Ads by Google Ads by Google

Talosaga IR i le Fa’amasinoga toe iloilo lana faaiuga

Ua i ai le fuafuaga a le alii loia o lo o avea ma fautua mo le kamupani a le International Roofing (IR), o le a ia tuuina atu se talosaga i le  Fa’amasinoga Maualuga, ina ia toe iloilo lana faaiuga i le tagi sa faaulu e le kamupani faasaga i le malo o Amerika Samoa, i lo latou le tausisia lea o tuutuuga o se konekarate sa latou sainia i ni tausaga ua mavae, mo le toe faaleleia o le maota o le Fono Faitulafono.

 

Na taua e le susuga ia Matailupevao Leupolu Jr i le Samoa News e faapea, o le a ia tuuina atu se talosaga i le fa’amasinoga e toe iloilo ai lana faaiuga na tuuina mai i le vaiaso na te’a nei.

 

O le aso Lulu na te’a nei na tuuina mai ai le faaiuga a le Vaega Iloilo o le Faamasinoga Maualuga, ma taua ai le aofaiga e $180,225 ua ova ai le tupe ua totogi atu e le malo o Amerika Samoa i le kamupani a le IR, e ui o lea sa tagi le IR i le faamasinoga e le’i maea ona totogi atu e le malo le tupe o le konekarate e pei ona latou malilie i ai.

 

OTOOTOGA O LE MATAUPU

 

O le susuga Talia Toa mai le kamupani a le IR na ia faaulu se tagi faasaga i le malo i lo latou le tausisia lea o aiaiga o le konekarate sa latou sainia i le tele o  tausaga ua fano mo le toe faafouina o vaega o le maota o le Fono Faitulafono.

 

Peitai i le tali a le malo, sa latou finau ai e faapea, ua ova atu tupe sa latou totogi nai lo tupe sa tatau ona latou totogiina, ma o le faamasinoga autu o lenei mataupu sa faia i aso e lua o Aperila ma le aso e tasi o Me o le tausaga lenei.

 

I faamaumauga a le faamasinoga o lo o taua ai e faapea, o Novema 1994 na sainia ai e itu e lua le ulua’i konekarate mo le lipeaina o le fale fono, i le aofa’i e $78,000.

 

A’o faagasolo le galuega mo le toe faaleleia o le faalo o le fale fono, sa maitauina ai nisi o vaega ua faaletonu e moomia le faaleleia, e aofia ai ma le Fale Samoa.

 

I le maea ai ona malilie o itu uma e lua i le tatau lea ona faaleleia uma vaega o le fale o lo o faaletonu, na faataga ai loa e sui e toatolu o le malo o Amerika Samoa suiga e 9 i le galuega e pei ona tuuina atu e le itu tagi ia Mati 1995 ma Aokuso 22, 1996, ma o ia suiga i le konekarate na tula’i mai ai loa le tau atoa o le galuega i le $987,183.

 

O Tesema 1996 na tuu atu ai e le IR la latou (invoice) mulimuli mo vaega o le galuega ua maea ona faaleleia, i le tau e $900,345.60, peitai, e na o le $603,000 sa totogi atu e le malo.

 

O le faaopoopoga mulimuli e $198,500 i le galuega o le galuega na faaopoopo i le paleni e lei totogiina atu e le malo i le IR, na tula’i mai ai loa le tupe atoa e le’i totogiina e le malo i le IR e $495,845.60.

 

I faamaumauga a le faamasinoga na taua ai e faapea, sa faaauau pea ona totogi e le malo tupe mo le konekarate, lea e aofia ai ma le tupe mulimuli na totogi ia Fepuari 2001, ma o iina na iloa ai loa e le malo, ua ova le tupe ua latou totogiina atu i le IR.

 

Ae ina ua taofi e le malo le totogiina atu o lea tupe, na finau mai ai loa le IR, e na o le $387,000 mai le $495,845.60 sa totoe.

 

Na taua e le itu tagi i le latou faafinauga e faapea, e 6 tausaga o latou taumafai e ao mai le tupe o lo o nofo aitalafu ai le malo ia i latou, talu mai le 1999, ae i le aso 15 Tesema 2005, na tusi ai le loia a le itu tagi i le Peresetene o le Senate sa i ai i lena vaitaimi, le afioga Lolo Moliga, ma talosagaina ai le tatau lea ona totogi atoa atu le tupe o lo o totoe mo le galuega.

 

E le’i tete’e Moliga i le faafinauga a le itu tagi mo le totogiina atu o le $117,120.50 o lo o totoe, ae sa ia faatonuina le itu tagi ina ia fesiligia le Ofisa o Tupe a le malo mo le totogiina atu o le tupe o lo o totoe.

 

Na tusi le loia a le itu tagi i le Loia Sili peitai e leai se isi tupe na toe maua mai ai, ma faia ai loa le faaiuga ina ia tuuina atu le mataupu i le faamasinoga e faamalosia mai ai le totogiina o le konekarate.

 

I le maea ai on iloilo e le faamasinoga o mau uma o lenei mataupu, na talitonu ai le faamasinoga, ua lava mau ua i o latou luma e faamaonia ai na ova le tupe sa totogi e le malo i le itu tagi mo le konekarate.

 

O le mau faamaonia numera 5 (Exhibit #5) e pei ona taua e le faamasinoga i lana faaiuga, o iina o lo o manino mai ai, e $180,225 na ova ai le tupe na totogi atu e le malo i le itu tagi.

 

E talitonu le faamasinoga, e $1,365,888 na totogi atu e le malo i le IR mo le konerate sa sainia, lea ua atagia mai ai le $180,225 ua ova ai le tupe ua totogi atu i le IR.