Ua i luma nei o le kovana ma ni isi o ta’ita’i o le malo, se tusi mai i le Peresetene o le Asosi o Faiaoga, le susuga Ben Te’o, ua talosagaina ai le toe faatulagaina o totogi ua talafeagai mo Faiaoga, Faufautua faapea Pule o Aoga.

Na fa’aalia e Te’o i se ata faatusatusa, le tatau ona maua e le faiaoga totogi, e fuafua i ona agavaa.

O se faataitaiga na taua e Te’o i lana tusi, o se faiaoga ua na ausia le faailoga o le “AA” po o le lua tausaga i le Kolisi i Malaeimi, e tatau ona $15,000, ae o faiaoga ua ausia faailoga tikeri mo le 4 tausaga, e tatau ona amata atu i le $22,000 o latou totogi ma faasolo atu ai i le $30,000 pe afai ua ausia isi laasaga talafeagai mo le galuega faa faiaoga.

Mo faiaoga ua maua faailoga o le MA / MS / MEd, e tatau ona $35,000 o latou totogi, ao faiaoga ua maua faailoga o le PHD / Ed. D Degree e tatau ona $38,000 o latou totogi.

Mo Faufautua ua maua faailoga o le MA / MS / MEd o lo o galulue i Aoga Tulaga Muamua, e tatau ona $35,000 o latou totogi, ae $37,000 mo Faufautua o lo o galulue i Aoga Maualuluga.

Mo Puleaoga Lagolago ua umia faailoga o le MA / MS / MEd o lo o galulue i Aoga Tulaga Muamua, e tatau ona $38,000 o latou totogi, ae $40,000 mo Puleaoga Lagolago o Aoga Maualuluga.

Ae mo Puleaoga ua umia faailoga o le MA / MS / MEd o lo o galulue i Aoga Tulaga Muamua, e tatau ona $43,000 o latou totogi, ae $45,000 mo Puleaoga o Aoga Maualuluga.

Na taua e Te’o i lana tusi e faapea, i tausaga e 7 talu ona galue i le Matagaluega o Aoga a le malo, o lo o ia maitauina pea le faafituali o lo o feagai ma le matagaluega, i le o mai lea o i latou o lo o i ai le agavaa i lenei galuega ma toe fo’i, ona e le o lava le maualuluga o totogi e mafai ai ona taofi i latou i le galuega.

Saunoa Te’o, e manaomia le i ai o ni faiaoga, faufautua ma taitai lelei e aoaoina tupulaga talavou, ina ia avea i latou ma taitai lelei o le atunuu i le lumana’i.

Ina ua fesiligia e le Samoa News le susuga Te’o i le aoauli ananafi, sa ia taua ai e faapea, e ui ua toatele tama fanau a le atunuu ua ausia tulaga maualuluga i aoaoga faa faiaoga, ae i le taimi lava fo’i e tasi, e le mafai e le matagaluega o aoga ona taofi i latou e faaauau la latou tautua i totonu o potu aoga, ona e le o lava totogi e maua e i latou nei.

“O lo o alu tupe a le malo e faatino ai polokalame e pei o le Cohort lea o lo o faia i tausaga taitasi ina ia aoaoina ai faiaoga e faalautele lo latou tomai ma le agavaa i le galuega, peitai o le faafitauli, e le i ai se auala e mafai ai ona faatulaga ni totogi lelei mo i latou ina ia mafai ai ona unaia i latou e avea pea ma faiaoga mo le olaga atoa, o ni isi o faiaoga ua galulue i isi galuega i totonu o le malo o lo o talafeagai totogi e maua ai,” o le saunoaga lea a Te’o.

E talitonu Te’o, o le lelei o le totogi e maua e le faiaoga, o le naunau fo’i lena o le faiaoga e faalelei atili lana auaunaga i totonu o le potu aoga, mo le manuia o alo ma fanau a le atunuu.

O kopi o le tusi a Te’o sa tuuina atu i le kovana ma le lutena kovana, peresetene o le senate ia Gaoteote Palaie Tofau ma le fofoga fetalai ia Savali Talavou Ale, o le faatonusili o Aoga ia Vaitinasa Dr. Salu Hunkin-Finau; Faatonusili o Tagata Faigaluega a le malo ia Le’i Sonny Thompson; o le Kovana Falelima i Sasa’e ia Alo Dr. P. Stevenson, o le alii senatoa ia Tuiasina Siolosega Esera ma faipule e toatolu e aofia ai Larry Sanitoa, Vui Florence Vaili Saulo, Taotasi A. Soliai ma Timusa Lam Yuen.