Ua faaalia e ni isi o tagata i Manu’a, lo latou talisapaia o se fuafuaga faataoto a le Faatonusili a le Matagaluega o le Soifua Maloloina, e asia aiga uma i Manu’a e se malaga pito sili ona to’atele a foma’i ma sui o le Matagaluega.

Na taua e ni isi o tama ma tina matutua mai Manu’a i le Samoa News e faapea,ua lagona le lototele ma le fiafia, ina ua amanaia soifua o tagata o lo o nonofo i Manu’a.

“Ua tele tausaga o matou nonofo pologa i le le lelei o togafitiga mo i matou i Manu’a nei, o isi taimi e lolofi atu nai tama ma tina matutua i le falema’i mo togafitiga ae sau le tala e leai se foma’i, ae o isi fo’i taimi ua i ai le foma’i ae sau le tala e leai ni vailaau, ua le iloa la e tagata Manu’a po o ai o le a sulu i ai,” o le saunoaga lea a se tasi o tamalii mai Manu’a e le’i finagalo e faailoa lona suafa.

Ae na taua e le tina o Letiana Filiga o Faleasao e faapea, afai ae taunuu le malaga ua fuafua e le matagaluega o le soifua maloloina, o se ulua’i malaga lea ua mafai ona asia ai e ni foma’i se toatele tagata o lo o soifua ma nonofo i Manu’a.

“O matou fo’i o tagata soifua pei foi o oe ma isi tagata o lo o aumau iina i Tutuila,” o le tala ata lea a le tina o Letiana i le Samoa News.  “Afai e lelei ia Tutuila ona i ai sa latou foma’i i aso uma, fau ma soloi a latou vailaau ma fualaau mo togafitiga, lona uiga e tatau foi ona lelei mo tagata Manu’a, aua e taua le foma’i mo le tagata ma’i, ae le faapea e alu atu le tagata ma’i na o le falema’i o lo o tu mai ae leai se foma’i”.

Na taua e ni isi o tagata Manu’a e faapea, e i ai lo latou talitonuga, e le faapea ua mafua ona faia e le alii faatonu lenei asiasiga ona o ia o le Manu’a, ae ua mafua ona ia faia ona o lona tiute o le Faatonu o le Matagaluega o le Soifua Maloloina a le atunuu.

O le isi itu taua o le malaga e pei ona taua e ni isi o le motu, ina ia maua ai le avanoa o le faatonusili fou ma lana aufaigaluega, e vaai tino ai i le tulaga pagatia o lo o feagai ma tagata Manu’a i le taimi nei.

O le mataupu i le soifua maloloina o tagata i Manu’a, e le fou i le faafofoga a le Fono, ona o se tasi lenei o mataupu o lo o unaia pea e faipule ma Senatoa o Manu’a i soo se taimi e talanoaina ai mataupu tau i le soifua maloloina i totonu o le fono ma le atunuu lautele.

O faanaunauga o faipule ma Senatoa a Manu’a i le Fono, afai e fiafia Tutuila i le maua o togafitiga mo i latou i taimi uma e manaomia ai, e tatau foi ona lelei mo nai tagata i Manu’a.

O le aso 22 o Fepuari e pei ona faalauiloa e le alii faatonu o le Soifua Maloloina ia Motusa Tuileama To’atolu Nua i luma o le Fono i le vaiaso na te’a nei, ua faatulaga e malaga ai la latou aumalaga i Manu’a.

Ina ua fesiligia e le Samoa News le alii faatonu i le aso ananafi mo le faalauteleina o lenei malaga, sa ia taua ai e faapea, e silia i le toa 20 foma’i o le a auai i le malaga lea ua faatulaga mo Manu’a, ma ua faamoemoe latou te asia tagata Manu’a uma o lo o nonofo i totonu o le motu i le taimi nei.

“O le autu o le asiasiga lenei, e le gata o le a asia ai tama ma tina matutua, o ulugalii feololo ma fanau e oo lava i pepe i tua i aiga, ae o le a maua ai foi le avanoa e fesiligia ma faatalatalanoa ai i latou i ituaiga gasegase o lo o aafia ai i latou,” o le saunoaga lea a Motusa.

“O le agaga autu ia te a’u ma le matagaluega, ia mafai ona matou aapa atu e asia tagata matutua i tua i aiga, ina ia mautinoa e maua uma e i latou le tautua o lo o maua foi e isi tagata matutua i Tutuila,” o le isi lea saunoaga a le alii faatonu.

O le faafitauli numera tasi o lo o feagai ma Manu’a i le taimi nei e pei ona saunoa Motusa, e le gata e le lava foma’i ae le lava foi vailaau mo togafitiga.

“Ou te talitonu atoatoa, afai e lelei ona toe faaolaola le tautua a le Ofisa o le Soifua Maloloina e ala i le asia o tama ma tina matutua i tua i aiga i Tutuila ma Manu’a, o le a mama le avega a le falemai i Fagaalu, o le a le toe i ai foi ni faafitauli e tutupu faafuase’i ma aafia ai soifua o nai tagata matutua,” o le saunoaga lea a le alii Faatonu.

O le taliu mai ai o le aumalaga lenei mai Manu’a, ona faatulaga ai loa lea o le malaga mo Aunu’u, mo le faamoemoe lava e tasi e pei ona saunoa Motusa.

O le amataga o le masina o Mati lea ua faamoemoe e asia ai e le aumalaga lava lenei le motu o Aunuu, ma o se ulua’i malaga lenei o le a faamauina i le tala faasolopito o le matagaluega o Manu’a ma Aunuu, pe afai ae faataunuuina i le vaiaso fou.