Ads by Google Ads by Google

TALITONU LOLO I LE KAPENETA UA LA FILIFILIA MA LEMANU

Na faailoa e le alii kovana sili ia Lolo Matalasi Moliga i lana saunoaga i le fono a le Kapetena ananafi, lo la talitonu atoatoa ma le alii Lutena Kovana ia Lemanu Peleti Mauga, i sui uma ua la filifilia e avea ma taitai o Ofisa ma Matagaluega taitasi uma a le malo.

 

“Ou te talitonu ua ma filifilia ma Lemanu tagata pito sili ona lelei e fai ma taitai o le malo i le nofoaiga lenei,” o le saunoaga lea a Lolo i le fonotaga a le kapeneta sa faia i le potu fono a le Matagaluega o Galuega Lautele a le malo, lea na faia mo le umi e 2 itula.

 

Na faailoa e le alii kovana i sui o lana kapeneta e faapea, sa tele faafitauli na feagai ma le malo i le tausaga ua tuana’i atu, peitai ua la talitonu ma Lemanu, “o outou uma ua ma filifilia e avea ma taitai o Ofisa ma Matagaluega taitasi, e mafai ona outou faia le galuega ma fai suiga.”

 

“O le filifiliina la o oe i le tofiga lena, e maualuga ma faapitoa, ma o se itu taua foi lea mo tupulaga talavou a le atunuu pe a latou vaavaai mai ia te outou, ina ia fai ma lu’itau mo i latou tofiga ua ma faia, ma, atonu o se aso o i luma o le a tofia ai se tasi o i latou faapei o outou ua ma filifilia,” o le isi lea saunoaga a Lolo.

 

Na faailoa e le alii kovana i lana kapeneta e faapea, e le’i tofia i latou i le galuega ina ia tautua mo ia lava, ae ia tautua le atunuu ma tagata.

 

Sa ia faamanuia i Faatonusili uma ua maea ona faamaonia e le Fono Faitulafono, aemaise ai i latou ua sauni e laasia lea tulaga i se taimi oi luma.

 

Na pau lona faanoanoaga e pei ona ia saunoa, o se tasi o a la tofiga ma Lemanu na teena e le Senate, ma ua la filifili e toe tuuina atu lea tofiga i luma o le Fono.

 

Mai tofiga uma a le kovana na tuuina atu i luma o le Fono Faitulafono, e na o le afioga a Pa’u Fuiavailiili Roy Taito Ausage na teena e le Senate e ui na pasia e le maota o sui. O Pa’u na tofia e avea ma Faatonusili o le Matagaluega o Tupulaga Talavou, Tina ma Tama’ita’i.

 

A’o aga’i malie atu ai galuega a le nofoaiga fou a Lolo ma Lemanu, na faailoa ai e le alii kovana i lana kapeneta e faapea, e i ai lu’itau o le a feagai ma i latou i le lumana’i, peitai ua la talitonu atoatoa ma Lemanu, latou te mafai ona saili auala e foia ai lu’itau o le a tula’i mai.

 

“O se tasi o itu ua ma fiafia ai ma le Lutena Kovana, e le o toe i ai ni Faatonusili tausi pepe na ma filifilia, e pei ona vaaia i tausaga ua tuana’i, ae ua ma filifilia na o tagata pito sili ona lelei e fai ma ta’ita’i o le malo,” o le isi lea saunoaga a Lolo.

 

Saunoa Lolo, i le uluai taimi na la ulufale ai ma Lemanu i totonu o le la Ofisa fou ua i ai nei, sa tele mea e le talitonu ai le vaai na latou fetaiai, ma e i ai lona talitonuga e faapena uma lava fo’i le tele o isi Ofisa a le malo ina ua nofoia e taitai fou e pei ona tofia nei, ae talitonu o la loto ma Lemanu o le a mafai e i latou ua la tofia ona fai suiga e tusa ai o ia faaletonu.

 

I le faaiuga o lana saunoaga, sa ia toe fautuaina malosi ai sui uma o le kapeneta ina ia naunau e fai le mea sa’o, faamaoni ma le amiotonu, ma ia galulue e tautua le atunuu ma le malo.