Ua talosagaina e le alii Faipule i Uosigitone ia Faleomavaega Eni le Faigamalo a le alii kovana o Lolo Moliga ma le Fono Faitulafono, ina ia fausia se tulafono mo se lafoga e faatatau i oloa sikaleti o lo o faaulufale faasolitulafono mai i totonu o le atunuu, ina ia taofia ai le le maua e le malo o le silia i le $700,000 i le tausaga, o tupe e maua mai i le sikaleti.

O se tusi a Faleomavaega na tuuina mai ia Lolo ma taitai o le fono e faatatau i lenei mataupu, na faia lea ina ua toe faaulu i luma o le Konekeresi le Pili Taufaaofi a le maota o sui (HR. 338), e faasa ai le faaulufale faasolitulafono o sikaleti i totonu o teritori a le malo tele.

Fai mai Faleomavaega, o le tulafono lenei o le a tuu ai ma Amerika Samoa i totonu, e avea ai ma solitulafono i tagata faipisinisi i le atunuu lo latou aumaia ma le iloa o sikaleti i le teritori, ma latou faatau atu i faleoloa le silia i le 10,000 o pepa sikaleti e le o i ai ni faailoga e iloa ai o ni oloa ua maea ona faalafoga.

“O le solia e se tasi o lenei tulafono e ono faasala ai i se salatupe pe faafalepuipui foi i le umi e le silia i le 5 tausaga, ae o sikaleti na aumai faasolitulafono o le a aveesea e le malo,” o se vaega lea o le tusi a Faleomavaega ia Lolo ma le Fono.

O le tausaga na tea nei na faaulu ai e Faleomavaega i luma o le maota o sui lenei tulafono ma latou pasia ai, ma tuuina atu ai loa lea i luma o le Senate mo sa latou faaiuga, ma taoto ai lava seia oo ina tapunia le tauaofiaga mulimuli a le konekeresi i le faaiuga o le tausaga na tea nei.

I le tusi a Faleomavaega i le masina o Novema o le tausaga na te’a nei ina ua faalauiloa le pasia o lenei tulafono e le maota o sui, atoa ai ma lana tusi ia Lolo ma le Fono i le tausaga nei, o lo o taua ai e le alii faipule se vaega o le ripoti a le Ofisa Suetusi a le Teritori (TAO) ia Me 2011, o lo o taua ai le tele o se vaega tupe e lei mafai e le malo o Amerika Samoa ona maua, e mafua mai ona o sikaleti o lo o aumai faasolitulafono i le teritori.

Ae i se suesuega sa faia e le vaega o le American  Samoa Community Cancer Network i le 2011 e faatatau i le polokalame e faalafoga ai sikaleti mai fafo, na maua ai le tusa ma le 5.8 miliona sikaleti na aumai faasolitulafono i totonu o Amerika Samoa i le 2010, ma le mafai ai e le malo ona maua le tupe e $724,000.

I se ripoti na lomia e le Samoa News e faatatau i le ripoti a le TAO, o lo o taua ai le ioeina e le alii o Bryan Jackson o le fautuaga a le TAO.

Ina ua pasia e le maota o sui a le konekeresi lenei tulafono, na fesiligia ai e le Samoa News Jackson i sona finagalo e faatatau i lenei mataupu, ma ia taua ai e faapea, e leai se sootaga o le tulafono a le feterale ma le aumaia faanana o sikaleti i le teritori, sei vagana ua i ai se tulafono a le teritori lava ia e faatatau i lafoga e faaee i luga o sikaleti.

O le taimi nei, o lo o faamalosia e le Ofisa o Femalagaaiga ma le Tiute a le malo tele le tulafono a le feterale, i le aumaia faasolitulafono o sikaleti i teritori ma setete o le malo tele.

fa’aliliu Ausage Fausia