Ads by Google Ads by Google

Talosaga Lolo i le Initeria mo ni Su’etusi suea tusi malo

Ua tuuina atu e le Kovana Sili filifilia o le atunuu ia Lolo Matalasi Moliga sana tusi i le Failautusi o le Initeria, mo ni Su’etusi latou te iloiloina faamaumauga o tala o tupe a le malo, faapea se fesootaiga ma le Failautusi mo se taumafaiga e tolopo le faia e le malo o ni faatauga tetele o lo o fuafua e fai, ae taoto pea faaiuga ia se’i nofoia le nofoaiga foui.

O lea mataupu na faalauiloa e Lolo i se fonotaga a le latou komiti i le Aso Lulu na te’a nei, o sana tali atu foi lea i se fesili na faatula’i e se tasi o totino o le komiti, lea na ia fesiligia tulaga o le faaaogaina e le malo o tupe.

Na fesiligia e le tootoo lea se malosiaga ia Lolo ma Lemanu Peleti Mauga la te fauina ai se tulafono, e taofia ai le malo mai lo latou toe faaaogaina o tupe i nisi lava gaioiga, sei vagana ai lava le totogi a le malo.

“O le mea moni e leai se malosi faaletulafono o ia maua ma Lemanu ma te faia ai ni auala faapena, ae mo lo outou silafia, ua uma ona ave la’u tusi i le Failautusi o le Initeria e talosagaina ai ni Su’etusi e suea tusi a le malo, aua o lo’u talitonuga e tatau ona su’e tusi a le malo,” o le saunoaga lea a Lolo.

Na faamanino e Lolo i lana komiti, faatoa maua e le latou itu le malosi faaletulafono e faatino ai fuafuaga uma e pei ona atugalu i ai ni isi o totino o le komiti, pe afai ae aulia le itula e 12:00 i le aoauli o le aso 3 Ianuari 2013.

Na faailoa e Lolo i le komiti e faapea, ua tele mea ua tutupu mai i le malo e aunoa ma le faailoa atu e le kovana ia te i laua ma Lemanu, o le ala foi lea ua la faia ai ma Lemanu se gaioiga ina ia maua ai sa latou fesootaiga ma le kovana, mo le faamaninoina mai o tulaga i mea ua tutupu mai.

“E i ai faaiuga o le la ua fai ae o le ma talitonuga e le tatau ona faia, o faaiuga na e tatau ona taofi sei oo atu le nofoaiga fou i totonu, peitai ua fai lava e aunoa ma se fesootai mai, ia, se’i tatou oo fo’i tatou i totonu ona su’e lea o ni avanoa e taofi ai mea ia pe afai tatou te iloa e le o ni mea e tatau ona fai, ae fai e tatou mea lelei ma faaiuga sili mo le manuia o le atunuu,” o le saunoaga lea a Lolo.

E le’i faailoa e Lolo i luma o le komiti mea ua fuafua le malo e faatau, peitai i se faatalatalanoaga ma se sui o le Samoa News i le vaiaso nei lava, sa ia faailoa ai taumafaiga a le faigamalo e faatau mai se va’a mo Manu’a.

O le va’a lea na ulua’i faalauiloa e kovana Togiola i luga o se tasi o ana polokalame, ina ua fesiligia e le atunuu sona finagalo i ni auala e faaleleia ai femalagaaiga i le va o Tutuila ma Manu’a.

O se tasi o itu na faamamafa i ai le saunoaga a le kovana filifilia, o le mulimulita’i lea i tulafono ma fai mea mea sa’o, aemaise lava i tulaga o tupe a le malo.

Ina ua faailoa atu e le kovana ia Lolo e leai se tupe mo le faauuga i totonu o le paketi a le malo, e leai foi se tupe e totogi ai le Komiti o Suiga ua tofia i le taimi nei, sa ia taua ai e faapea, o le mea lea sa masani ona fai e le malo, o le sele mai o tupe mai isi vaega e fai ai mea latou te manana’o i ai, ae o le mea lea sa latou tauto ai i le atunuu ina ua amata faalauiloa mai le latou faamoemoe latou te le faia, o le faaaoga o tupe e le tusa ma le tulafono.

Na taua e Lolo e faapea, tusa lava pe leai se tupe e faatupe ai le faauuga, e le afaina lea tulaga, i lona talitonuga, e sili lava le saili lelei o se tupe e faatino ai le faamoemoe, ae le o le aumai i auala e le tusa ai ma le tulafono.

“O lea e fautua mai le aualii (kovana ma le faigamalo) e aumai e tatou se tupe mai isi vaega tupe a le malo e faatino ai fuafuaga nei, ae i lou talitonuga e le o se mea talafeagai lea ma le tulafono o tupe, o tatou na ofo i le atunuu tatou te faia suiga fou, o suiga fou la ia o le a tatou faia, e le oo atu o tatou lima i ni tupe e lei faatulafonoina, aua a oo i ai o tatou lima ona tutusa lea o tatou ma isi nofoaiga ua uma atu,” o le saunoaga lea a Lolo.

O lana faamalosiga i lana komiti e faapea, afai e manuia taumafaiga mo le tau sailiina mai o se tupe e fai ai le faauuga, o le a mafai lava ona faataunuu lea faamoemoe taua e aunoa ma le fesiligia.

 O le aso Gafua o le vaiaso fou lea ua faamoemoe e toe taliu mai ai i fanua le faigamalaga a le afioga i le kovana sili, le matua ia Togiola T.A Tulafono, ma fuafua ai loa sa latou feiloaiga ma Lolo ma Lemanu faatasi ma le kapeneta i le aso Lua e sosoo ai.

O lea feiloaiga e pei ona saunoa Lolo, o le a la faailoa i ai ma Lemanu a la fuafuaga ua faataoto, a’o lumana’i ai le aga’i atu o komiti o suiga i totonu o ofisa o le malo mo le faatinoina o a latou galuega.