Ua taoto atu nei i se faaiuga a le Faamasinoga Maualuga le talosaga a le alii sa avea ma leoleo, lea o lo o loka i le toese i Tafuna, mo se avanoa e iloilo ai e le faamasinoga vaega o le tulafono e mafai ai ona tatala i tua e faigaluega, a’o tuli lona faasalaga faafalepuipui.

O Raymond Noa sa avea o ia ma Lutena i le Ofisa o Leoleo a le malo, a’o le’i ta’usalaina o ia i le moliaga o le faaoolima i le tulaga lua, e se vaega iloilo iuga, ona o le faalavelave lea na ia faaoolima ai i se alii luma o le fale kalapu o le Rubbles Tavern lea ua tapunia nei, ma faasala ai loa o ia e le faamasinoga e taofia i le toese mo le 5 tausaga, o se faasalaga e tuli sa’o le faasalaga.

Na tula’i lava Noa mo ia ina ua maea ona faia sa laua maliliega ma le alii loia sa tulai muamua mo ia ia David Vargas, ina ia le toe avea o ia ma ana loia fautua.

O vaega o le talosaga a Noa ua i luma o le faamasinoga e aofia ai le tulaga lea, o ia ua agavaa i lalo o le vaega o le tulafono lea e mafai ai ona tatala se pagota i tua e faigaluega, pe afai ua maea ona ia tuli ulua’i masina e 6 o lana faasalaga faafalepuipui.

Fai mai Noa, o le masina o Fepuari o le tausaga lenei na atoa i ai masina e 6 talu ona taofia o ia i le falepuipui, ma ua i ai lona talitonuga ua agavaa ona tatala o ia i tua e faigaluega.

Sa ia taua foi, soo se pagota lava e tuli sona faasalaga faafalepuipui i le toese e sili atu ma le tausaga le umi ae le ova atu ma le 28 masina, e agavaa o ia e alu i tua e faigaluega ma tuli lona faasalaga.

O le faafitauli e pei ona taua e Noa i le faamasinoga o loo mafua ai ona le mafai ona alu i tua e faigaluega, ona o loo i ai foi le isi vaega o le tulafono e talitonu le Pule o le Falepuipui i Tafuna e le agavaa i ai o ia, ona o pagota uma lava e ova atu ma le tai 28 masina le uumi o a latou faasalaga faafalepuipui o loo tuli, e le agavaa i latou ona tatala i tua e faigaluega pe a tuana’i ona tuli uluai 6 masina o le faasalaga, ae sei vagana ua maea ona tuli le tasi o vaega tolu o lona faasalaga.

Fai mai le finau a Noa, e le o aafia ai o ia i le vaega o le tulafono lea o loo finau mai le pule o le falepuipui, ona o lana faasalaga o loo tuli e 5 tausaga ae le 7.

Na finau foi Noa e faapea, afai foi e apalai le vaega o le tulafono lea e finau mai ai le pule o le toese, o lona uiga e uma ane ona tuli le tasi o vaega tolu o lana faasalaga poo le 20 foi masina, ua agavaa o ia i le palola, ma ua le talafeagai ai lana talosaga e tatala o ia i tua e faigaluega.

I le aotelega o le talosaga a Noa, sa ia faaoloolo maau ai i le faamasinoga mo se avanoa e tuuina mai ai sana faaiuga e uiga i vaega o le tulafono e pei ona ia finauina, ma ia talia lana talosaga mo se avanoa e alu ai i tua e faigaluega.

Na taua e le loia a le malo o Mitzie Folau e faapea, o le talosaga a Noa sa tatau ona folasia i le pule o le falepuipui poo le komesina foi o leoleo, ona e le o toe i ai se malosi o le faamasinoga e iloiloina ai lana talosaga, ona o lana faasalaga tuli sa’o e 5 tausaga lea ua taoto atu i lalo o le faatautaiga a le Pulega o le falepuipui.

Na faailoa e le faamasino sili ia Michael Kruse ia Noa e faapea, talu ai o lona faasalaga o loo tuli sa’o, lona uiga o le vaega faamalosi tulafono poo le faigamalo e agavaa ona taoto atu i ai sana talosaga mo sa latou tuutuuga.

Na fai Kruse ia Noa, na pau le tiute o le faamasinoga e fai o le tuuina atu lea o faaiuga e uiga i mataupu e finauina i le faamasinoga, ae le tuuina atu ni fautuaga faaloia ia i latou o loo molia.

Na faamalamalama foi e le alii faamasino ia Noa e faapea, ana faapea o lana faasalaga faa falepuipui o se tasi lea o tuutuuga o lana faanofovaavaaia, e iloilo la e le faamasinoga lana mataupu lea, ae talu ai o lana faasalaga o loo tuli sa’o le 5 tausaga, o lana talosaga apili la e tatau ona tuuina atu i le vaega faamalosi tulafono poo le faigamalo latou te iloiloina.

O loo taofia pea i le toese i Tafuna Noa mo le tuliina o lana faasalaga faafalepuipui, e faatali ai se faaiuga a le faamasinoga e uiga i lana mataupu.