mai fafo ...

Ua talosagaina e ni isi o le aufai fa’atoaga le afioga i le kovana ia Lolo Matalasi Moliga ma lana faigamalo, ina ia silasila i se auala e fa’aopoopo ai le lafoga o lo o totogi mo so o se oloa tau fa’atoaga o lo o ulufale mai i le atunu’u, ma maua atu ai ma se isi fesoasoani tau tupe mo le aufai fa’atoaga.

O le fonotaga sa valaauina e le alii kovana ma le aufai fa’atoaga i le aso Faraile na te’a nei, na fa’aleoina ai e ni isi o le aufai fa’atoaga lenei mataupu, ona o le manatu o le isi lea auala e le gata e taofiofi ai le toe soona fa’aulufale mai o fua o fa’atoaga mai fafo, ae o se itu taua fo’i e mafai ai ona maua se isi fesoasoani tau tupe mo le aufai fa’atoaga.

Mo se fa’ataitaiga e pei ona saunoa le tina fai fa’atoaga ia Taimane Johnson e fa’apea, mai le tele o tausaga ua mavae, o lo o tumau pea i le 5% le maualuga o le lafoga o lo o totogi mo fua o fa’aeleeleaga mai fafo, o le lafoga fo’i lea, ua tele tausaga o taumafai pea le aufai fa’atoaga e talosaga i le malo ina ia si’i i luga ae o lo o tumau pea i le 5%.

“Matou te talosaga atu i lau afioga i le ali’i kovana, i se avanoa e toe fa’aopoopo ai le lafoga mo fua o fa’aeleeleaga mai fafo i le 20% pe sili atu fo’i, o le agaga o lenei talosaga, ina ia taofiofi ai le toe soona aumaia o fua o fa’atoaga mai fafo i totonu o le teritori, ae maua ai ma le avanoa e fa’atau atu ai fua o fa’aeleeleaga a le aufai fa’atoaga i faleoloa ma pisinisi ta’itasi i Amerika Samoa”, o le saunoaga lea a Taimane.

Afai fo’i e sii le lafoga e pei ona talosaga, o se avanoa lelei fo’i lea e mafai ai e le malo ona tu’u atu lea vaega tupe e fesoasoani ai i le aufai fa’atoaga.

Na lagolagoina e le susuga a Mapu Fereti, o se fai fa’atoaga a le atunu’u, le finagalo o Taimane.

O le fa’afitauli lea ua maitauina i le tele o fa’aoloa i totonu o le atunu’u e pei ona saunoa Mapu, toeititi lava o faleoloa uma i le atunuu e te maua i ai le tele o fua o fa’aeleeleaga o lo o la’u mai i maketi ma ataunu’u eseese i fafo.

“E mafua ona taugata lafoga o lo o totogi e fai fa’atoaga e fia fa’aulu a latou oloa i isi atunu’u e aofia ai ma Samoa, ona o le naunau o le faigamalo e taofiofi ai le soona ulufale atu o fua o fa’aeleeleaga mai isi atunu’u i totonu o Samoa, e tatau fo’i la ona fa’apena Amerika Samoa, ia taofiofi le soona ulufale mai o fua o fa’aeleeleaga i Amerika Samoa”, o le saunoaga lea a le susuga a Mapu.

Sa ia taua fo’i le tatau i le malo ona faamalosia tapui ma tulafono e soona ulufale mai ai fua o fa’aeleeleaga mai fafo e aofia ai ma Samoa, aua o ni isi o taimi ua vaaia ai le fa’atau o fua o fa’aeleeleaga nei mai Samoa i tafatafa o le alatele, e le gata e le o totogi se lafoga i le malo, ae o lo o fa’atau fo’i i se tau taugofie, ma avea ai ma auala e aafia ai taumafaiga a le aufai fa’atoaga a le atunuu.

Na fa’afetaia e Lolo finagalo o le fono e tusa ai o lenei mataupu, ma o se mataupu taua fo’i e tatau ona matua sailiili i ai le faigamalo, ina ia mautinoa e ave pea le fa’amuamua i le aufai fa’atoaga a le atunu’u, mo le fa’atauina atu lea o fua o a latou fa’aeleeleaga i totonu o faleoloa ma le atunu’u atoa.