Talitonu Magalei e le mana’omia se Fono Fa’apitoa

E talitonu le afioga i le ali’i Senatoa ia Magalei Logovi’i, e le tau mana’omia fua se Fono Fa’apitoa e pei ona valaauina e le ali’i kovana mo le vaiaso fou, aua o mataupu o le Fono Fa’apitoa ua mae’a ona lalafo i ai le maota ma ua mae’a fo’i ona faia i ai la latou fa’aiuga.

 

O lea saunoaga a Magalei na tuuina atu i le taimi o folafolaga a le maota maualuga ananafi, ina ua mae’a ona tolaulau e le Failautusi a le Senate se tusi na auina mai i le afioga i le Kovana le tumau ia Lemanu Peleti Mauga, e talosagaina ai le Fono Faitulafono mo se Fono Fa’apitoa lona lua mo le Nofoaiga lona 33 lenei, ma ua fa’amoemoe e nofoia lea fono faapitoa i le aso 1 Aperila, 2014, o le aso Lua lea o le vaiaso fou.

 

O mataupu e fa e pei ona taua i le tusitusiga a le Kovana mo le Fono Fa’apitoa e aofia ai Tofiga fou a le Kovana mo ni isi totino o le Komiti Fa’afou a le Litaea, ina ua teena e le Fono isi tofiga sa tuuina mai muamua; tofiga mo le susuga ia Fiti Sunia e avea ai ma Sui Fa’amasino; Paketi fa’aopoopo a le kovana e $625,000 e fausia ai le auala i Visa ma fa’asolo atu ai i Fagaitua, ma le talosaga mo le $200,000 e fa’atupe ai le polokalame a le fanau aoga i le vai tuuaga o le tau mafanafana o lo o soso’o nei.

 

Saunoa Magalei i luma o le maota, o le mataupu e fa’atatau i tofiga a le kovana mo Sunia, ua mae’a ona lalafo i ai le maota ma ua fa’atulaga le iloiloga i le aso Gafua o le vaiaso fou, e oo fo’i i le paketi faaopoopo a le kovana e $200,000 mo polokalame a fanau aoga, ua mae’a ona pasia e le maota ma ua tuuina atu i le maota o sui mo sa latou fa’aiuga.

 

“O isi mataupu e pei o le paketi faaopoopo e $625,000, ua uma ona fai i ai la tatou faaiuga e taoto pea se’i toe suesue atili i ai le maota, ma tofiga mo totino o le Komiti o le Litaea, o lea fo’i fa’atoa mae’a ona tatou lalafo i ai, ma i lo’u talitonuga, e i ai le upu a le atunuu e faapea, e le tatau ona gagau mata le laau,” o le saunoaga lea a Magalei, ma ia tuuina atu ai le mau, e le tatau ona faataunuuina se Fono Fa’apitoa.

 

Na lagolagoina e le afioga i le alii senatoa ia Laolagi Fonoti Savali Vaeao le finagalo o Magalei e faatatau i mataupu ua uma ona lalafo i ai le maota, ae i lona taofi, e tatau lava ona faataunuuina le Fono Faapitoa, lea fo’i na lagolagoina e le afioga i le alii senatoa ia LeAtualevao Asifoa.

 

Saunoa le afioga i le ali’i senatoa ia Soliai T. Fuimaono e fa’apea, “e le i faia sa tatou fa’aiuga i le paketi faaopoopo a le kovana e $625,000, o le mea lea ou te manatu ai, tatou faaauau pea le Fono Fa’apitoa a le kovana.”

 

Saunoa LeAtualevao e fa’apea, e taua tele le $625,000 lea e fa’aleleia ai auala i le itu i Sasa’e o le atunuu, ua leva ona pagatia ai le to’atele o tagata o lo o alala i lea itu o le motu.

 

Na lagolagoina e le peresetene le tumau ia Nuanuaolefeagaiga S. Nua le finagalo o Magalei, o mataupu o le Fono Faapitoa ua uma ona talanoaina e le maota, ae sili pe a fa’atali sei oo i le aso Gafua pe a taunuu mai le alii peresetene o lo o malaga i Hawaii, ona tuu mai aloaia lea o se faaiuga pe faaauau le Fono Faapitoa a le kovana pe leai fo’i.

Comment Here