Ads by Google Ads by Google

Talosaga Komiti Faafoe LBJ taoto atu ia i latou mataupu EMS

Ua talosagaina e le Komiti Faafoe a le Falema’i o le LBJ le afioga i le kovana sili ia Lolo Matalasi Moliga, ina ia faaseetuagalu ese lona Sa, ae taoto atu pea le taulimaina o le mataupu a le alii pule o le EMS ia Galumalemana Fuapopo Avegalio, ona o lo o i ai ni isi o faiga faavae ma tulafono e ao ona faamalieina muamua, ao le’i faia sa latou faaiuga e tusa ai o lenei mataupu.

 

O le tusi a le Komiti Faafoe a le LBJ i le alii kovana i le Aso Lua na te’a nei, o sa latou tali lea i le faatonuga a le kovana i le Komiti Faafoe ina ia toe faafo’i Galumalemana i lona tulaga sa i ai.

 

Na faailoa e le Komiti Faafoe ia Lolo i le latou tusi e faapea, o lo o i ai le aia tatau ia Galumalemana na te apili ai le faaiuga a le pulega a le falema’i e faamalolo ai o ia mai lana galuega, e ala i le faia o se iloiloga i luma o le Komiti Faafoe, ma faaauau atu ai i le Faamasinoga.

 

“O lea iloiloga o le a mafai ai ona matou maua se ata atoa e faatatau i lenei mataupu, ma tuu atu ai le avanoa ia Galumalemana e faamanino mai ai tulaga uma o lo o nofo ma ia, atoa ai foi ma le avanoa e faamanino mai ai e le falemai la latou itu,” o se vaega lea o le tusi a le Komiti Faafoe i le kovana.

 

Na faailoa e le Komiti Faafoe ia Lolo e faapea, o lana tusi sa tuuina atu ia i latou i le aso 7 Fepuari 2013, na faatoa latou mauaina i le aso 11 Fepuari.

 

“Matou te faaaloalo i lou aia e te faalavelave ai i mataupu e patino i le falema’i, peitai, ua matou i ai nei i se tulaga le mautonu, po o lo matou faamalosia lea o ta’iala ma faiga faavae e pei ona faatautaia ai galuega a le Falema’i, poo le taumafai lea e faatuatuana’i o matou tiute na tofia ai i matou o le Komiti Faafoe a le falema’i e ala i le toe faa faigaluegaina o Galumalemana, e aunoa ma le mulimulita’i i ta’iala ma faiga faavae o lo o faatautaia ai a matou galuega,” o se vaega lea o le tusi a le Komiti Faafoe ia Lolo.

 

O le mataupu lenei na alia’e mai ina ua faia se faaiuga a le Pulesili o le Falema’i a le LBJ i le vaiaso na te’a nei e faamalolo Galumalemana mai lona tofiga o le pule o le EMS.

 

O le tusi a le Komiti Faafoe a le falema’i o lo o saini ai suafa uma e toalima o le komiti, e aofia ai le taitaifono ia Toloitaufa Sandra King-Young; Dr. Tofaeono Victor Williams; Leiataua Leauga Turner; Mase Akapo Mase ma le afioga i le alii faipule ia Faimealelei Anthony Allen.

 

O le po anapo na malaga atu ai le alii kovana i ni isi o fonotaga a taitai o setete ma teritori a le malo tele, lea e faia i Hawaii ma le laumua i Uosigitone i le vaiaso fou, ma toe taliu mai ai i le ogatotonu o le masina o Mati.