O tulaga i le totogiina atu lea o tului i luga o totogi o tagata faigaluega a le malo i le tausaga fou, siitaga a le falemai lea ua faalauiloa mai, atoa ai ma le aitalafu fou a le ASPA lea na faailoa i se fonotaga ma le komiti a le Senate i le vaiaso nei, ua manatu ai nisi o le atunuu e faapea, e foliga mai o nei gaioiga uma o loo atagia mai ai le le toe i ai o se manatu mamafa o le kovana i le soifua manuia o tagata.“E faapefea ona faaopoopo totogi a tagata faigaluega a’o lea e sii pili a le falemai ma le ASPA, o lea foi ua manino le agai atu o le aitalafu a le malo i le ASPA i le $7.2 miliona, o fea la e aumai ai tupe e totogi ai sii a tagata faigaluega a’o lea e faulala’i aitalafu a le malo e le o totogia,?” o le faasea lea a se tasi o tamalii fai pisinisi i le atunuu, le susuga ia Lafo Amituanai.Na taua e lea tamalii, e le amiotonu le faaiuga ua faia e le kovana e faaopoopo ai tupe tului i luga o totogi a tagata faiagaluega a le malo, ao lea e afaina le atunuu atoa.O nisi o finagalo o le atunuu na lagalaga ina ua salalau ripoti mai le ASPA e uiga i le siisii pea lea i luga o le aitalafu a le malo i pili uila ma le suavai.“E foliga mai e le o manatu mamafa lava le kovana i le tulaga pagatia lea ua feagai nei ma Amerika Samoa, ua manatu foi e faamalie se vaega toaitiiti ae faatuatuana’i le toatele o le atunuu,” o le saunoaga lea a Amituanai.O nisi sa fesiligia e le Samoa News i le mataupu e uiga i pili a le ASPA, e lei finagalo e faalauiloa o latou suafa peitai o latou finagalo e autasi uma lava i le manatu, e le o ave e le malo lana faamuamua i le tulaga tonu e tatau ona faamuamua i le taimi nei.“Afai o i ai ni aitalafu a le malo i ona lala ma pisinisi tua, o lo’u manatu, e tatau i le kovana ona faamama muamua aitalafu a le malo ona faatoa manatu lea e fai se tului i totogi o tagata faigaluega a le malo,” o le finagalo lea o se tasi o alii e galue i se tasi o Ofisa o le malo.“E le afaina lava aiga o loo malosi le tamaoaiga, ae faapefea la nai aiga e matua vaivai lava le tupe maua, o faapefea ona latou faafetauia tulaga o le maualuluga o pili atoa ai ma le taugata o le soifuaga lea ua i ai nei,?” o le saunoaga lea a lea alii.Na manino i molimau mai le pulega a le ASPA i se iloiloga sa faia i luma o le Senate i le vaiaso nei, e le o i ai lava se fuafuaga a le malo e totogi atu se vaega o lana aitalafu lea ua oo atu nei i le $7miliona, sei vagana ai lava le $200,000 lea na totogi atu e le malo i le vaiaso na tea nei.Na faamaonia e le afioga i le matua ia Togiola Tulafono i luga o lana polokalame i le faaiuga o le vaiaso na tea nei, ua mafua ona ia fautuaina le Teutupe ina ia totogi atu tului i totogi o tagata faigaluega ia sa faaitiitia o latou itula i le tausaga lenei, ona o lea ua ia maitauina ua agai ina sologa lelei tupe maua a le malo i lenei vaitau, ma o le saunoaga lea a le alii kovana ua lagalaga ai finagalo o nisi o le atunuu, ona o lea ua tulaga lelei mai tupe a le malo, ae ua ese le mea lea o le a ave i ai le faamuamua a le kovana.Na taua e le susuga Atina’e Faalupega, ua manino mai i siitaga fou a le ASPA lea ua maua mai, ua le toe gafatia e lona aiga ona totogi le maualuluga o pili ua i ai, ma afai ae faaopoopo atu i ai ma siitaga fou a le falemai, o lona uiga o le a tulaga pagatia lona aiga.Na taua e Faalupega, e na o ia o lona aiga e faigaluega i le kamupani i’a a le StarKist Samoa, ae o lona toalua e nofo i le fale e tausi ma vaai le la fanau e toafa.