai Soliai, ua maea ona fautuaina pulenuu uma o afioaga e uiga i lenei mataupu.

Ua maea foi ona tauaao atu e komiti a sui tauva lisi o a latou tagata e vaavaaia a latou palota, peitai ua ia toe fautuaina sui tauva, e na o i latou lava ua i ai o latou suafa i le lisi e faataga ona i ai i totonu o fale palota. E mafai foi ona toe faia suiga i le lisi ao lu mana’i ai le palota taeao.

I le tulaga o le faatauina atu o le ava malosi, e le faatagaina i lalo o tulafono tau palota ona toe faatauina atu se ava malosi mai se faleoloa, i le taimi e tatala ai fale palota, ma ua faamoemoe e galulue faatasi le matagaluega o Leoleo ma le Komiti o le Ava malosi mo le faamalosia o lea tulafono.

fa’aliliu Ausage Fausia