E talitonu le Pulesili o le Ofisa o le Litaea ia Luatua Filisouaiga Ta’afua, o tu’uaiga ua faia e le Komiti Fa’afoe fa’asaga ia te ia atoa ai ma le suesuega i faaiuga ma le fa’aaoga sese o tupe, e mafua mai uma i le mataupu sa iloilo i luma o le Fa’amasinoga Maualuga i le tausaga na te’a nei, i le vaega o le Ta’ita’ifono o le Komiti Fa’afoe ua mavae atu ma le ali’i kovana.

I se pepa o faamatalaga na sainia e Luatua na tuuina mai i le Samoa News, o loo ia taua ai le leai o ni faavae o tu’uaiga ua faia faasaga ia te ia.

O le aso ananafi na faia ai e le Komiti Faafoe le faaiuga ina ia fa’amalolo Luatua mai lana galuega ae maua pea lona totogi, e faatalitali ai le faaiuga o le suesuega ua faia faasaga ia te ia, ae tofia Caroline Wendt e avea ma Pulesili le tumau.

Na taua e Luatua i lana tusi e fa’apea, mai le tele o tausaga o lana auaunaga, sa ia faatinoina pea ona tiute ma le fa’amaoni, i le puipuia lea o teugatupe o le litaea a le malo o Amerika Samoa.

Sa ia taua e fa’apea, na amata mai lava lana auaunaga o se tagata faigaluega o le Ofisa o le Litaea, sosoo ai ma le taimi na avea ai o ia ma Pulesili lagolago, seia oo ina tofia o ia e avea ma Pulesili.

Sa ia faafetaia le tomai sa ia maua e faatino ai lana tautua i le malo, ae o le faalavelave e pei ona afua mai i le vaiaso na te’a nei, ua lagona ai le fa’anoanoa o lona loto.

Mai tausaga sa galue ai i lalo o le ta’ita’iga a Aleki Sene Sr ao avea ma Taitaifono, atoa ai ma le Taitaifono ua i ai nei ia Fanene Morris Scanlan, na taua ai e Luatua le tupu pea o le teugatupe o le Litaea, o se lagona fiafia fo’i lea ia te ia talu mai tausaga e tele o lana auaunaga.

O le vaiaso na te’a nei na afua mai ai lenei mataupu, ina ua fa’ailoa e Fanene i sana tusi ia Luatua ni isi o fa’aletonu ua maitauina i le fa’atinoina o lana auaunaga, e pei o le fa’aaogaina o le ‘Rubber Stamp’ o loo i ai le saini a le Taitaifono e lolomi i luga o se siaki sa ia sainia mo lona pasese e aunoa ma se fa’atanaga, atoa ai ma le siaki sa totogi i se pisinisi e lei lesitalaina, mulimuli ane teu lea siaki i totonu o lana teugatupe.

Sa ia toe faamanatu i lana tusi se tulafono sa pasia e le Fono Faitulafono i taimi ao Kovana ia Lutali, e aveese mai ai teugatupe a le Litaea mai lalo o Teugatupe a le malo. Sa ia taua e fa’apea, o le tulafono lea na pasia i le 1984, na aloaia ai loa le aveese mai o teugatupe a le litaea mai le malo ae tu’u atu i lalo o le vaavaaiga a le Komiti Fa’afoe.

Sa ia taua e faapea, ua mafua ona ia taua lea tulaga, ona o lea ua 31 tausaga o tutoatasi le teugatupe a le litaea, ae o loo maitauina pea tulaga lelei, peita’i o lea ua toe taoto atu i le malo ma le kovana ae o loo tulaga lelei pea lava.

Sa ia taua foi lona le malamalama i le mafuaaga autu ua ala ai ona taua e Fanene ma isi sui o le Komiti Faafoe le upu o le faia o auala fa’aalatua i faaiuga sa ia faia.

Sa ia taua fo’i e faapea, o le suesuega lea ua faia faasaga ia te ia, sa fautuaina lea e le alii kovana, ao lea fo’i ua ia maua mai i le Samoa News, le mae’a lea ona talosagaina se Kamupani Su’etusi latou te su’eina tusi a le Litaea.

Na taua e Luatua le tulaga manuia o tupe a le litaea, ona o loo talitonuina e tagata litaea i latou o loo tausia ma vaaia le teugatupe.