E ui o lea ua pasia e le Fono Faitulafono i le faitauga faalua i le taeao ananafi suiga mo le Paketi e 6 masina a le Faalapotopotoga o le Eletise ma le Suavai (ASPA), e le o avea lea ma itu e taofia ai le faaauauina pea lea o le latou fuafuaga  ua uma ona tasi i ai le tofa saili a maota e lua, ina ia faaulu se tagi a le Fono i luma o le Faamasinoga, e fesiligia ai poo ai o loo i ai le pule mo le faia o le faaiuga mulimuli o le Paketi a le ASPA.

I le maea ai o se iloiloga tuu faatasi a komiti o le Paketi a maota e lua i le taeao ananafi, lea pasia ai suiga o le paketi a le ASPA mo le 6 masina,  na fesiligia ai loa e le afioga i le alii Senatoa ia Lualemaga Faoa le alii peresetene o le Senate ia Gaoteote P. Tofau, pe  faaauau pea le tagi a le Fono lea ua fuafua e faila i le Faamasinoga, pe o le a taofi ona o lea ua pasia e le Fono le paketi al e ASPA.

Saunoa Gaoteote, e ui o lea ua pasia e le Fono suiga mo le paketi a le ASPA, ae  le taofia ai le faaiuga ua tasi i ai le  fingalo o le Fono, lea foi  ua maea ona tuu mai i ai ma se fautuaga mai le loia a le Fono, ina ia faaauau pea le tagi.

Na taua e Gaoteote, e i ai isi mataupu e manaomia le faamanino i le va feagai o le ASPA ma le Fono, o le mafuaaga lea e taua ai le  fautuaga ina ia faaauau pea le tagi.

“E le o pasia e le Fono le paketi a le ASPA ona o le mamatu alofa i le ASPA, ae mafua ona pasia  ona o le manatu alofa i le atunuu, ae o le tulaga i le tagi a le Fono, e leai se mea o le a taofia ai fua, ae faaauau pea,” o le saunoaga lea a le alii peresetene na vaaia ai le tau fai luelue o ao o nisi o Senatoa ma Faipule e faailoa ai lo latou lagolagoina o lea saunoaga mai le alii peresetene.

“O lo’u manatu fo’i lena, e leai se mea o le a taofi ai fua le tatou tagi, faaauau pea le fuafuaga i le tagi a le Fono faasaga i le ASPA,” o le tali fuaitau atu lea a le afioga Lualemana i le saunoaga a le alii peresetene.

O le vaiaso nei na faaulu ai i luma o le fono se pili tupe e faasoasoa atu ai le aofaiga e $45,393,250.00 e faatupe ai le paketi a le ASPA mo masina e 6 o loo lumanai nei, lea e faamuta i le aso 31 Iulai, peitai i le mae’a ai ona iloilo e le fono o nisi o ana faamaumauga, sa latou faia ai loa ni suiga i le pili tupe lea, ma tulai mai ai le aofai e $60,373,010 e faatupe ai galuega a le ASPA mo le 6 masina.

O lona uiga, o le paketi a le ASPA mo le tausaga tupe lenei 2012 lea sa $90 miliona, ua suia nei i le $109,488,500.00 miliona, o lea aofaiga e mafua mai ina ua faaopoopo i ai i totonu ma se vaega tupe fesoasoani mai le Feterale lea ua faamatuu mai mo le ASPA, lea e silia ma le $10 miliona.

E $46,487,217.00 ua fuafua le fono e tuu atu e faatupe ai le tautua o le Eletise, $6,037,301 mo le Suavai Taumafai, $6,037,301 mo le Suavai Lafoai, ma le $1,811,191 mo le lapisi.

O loo taua foi e le Fono i lana  fuafuaga e pei ona faamoemoe e faitau faatolu i le taeao nei, afai e vaevae le paketi atoa a le ASPA e $109.488 mo masina e 12, o lona uiga e tatau ona $9,124.042 miliona le tupe e faaaoga e le ASPA mo le masina e tasi.

O loo i ai le faamoemoe o le Fono e tatau ona pasia e maota e lua le pili tupe lenei ae lei maea le aso 31 o Ianuari, o le aso Lua lea o le vaiaso fou, ina ia mafai ai ona tuuina atu i le kovana mo le sainia ma aloaia loa.

Peitai e ui o lea o loo galulue pea le Fono i le taumafaiga o le paketi al e ASPA, o loo tumau pea le talitonuga a le ASPA o le  latou paketi mo  le tausaga tupe lenei 2012 lea sa tuuina atu i le ofisa  o le Paketi a le malo i le masina o Setema na tea nei, o le paketi lea o loo latou faaaogaina i le taimi nei.