I le tuu faatasiga o manatu faaalia mai le pulega a le Falema’i i le pogai o faafitauli tau tupe o lo o aafia ai la latou faatautaiga, na taua ai e nisi o le aufai pisinisi sa auai i lenei faatasiga, e tatau i le malo ona matua tutu malosi e lagolago ma faatupe le falema’i o loo tua i ai le  soifua ma ola o tagata.

“O ai se isi e fia alu i se falemai pe afai e faaigoa  o se fale maliu, e mafua mai lea igoa ona ua le lava le tupe e aumai ai foma’i agavaa latou te faatinoina le tautua o loo mana’omia e le atunuu,” o le saunoaga lea a Toa Amituana’i, o se tasi o alii faipisinisi sa auai foi i lenei fonotaga taua.

O nisi o le aufai pisinisi e lei finagalo e faailoa o latou suafa peitai sa latou taua e faapea, o le malosi o le malo e tuu atu lana fesoasoani mo le falema’i, o le a mafai ai ona fesoasoani i le faaleleia o nisi o vaega o loo tulai mai ai manaoga i aso taitasi.

“Ae tatau foi i le falema’i ona galulue faatasi ma le malo i le tausoaina o lenei avega, e ala lea i le faatonutonu ma le mata’ituina lelei o totogi o ana tagata faigaluega, ina ia aua nei maualuga naua, a ia laina tutusa  ma le maualuga o loo i ai le laina o totogi i Amerika Samoa,” o le finagalo lea o le susuga Amituana’i.

O le ripoti Suetusi lea na tapena e le vaega su’etusi a le Wipfli, LLP of Spokane, Wash o loo taua ai  le tatau lea ona siitia le tulaga o le auaunaga a le LBJ, e aofia ai ma le faatinoina o ona tiute tauave i soo se vaega o lana tautua.

I lea ripoti o lo o taua ai le tatau ona lelei le auala e faamaopoopo ai le aoina o pili a le falema’i, ona o le isi lea faafitauli o loo taua  e le falemai o loo tulai mai faafitauli tau tupe, i le tele o pili ma aitalafu mai tagata ua maea ona togafiti i le falemai e lei aoina.

I se feiloaiga a le pulega a le falemai ma le Fono i le amataga o le tausaga nei, faapea ai foi ma se feiloaiga ma le Komiti Suesue a le Senate (SSIC), na taua ai le aofaiga e $16miliona o aitalafu a tagata ua uma ona togafitia i le falemai e lei totogiina, peitai o le taimi nei, e na o le $4 miliona mai lea aofaiga e faamaonia e mafai ona ao mai.

I le tulaga  o totogi o tagata faigaluega, o le isi lea auala o loo agai i ai finagalo ma manatu o nisi o le aufai pisinisi, e aofia ai foi ma taitai o le malo, ona e talitonu nisi, o totogi a nisi o tagata faigaluega a le falemai ua fai lava  si maoa’e ma ua avea lea ma itu o le alu ai o se vaega tele o lana tupe.

Mai le paketi faale tausaga a le LBJ, o le 52% e alu i totogi o tagata faigaluega e pei  ona faamaonia e le pule sili ia Michael Gerstenberger.

O finagalo o nisi o le aufai pisinisi, sa latou taua ai le tatau lea ona siitia le tulaga o tupe e faaaoga mo le faatautaiga o galuega a le LBJ, ina ia o gatasi ma le manaoga o le atunuu.

I le taimi nei, e le o taitai ausia e tagata faigaluega a le falemai i le vaega o foma’i le aofa’i sa’o o tagata e tatau ona tautua i ituaiga falemai lea e i ai le LBJ, pe a faatusatusa i isi falema’i faapea i totonu o le malo tele ma le lalolagi.

Mo se faataitaiga e pei ona taua e Gerstenberger, e 11 fomai faapitoa o le mafaufau e tatau ona galulue i ituaiga falemai lea e i ai le LBJ, peitai o le taimi nei e na o le toatolu o loo i ai,  o loo fai mai foi faamaumauga e tatau ona toa 5 foma’i faapitoa mo ituaiga gasegase o le fatu peitai e na o le toatasi o loo galue mo le LBJ i le taimi nei.