Ads by Google Ads by Google

Talitonu Kovana ua tatau ona la’u uta i Manu’a e aunoa ma se totogi

Na faamanino e le alii kovana sili i le fono a le Kapeneta i le taeao ananafi e faapea, ua oo i le taimi ua tatau ai ona ave uta a tagata i Manu’a e aunoa ma se totogi ina ia mafai ona fesoasoani le malo i le tau atina’eina ma le faaleleia o le tamaoaiga o le motu o Manu’a.

 

O lea saunoaga mai le tofa Lolo Matalasi Moliga, o se vaega o lana saunoaga ina ua ia saunoa e faalauiloa lana ulua’i malaga mo Manu’a lea ua faatulaga i le Aso Gafua o le vaiaso fou, talu ona avea i laua ma Lemanu Peleti Sialega Mauga ma taitai o le malo.

 

“O le autu o la’u ulua’i malaga mo Manu’a i le vaiaso fou, o le vaavaai i auala eseese e mafai ai ona atina’e ma faaleleia le tamaoaiga o Manu’a, ma iloilo auala e mafai ai ona fesoasoani atu i ai le malo,” o le saunoaga lea a Lolo i le fono a le kapeneta sa faia i le potu fono a le Kolisi Tuufaatasi.

 

O lea malaga ua talosagaina ai e le alii kovana Faatonusili uma o lo o i ai a latou Ofisa i Manu’a, o le avanoa lelei lenei latou te malaga faatasi ai mo le faia o ni a latou asiasiga i tagata Manu’a.

 

O le po o le Aso Gafua o le vaiaso fou lea ua faamoemoe e malaga atu ai le MV Sili mo le la’uina atu o faatonusili ma sui o le malo i Manu’a, o le a la’u faatasi atu ai fo’i ma uta a tagata e fia ave i Manu’a i le malaga lea a le vaa.

 

“Fa’amata e le o se taimi lelei lenei e amata ai loa ona tatou faia se suiga e ala i le la’u fua uma o uta a tagata i Manu’a,?” o le fesili lea a Lolo i lana kapeneta, aemaise i le Faatonusili o Uafu ma Taulaga ia Dr. Claire Poumele Tuia.

 

“O le taimi lelei lava lenei e faia ai sau ulua’i suiga lelei mo Manu’a e ala i le ave fua uma lea a tagata e fia la’u mo Manu’a, ina ia fesoasoani ai fo’i i le tau o le soifuaga o lo o feagai ma tagata i le taimi nei,” o le saunoaga tuu sa’o lea a Lolo ia Dr. Poumele.

 

Na taua e le alii kovana e faapea, e mafua ona taugata le tau o le soifuaga i Manu’a, ona o le totogi o uta o lo o totogi e nai aiga Manu’a.

 

“O le tau o le pepa sikaleti iinei e $4, ae a e faatauina i Manu’a ua $9, e faapena fo’i i le pusa moa, e $5 o lo o faatau ai iinei ae a oo atu i Manu’a ua $11, pau la le auala e mafai ona fesoasoani ai i le tuu i lalo o le tau o le soifua i Manu’a, o le ave fua o uta e aua ne’i toe totogiina,” o mafaufauga ia a le alii kovana.

 

O ni isi o matagaluega ua faailoa mai le malaga o latou sui i le vaiaso fou e aofia ai le Matagaluega o le Soifua Maloloina.

 

Na taua e le faatonusili o lea Ofisa ia Motusa Toatolu Nua i le Samoa News e faapea, o le avanoa lenei o le a mafai ai foi ona toe faaauau le latou asiasiga i tua i aiga lea na amata i le masina o Fepuari na te’a nei, ina ia toe siaki poo a mai nai tama ma tina matutua i tua i aiga, aemaise ai fanau aoga.

 

Na lu’i e Lolo sui o lana kapeneta e faapea, “e leai se isi taimi tatou te amata ai ona faaleleia le atina’e o Manu’a e pei o le taimi lenei, e le mafai foi ona lelei le atina’eina o Tutuila nei pe afai tatou te le faaleleia le atina’e o Manu’a.”

 

O se tasi o faataitaiga lelei na faatusa ai e Lolo le tulaga pagatia o lo o feagai ma aiga Manu’a i le taimi nei, o le mataupu i le aiga sa fai le latou nonogatupe e $10,000 mo le toe faafouina o le latou fale i Manu’a, ae ina ua sauni le aiga e la’u le uta o mea faufale i le MV Sili, sa manaomia le totogi o le $3,000 mo le tau o le latou uta sa ave.

 

“Aisea e saga totogi ai pea e tagata Manu’a tupe mo a latou uta i le vaa ae o i latou o le isi vaega o le faigamalo a Amerika Samoa,?” o le fesili lea a Lolo i lana kapeneta.

 

O le taeao o le aso Lua ua faamoemoe e felelei atu ai le kovana ma le lutena kovana i le vaalele i Tau, Fitiuta ma Faleasao, ona faaauau ai lea o le asiasiga i Ofu ma Olosega/Sili, a’o le’i toe fo’i mai i le taeao o le aso Lulu e sosoo ai