Ads by Google Ads by Google

TALO: O la’u taleni na aumai e le Atua

O loimata o le fiafia na ufitia ai foliga o le tama’ita’i talavou o Orepa R. Talo ina ua mae’a ona ia tauaao lana pine auro mai sui o le Asosi Siisii Uamea Mamafa a le Pasefika i le vaiaso na te’a nei, i le mae’a ai lea ona ia manumalo i le pine auro mo le taimi lona lua, i le tauvaga a le Oceania Weightlifting Championship (OWC), lea sa fa’agasolo fa’atasi ma le XV Pacific Games i Papua Niu Kini.

 

O le tama’ita’i o Talo, 16 tausaga le matua, sa tausinio i le vaega a le Junior Championship i le OWC mo le lua ai lenei o tausaga, lea fo’i ua ia manumalo ai i le pine auro.

 

Soo se taimi e aga’i mai ai Talo i luma o le ‘stage’ mo lana si’i, e tau fai patipati uma le to’atele o tagata sa molimauina tauvaga siisii, ona e amata ee mai lava Talo mai le taimi e savali mai ai seia oo atu i le vaega o loo ta’atitia ai u’amea ua ia sauni e si’i.

 

Ina ua fesiligia e le Samoa News ia Talo i le mafua’aga e ee ai pe a oo i le taimi e savali mai e sii, na soisoi le tama’ita’i ma fa’apea mai, “o gaioiga lava e fa’ate’a ese ai le fefe ma le popole i le taimi o le ta’aloga.”

 

Na toeititi lava a le mafai ona tausinio Talo mo Amerika Samoa i Ta’aloga a le Pasefika i Papua Niu Kini, ona o se fa’aletonu sa tula’i mai i lona tusi folau, peita’i o le tuana’i ai o aso e 3 sa i ai o ia i Ausetalia mo le tau fa’aleleia o le fa’aletonu i lona tusi folau, na toe malaga atu ai lea o ia i Papua ma sauni ai mo le tausinioga.

 

“Ou te iloa o le taleni lenei ua ou mauaina, o le taleni na aumai e le Atua mo a’u, ina ia ou maua le malosi e fa’aaoga ai lo’u ola e auauna mo le atunu’u. O la’u taleni na aumai e le Atua, o le mafua’aga fo’i lena ou te fiafia ai e fa’aaoga la’u talenei,” o le saunoaga lea a Talo i se fa’atalatalanoaga ma le Samoa News.

 

O Talo o loo aoga i le aoga maualuga a Marist/Fa’asao i vasega amata, o se tama’ita’i talavou fo’i e fiafia e fa’aalu lona taimi e koleni ai mo lana ta’aloga siisii.

 

“Ou te fiafia lava ou te koleni ma isi o’u uso ma tuagane o loo matou i ai i le au siisii, ua avea ai fo’i lea avanoa ma auala ua mafana ai le matou mafuaga i totonu o ta’aloga siisii,” o le saunoaga lea a Talo.

 

Na ona mae’a lava o le ta’aloga a Talo i le po na tausinio ai, tago loa i le telefoni ma fa’afeso’ota’i ona matua i Lauli’i Amerika Samoa, ma fa’ailoa i ai le tala fiafia.

 

“Sa ou fai i ai o a’u lea ua ou malo, ae sa fesili mai lo’u tama pe na maua sa’u pine auro, ae ou tali atu i ai o lea ua maua la’u pine auro,” o le tali lea a Talo ma soisoi.

 

Na taua e le tama’ita’i i le Samoa News, sa tatalo malosi ona matua ma tapua’i, ina ia manuia lana taumafaiga i se isi pine auro.

 

Na taua e le ali’i faiaoga ia Alo Lopesi Fa’agu e faapea, ina ua fa’atoa aga’i atu Talo i totonu o le Asosi Siisii, sa ia vaaia lona naunau e koleni ma fa’amaoni atu fo’i i le tele o aso i koleniga.

 

             \\