Taliu mai le Ausi’isi’i U’amea Mamafa a Amerika Samoa ma pine 3

O le taeao ananafi na toe taliu mai ai i fanua sui o le Ausi’isi’i U’amea Mamafa a Amerika Samoa ma pine e tolu, i le mae’a ai o le ta’amilosaga a le ‘Oceania Senior, Junior & Youth Championship’, lea sa faia i Brisbane i Ausetalia mai le aso 12-14 Iulai 2013.

 

O i laua na mauaina pine mo Amerika Samoa e aofia ai le ali’i o Pati Jr Fanolua, lea na ia maua le pine auro e tasi, ma le tama’ita’i o Temple Fuimaono sa ia mauaina le pine siliva ma le pine apamemea.

 

O se ulua’i taimi fo’i lenei ua masi’i atu ai se Ausi’isi’i a Amerika Samoa e tausinio i taamilosaga faavaomalo, e aunoa ma se isi tagatanuu e ese mai ai, ae ua na o tama fanau lava a Amerika Samoa.

 

O le afioga i le Peresetene o le Asosi Si’isi’i U’amea Mamafa i le atunuu, le afioga i le ali’i Fa’amasino ia Toetagata Albert Mailo, o sui o le Asosi faapea ai uo ma aiga o le au malaga na i ai i le malae vaalele i Tafuna, mo le faafeiloaia o le toai taunuu mai o le au i le malaga a le vaalele o le Polenisia ananafi.

 

E to’afitu le aofa’i o le au malaga, lea aofia ai le faiaoga e to’atasi, o le susuga lea ia Faafouina Popoali’i ma sui e to’aono o le au e aofia ai ali’i e to’alima ma le tama’ita’i e to’atasi.

 

E leai se isi lagona na oo i le ali’i faiaoga o le au malaga, sei vagana ai le lagona o le fiafia ma le faafetai i le Atua, ina ua i’u manuia taumafaiga a alo o le atunuu, ma ua taliu mai i fanua ma ‘ai o le tapuaiga.

 

“E ui i le faigata o le taamilosaga, to’atele fo’i tagata si’isi’i lelei mai isi atunuu tetele o le lalolagi sa matou tauva faatasi, ae o le itu taua ua i’u manuia le faamoemoe a alo ma fanau a le atunuu, lea fo’i ua taliu mai i fanua ma pine mo le tapuaiga a matua ma aiga, aemaise ai le atunuu atoa,” o le saunoaga lea a le susuga a Faafouina.

 

Na taua e le ali’i o Fanolua lona faagaeetia ina ua mafai ona ia maua se pine auro mo Amerika Samoa, aemaise ai le tapuaiga a nai ona matua ma lona aiga.

 

“O le faalua ai lea ona fai a’u ma sui o Amerika Samoa i le taaloga lenei, ae o le taimi muamua lenei ua ou maua ai se pine. ae o le pine auro fo’i, ou te faafetaia ai le Atua ona o le malosi ma le poto ua ou maua, faafetai ai fo’i i aiga aemaise ai le Asosi ona o lenei avanoa ua mafai ona avea ai a’u ma sui o Amerika Samoa i lenei taamilosaga,” o le saunoaga lea a le alii o Fanolua, 16 tausaga le matua, lea ua sauni e ulufale atu i le Vasega 12 i le Aoga Maualuga a Tafuna i le tausaga agoa o lo o sosoo nei.

 

Ae na taua e le tama’ita’i o Temple e faapea, e ui i le faigata o le taamilosaga ma le toatele o isi tamaita’i e sili atu ona lelei a latou si’i ia te ia, ae sa ia faia le mea sili mo lona atunuu pele o Amerika Samoa.

 

“Ua ou fiafia ina ua ou mauaina pine e lua mo Amerika Samoa, e ui o le taimi muamua lenei ua ou tauva ai i lenei taalosaga, ae o lea ua faamanuiaina a’u taumafaiga, ma ou te faamoemoe i le fesoasoani mai o le Atua e faaleleia atili ai la’u taleni,” o le saunoaga lea a le tama’ita’i o Temple.

 

Na faafetaia e le afioga a Toetagata le tapuaiga a le atunuu, faapea ai matua, aiga ma uo a le au si’isi’i, lea ua mafua ai ona taliu mai i fanua alo ma fanau ma le ‘ai o le tapuaiga.

 

Sa ia faafetaia fo’i kamupani uma sa lagolagoina le faatupeina o le masi’i atu o le au i Ausetalia, aua ana leai la latou fesoasoani e le mafai e alo ma fanau a le atunuu ona ausia nei pine mo Amerika Samoa.

 

“O le taaloga si’isi’i u’amea mamafa, e manaomia le lava o le koleni ma ia auai i ni taamilosaga faavaomalo e pei o taamilosaga a le pasefika, ina ia faa masani ai le au si’isi’i e ulufale atu i tauvaga tetele e pei o le tauvaga sa faia i Ausetalia.

 

Ae ui i le tulaga manuia sa i ai taumafaiga a tama fanau a le atunuu, o le itu faanoanoa e pei ona taua e le pulega o le Asosi siisii uamea mamafa, o le leai lea o se fesoasoani tupe na tuuina atu e le malo e auina atu ai le au i Ausetalia.

 

Na taua e le Failautusi o le Asosi Siisii Uamea mamafa ia Mrs Mailo, o le faletua lea o le ali’i peresetene lona faanoanoa tele ona o le tulaga sa i ai le au a le atunuu, e api uma au siisii ma atunuu uma sa tausinio i fale talimalo i Ausetalia, ae o le au a Amerika Samoa na api i lona uso i Brisbane, e mafua mai ona e leai se tupe e totogi ai se faletalimalo.

 

Na taua e Mrs. Mailo e faapea, e silia i le $20,000 le tupe na faatupe atoa ai le malaga, e na o le $5,000 na tuuina atu e le Ofisa a le ASNOC e fesoasoani ai, ae o le silia i le $13,000 na saili lava e Asosi ma le au e ala i uokafoni sa faia i luma o le KS Mart ma le Cost-U-Less i Tafuna, atoa ai ma le tupe sa mafai ona fesoasoani atu ai ni isi o kamupani ma pisinisi i le atunuu.

 

O le agaga faafetai a le Asosi siisii uamea mamafa e tuuina atu i ni isi o kamupani sa lagolagoina le masii atu o le au e pei o le TMO, Impex, Morris Scanlan, Florence & Saulo, Marist St. Joseph, ASNOC, KS Mart ma le Cost-U-Less ona o le latou lagolago ua mafai ai ona auina atu le au a le atunuu i Ausetalia.

Comment Here