Ads by Google Ads by Google

TALIMALO KANANA FOU FONOTAGA A LE CWM

E lata i le toa 250 le aofai o tagata usufono mai atunuu eseese o le lalolagi o loo faatasi mai i le fonotaga a le CWM lea o loo tali malo ai le ekalesia EFKAS i lona laumua i Kanana Fou.

O le autu o lenei fonotoga o le “Faamoemoe, o le Gagana o le Ola,” ma o se fonotaga na afua mai i le taimi ao faaigoaina le ekalesia i le LMS, peitai na toe suia le igoa o le fonotaga lenei i le CWM ina ua suia le igoa o le ekalesia i le EFKS i le 1995.

O nisi o mataupu o le fonotaga e aofia ai teuteuga i le Faavae a le CWM, atoa ai ma le tofiaina o nisi o tofiga taua, ae o le sini ia mafai ona faataoto polokalame mo le lumanai o tupulaga talavou.

TOFIA REV. SAMUELU TIALAVEA FAI MA TAITAIFONO CWM

Ua tofia nei le susuga Rev. Samuelu Tialavea e fai ma taitaifono fou a le CWM mo le isi fa tausaga, ina ua filifilia o ia i le palota sa faia i le aso Lua na te’a nei, ma ua sui tulaga ai i le sui mai Aferika i Saute sa ia tauaveina mai lenei tofiga mo le fa tausaga ua tuanai.

E to'a 31 Ekalesia mai atunu'u eseese o le Lalolagi ua aofia e avea ma latou totino. Na mafua mai nei galuega fa'amisionare i le Lonetona Misionare Sosaiete [LMS] fa'apea ma le Sosaiete o Galuega fa'amisionare a le lotu Periperiane i Peretania.

Ua i ai le autu i lagona o lenei sosaiete o galuega fa'amisionare, e aoga ona va'ai toto'a ta'ita'i o Ekalesia i atunu'u ta'itasi i tu ma aga a lona atunu'u, e fausia aga'i i ai le mautu o le Ekalesia Kerisiano, ma ua iloga ai, le suiga o latou igoa mai le LMS i le EFKS ma soso'o ai ina matu'u ese mai Amerika Samoa ma fa'avaeina le EFKAS.

Tala'aga CWM:

O le tausaga 1961 na tuma'oti mai ai le EFKS mai le LMS[Lonetona Misionare Sosaiete], peita'i sa sapaia pea e le EFKS le LMS i ana saoga mo galuega fa'amisionare fa'atasi ai ma Sui Fa'amisionare Samoa na auina atu mo le tala'iga.

Ina ua matu'u ese mai le EFKAS mai le EFKS i le amataga o le 1980s, sa talosaga loa mo se avanoa i le CCWM lea na suia i ai le igoa o le LMS mulimuli ane. Na fa'ato'a talia le talosaga lea a le EFKAS i le tausaga e 1995 ia Iuni ma ua avea ai i tatou ma toe totino lava o le CWM e o'o mai i le tausaga nei.

I le tausaga fo'i lea e 1995 na tauaofia ai le fonotaga a le CWM i Lonetona ma fa'ailoga ai le atoaga o le 200 tausaga o le LMS peita'i, sa fa'aulu atu i ai le tatou talosaga ae lagolagoina e uso EFKS ma pasia ai. Lea ua tatou se'e nei i ma'a o malie, aua ua i ai sao o lea fa'alapotopotoga CWM i le a'oa'oina o fanau i Kanana Fou High School ma ua se'e ai a'oa'oga fa'aonapo nei i ma'a o malie i lea laumua.

Ona o lo'o i ai taulaga mo galuega fa'atala'i, o ia sao tupe e fa'ao'o sa'o i le CWM, peita'i ua i ai isi polokalama fefa'asoaa'i ai tagata faigaluega ma i latou ua i ai tomai fa'apitoa i so'o se mataupu ua a'oa'oina i totonu o a'oga a fanau a le EFKAS o le totino o le CWM, ma a'oga fa'afaife'au fo'i.

Talimana’o le CWM mo le EFKAS:

Ona o lo’o tatou o fa’ao’o so tatou sao tau le tamaoa’iga mo galuega fa’atala’i talu mai ona tatou ofi atu i le CWM, o lea sa tatou talosagaina ai sa latou fesoasoani mai.

O le a'oga mo e galulue fa'atala'i, ua mae'a fa'atautaia, o le a'oa'oga mo ta'ita'i, ua mae'a fa'atino, ma le galuega e fesuia'i ai faia'oga i totonu o A'oga Fa'afaife'au, ua mae'a fo'i ona agava'a ai le Kanana Fou Seminare.

Peita'i, ua i ai faia'oga fesuia'i mai isi atunu'u e aofia ai Initia, ua aumaia ai se faia'oga mo Kanana Fou High School, fa'apea fo'i ma le faia'oga mai Initia mo le Seminare Fa'afaife'au a Kanana Fou. O nei fesoasoani e fa'aauau pea, ma e talosagaina so'o se taimi e mo'omia ai.

O fesoasoani tau tupe e maua mai, ua maua ai avanoa o Faife'au ma A'oa'o e a'o'oga ai i Iunivesite i Taiwan, Fiti i le Pastors Theological College ma Manchester mo fa'ailoga o le Masters in Theology ma le vaega tupe mai le "Experience Enlargement Fund" lea na fa'atupe ai le Computer Room mo Kanana Fou.