Talitonu Lolo e leai se uiga suesuega GAO sa faia mo totogi amata

E le gata ua fa’aalia se atugaluga o le ali’i kovana ia Lolo Matalasi Moliga i le ripoti mai le Ofisa o le GAO (U.S Government Accountability Office), i se suesuega sa faia e fa’atatau i le tulaga o lo o i ai totogi maualalo i le teritori, ae sa taua fo’i e Lolo le ma’imau o le taimi sa fa’atinoina ai lea suesuega, ona e va api api lava fa’amaumauga o lo o faavae ai i luga le faaiuga o lea ripoti, e aunoa ma le saili o le fa’afitauli e ono fetaia’i ma le atunuu ona o lenei mataupu.

 

Na taua e Lolo e fa’apea, o le isi siitaga i totogi amata ua fuafua mo le aso 30 Setema 2015, o se fuafuaga o le a aafia ai le tamaoaiga o le teritori.

 

O se tasi o itu na taua e le alii kovana i lana tusi, o faamaumauga e faatatau i le Tusiga Igoa o le 2010 a Amerika Samoa, lea e 64,919 le aofa’i o le faitau aofa’i o le atunuu sa fa’amauina e le Matagaluega o Fefa’atauaiga ma Alamanuia a le atunuu, ae 55,519 le aofa’i sa mafai ona fa’amauina i le Tusiga Igoa aloaia sa faia, tusa lea e 14% ua fa’aitiitia mai ai le faitau aofa’i o le atunuu.

 

O le isi vaega taua o le ripoti na taua e le alii kovana i lana tusi, o le aofa’i o tagata faigaluega o lo o taua i le Tusiga Igoa o le 2010, lea e fai mai faamaumauga a le malo o Amerika Samoa e to’a 18,862 tagata faigaluega i le 2010, ae fai mai faamaumauga a le Tusiga Igoa e na o le 16,616.

 

E pei ona taua i se vaega o le ripoti a le GAO, e talitonu Amerika Samoa e mafua ona tula’i mai eseesega i le faitau aofa’i o le atunuu e pei ona taua i le Tusiga Igoa o le 2010, ona o le eseese o faamaumauga i tulaga o tagata sa fananau mai, o tagata ua maliliu, o tagata ua malaga ese atu, atoa ai ma isi lava faamaumauga e faatatau i le faitau aofa’i o tagata.

 

O le mataupu e faatatau i le le sa’o o faamaumauga i le taimi o le Tusiga Igoa 2010, na mafua ai ona valaauina ni iloiloga i luma o le maota o sui i le 2011, ina ua fesiligia e le susuga ia Meleisea V. Filiga, lea sa galue muamua i le Ofisa o Faamaumauga a le malo le ripoti fai mai ua faaitiitia le faitau aofa’i o le atunuu i le 3.1% i le va o le 2000 ma le 2010, e ui sa ia talitonu atoatoa e silia i le ta’i afe i tausaga ta’itasi le faitau aofa’i o pepe fou e fananau mai i le atunuu.

 

Na taua e le alii kovana e faapea, o ni isi o ofisa sa tatau ona fesiligia e le GAO mo ni faamaumauga e uiga i le latou suesuega sa faia, e aofia ai faamaumauga mai le Ofisa o le Saogalemu a le malo tele, o Ofisa o le Tusiga Igoa a le malo tele i le teritori, faapea ai ma le Matagaluega o Fefaatauaiga ma Alamanuia a le atunuu.

 

I le faaiuga o le tusi a le alii kovana, ua ia talosagaina ai le GAO ina ia tuuina atu sa latou ripoti manino i luma o le Konekeresi, e talosagaina ai le toe tolopo o le isi siitaga o totogi amata mo Amerika Samoa o lo o fuafua mo le 2015.

 

faaliliu Ausage Fausia

Comment Here