Ads by Google Ads by Google

Talia talosaga Ropeti

O lo’o ua fa’aalia mai se tasi o tama’ita’i ua fa’amanuiaina ana talosaga i le Atua ina ia avea o ia ma Failauga o lana Upu folafola i le ekalesia ua ia tausailia ai lea tofi, le ekalesia Presbyterian PIPC. Ua le na’o Rev. Marie Ropeti lana talosaga, ua fa’apea ona so’ofa’atasi uma i ai ma loto ma talosaga molia a lana ekalesia i Aukilani i Niu Sila, ma ua fa’apea ona talia mai a latou tatalo, ua talia e le komisi a le Ekalesia Peresepateri a Niu Sila le talosaga e avea ai Marie Ropeti ma latou Faife’au tausi ekalesia.

O le ekalesia lea e aofia i ai tagatanu’u o Tokelau ma Tuvalu i Aukilani, ma o le aso Tofi na te’a nei sa maua ai e i latou nei lea tala fiafia.

O lona fa’au’uga e avea ai ma faife’au tausi ekalesia mo PIPC, na fa’ataunu’uina lea i le Pacific Islands Presbyterian Church i Grey Lynn ,a sa molimauina lea aso iloga i le soifua auauna o lea Failauga Tama’ita’i e le aotelega o lea Ekalesia atoa i Niu Sila, o ona aiga uma, ma i latou e masani ma ia.

O le tuagane o le tama’ita’i failauga, Le’iataua Tofae Ala’ilima Nu’uali’itia na matua masi’i atu lava mai Samoa ina ia auai i lea lava fa’au’uga taua i totonu o le li’o o si latou fo’i aiga.

O se fa’amatalaga a le tama lea, sa ia fa’apea ai, “Ua matou fiafia uma lava aua ua i ai se tasi o i matou le fanau e mulimulita’i i tulaga a’ao o matou matua, Rev. Ropeti ma Ta’aliga Nu’uali’itia.” O nisi o lea aiga sa malaga mamao atu e aofia ai Le Tagaloa Pita ma le failautusi o le Ekalesia Metotisi Rev. Vaiao Eteuati, o i latou ia na malaga atu e fa’amanuia aloa’ia le susuga le Failauga ua maua ai so latou ala i malo i le afioga a le Atua.

O le sao iloga o le afioga Le’iataua, o le avea lea o ia e fai ma sui o le pa’ia o aiga, Tofae, Nu’uali’itia ma Ala’ilima e fa’ao’o le afioga le Ao Fa’alupega Marie Ropeti i lana ekalesia e tausi ma fa’afailele. O se tasi lea o mea e aotelega ai aiga, pe o’o ina ausia e tama fanau a aiga, se tulaga fa’apea, aua o Failauga lava o le Upu a le Atua, o ona sui va’aia na i lalo nei, ma e matua mitamita aiga i lea ituaiga o fa’aeaga.

Ina ua talia e le Ekalesia Peresepateri le latou Fa’afeagaiga Taulagi, ua latou mua’i iloa lelei lava, e ‘ese fo’i le latou faife’au mai le tele o Faife’au uma o le Upu a le Atua. O ia o se tina o le aiga, ae o lo’o mafuta ma le tama o le aiga, o se Failauga fo’i o le Upu, Rev. Apisaloma o le Ekalesia Fa’apotopotoga Kerisiano i Samoa, ma o le a le mafai ona latou mafuta a’ia’i ma ia i taimi uma o le latou mafutaga.

Ae o se mea e ofo ai, ona ua fa’ailo lava le mana’o o lea Ekalesia, e le o manana’o lava i latou i se isi lava faifia i latou e avea ma latou faife’au a’o Marie Ropeti Apisaloma, tusa lava pe latou te mafuta, na se vaega o lona taimi atoa.

O le tala mai a le susuga Le’iataua, sa ia fa’apea ai, “O se mea ese lava lea e faia e lenei Failauga, e tele le mea o ia o le faletua o le latou faife’au, ae o lea fo’i ua avea ma faife’au i lea ekalesia, ae le tu’ua ai e ia lona tofi o le faletua i le susuga le Fa’afeagaiga ma le o le tina o le aiga.”

saunia: Leua Aiono Frost