Ads by Google Ads by Google

Talitonu ni isi Faipule e le i oo taimi fa’a a’upega ai Leoleo

E talitonu ni isi o afioga i faipule o le Maota o Sui e pei ona latou fa’aalia i se fetufa’aiga i le taeao ananafi ma sui o le Matagaluega o Leoleo, e le i taitai o o i le taimi e tatau ai ona fa’a a’pegaina leoleo.

 

Na fa’aalia e le Sui Fofoga Fetalai ia Talia Fa’afetai Iaulualo e fa’apea, e le o taitai lava fa’alavelave ua tutupu i le atunuu e mafai ai ona fa’amausali le mau a le Matagaluega, ua tatau ona fa’a a’upegaina ali’i ma tama’ita’i leoleo, ae na faaalia e le ali’i faipule ia Maugaoali’i Leapai Tusipa Anoa’i e fa’apea, afai e le o lagonaina e le atunuu lautele le fefe ma le mata’u i totonu o le siosiomaga o lo o latou nonofo ma aumau ai, aisea la e manatu ai fua le Matagaluega e fa’a a’upega leoleo.

 

O le iloiloga i le va o le matagaluega ma le komiti o le Puipuiga o le Saogalemu Lautele a le maota o sui, na mafua lea ona o ni fa’asea mai ni isi o le atunuu na faaoo atu i a latou faipule, e faailoa ai lo latou le lagolagoina o le fuafuaga e fa’aaupega leoleo.

 

O molimau sa valaauina i lenei iloiloga e aofia ai le Komesina ma le Sui Komesina o Leoleo ma isi o le matagaluega, sui o le Ofisa o le Loia Sili, faapea ai ma le loia fautua a le alii kovana.

 

Na fa’aalia e Talia e fa’apea, o se tasi o itu o lo o matua fesiligia ai e le atunuu le fuafuaga e faa a’upega leoleo, e foliga mai e na o le tasi lava le faalavelave lea na tagatavaleina ai se alii leoleo, ua mafua ai ona una’i e le matagaluega le tatau lea ona fa’a a’upega leoleo.

 

“Ou te talitonu, ua o o i le taimi ua tatau ai ona a’oa’o tatou leoleo i auala e tete’e atu ai i osofaiga mai tagata faatupu faalavelave i le atunuu, ae le o le taimi lenei e tatau ai ona fa’a a’upega leoleo,” o le saunoaga lea a Talia.

 

Na faauilavea le alii komesina o leoleo ia William E. Haleck ma ia saunoa e faapea, e tele naua isi mau mataupu ua mafua ai ona a’e le manatu e fa’a a’upega leoleo, ma o ni isi o nei mataupu e aofia ai le faalavelave lea na maliu ai le alii leoleo o Solaita i le tele o tausaga ua mavae, o le faalavelave na maliu ai le alii leoleo ia Lt. Lusila Brown, faapea ai ma isi faalavelave na osofaia ai e ni isi o le atunuu leoleo i paipa u’amea ma tolopa, a’o tali atu leoleo i ni faalavelave sa tutupu i le atunuu.

 

“Afai matou te tali atu i ni faalavelave e tutupu i le atunuu e faaaoga ai e tagata fana, e faapefea ona matou tali atu i ai pe afai matou te o i ai ma o latou lima,” o le saunoaga lea a Haleck.

 

“Ou te matua tete’e lava i lau saunoaga lena ua fai mai lau afioga i le alii komesina,” o le tali atu lea a Talia i le saunoaga a Haleck, ma ia fautuaina ai molimau a le malo ina ia vaavaai i le isi itu o le mataupu lenei i tulaga o aitalafu a le malo e ono tula’i mai ai, pe afai ae su e le atunuu le malo ona ua fana sese ese leoleo se tagata nuu.

 

“E faapefea ona tali atu le malo i le itu tau i tupe pe afai e su e se aiga o se tagata ua fana sese e se leoleo, o le isi lena itu taua o le mataupu lenei e tatau ona tatou vaavaai i ai,” o le saunoaga lea a Talia.

 

Ae na faaopoopo mai i ai le tofa a Tauese Vaa Sunia, lea sa gafa ma le faalauiloaina o faamaumauga a le ofisa o leoleo i le tulaga ua i ai fana i le atunuu, e mafua ona aumai e tagata o le atunuu pulufana mai fafo, ona o lo o i ai fana iinei e faaaoga ai, a le o lena fo’i, e muamua aumai pulu fana ae mulimuli aumai fana.

 

Ua i ai le manatu e toe valaauina se isi iloiloga a le maota o sui e faatatau i le mataupu lenei.