Ads by Google Ads by Google

TALOSAGA PAGOTA E FAI 'ESE'ESE A LATOU FA'AMASINOGA

O ali'i e to'atolu ia o lo o tu'ua'ia i lo latou fasi fa'amo’amo’aina o le ali'i o Sio Faumui i le tausaga na te'a nei ma maliu ai, ua i luma o le fa'amasinoga maualuga sa latou talosaga ina ia fa'a'ese'ese taimi ma aso o a latou fa'amasinoga.

O le 'au ula lea o lo o tu'uaia i le mata'upu lenei e aofia ai Raponi Siaulaiga, Migo Misa ma Ne'emaia Poamo, ma o lo o taofia pea i latou i le falepuipui ina ua le mafai ona o latou totogiina tai $100,000 sa fa'atulaga e tatala ai i latou i tua.

O lo'o tu'ua'ia uma i latou i le moliaga mamafa o le fasioti tagata i le tulaga lua, ona o le fa'alavelave na mafua ai ona maliu Faumui i le vaveao o le aso 4 Iuni 2011 i Malaeimi, ma o lea solitulafono e mafai ona fa'asala ai se tasi i le to'ese mo le olaga atoa, po o le 10-30 tausaga le umi.

Ua i luma o le fa'amasinoga le talosaga a le malo ina ia fai fa'atasi le fa'amasinoga 'autu o le 'au ula lea, ona e talitonu le malo e tasi lava le gaoioiga na afua mai ai le fa'alavelave lea na maliu ai Faumui, peita'i o lo o tete'e i ai loia a itu tete’e

Fai mai le loia a Siaulaiga ia David Vargas, e le tatau ona tu'u fa'atasi le iloiloina o mata'upu nei e tolu, ona e i ai itu e fete'ena’i ai, ae maise lava o le mafai lea ona maua e le ua molia o le avanoa na te fesiligia ai isi ali'i e to'alua o lo o tu'ua'ia fa'atasi i latou, mo ni a la'ua molimau e faia fa'asaga ia te ia.

O le talitonuga foi lea a le ali'i loia o Mike White lea o lo o tula'i mo Misa ma le tama'ita'i loia ia Leslie Cardin lea o lo o tula'i mo Poamo.

Fai mai loia a i latou nei, e atagia mai i fa'amaumauga a le fa'amasinoga o lo o tau tu'uai e le isi le tasi e tusa ai o le fa'alavelave na tula'i mai, ma afai e fai fa'atasi a latou iloiloga, o le a faigata ona iloa tonu gaoioiga sa faia e le tagata e to'atasi.

Fai mai Vargas, afai ae fai fa'atasi le fa'amasinoga, o le a a'afia ai fo'i ma aia tatau fa'aletulafono o Siaulaiga, lea e alaga tatau ai ona tu'uina atu sona fa'amasinoga amiotonu i luma o tagata nu'u o Amerika Samoa, ma e le gata ia Siaulaiga ae fa'apena foi i isi e to'alua o lo o molia fa'atasi i latou.

Ua tu'uina atu nei i lalo o se fa'aiuga a le fa'amasinoga fa'afinauga a itu e lua o lenei mata'upu, ma ua i ai le fa'amoemoe e tatau ona maua mai se aso e tu'u aloaia mai ai se fa'aiuga a le fa'amasinoga, ma fa'atulaga ai loa taimi ma aso e faia ai fa'amasinoga a i latou nei.

Fai mai fa'amaumauga a le fa'amasinoga, e le gata na fa'aaoga ma’a e tu’i ai foliga o le ali'i na maliu, ae na fa'aaoga fo'i se atigi fagu e ta ai ona foliga, ao ta'atia o ia i lalo.