Ads by Google Ads by Google

Talia talosaga Failautusi Initeria mo se avanoa tali ai faasea Haleck

Ua talia e le Faamasinoga Feterale i Uosigitone se talosaga a le Ofisa o le Initeria, ina ia maua se avanoa o le Failautusi o le Initeria ia Kenneth Salazar e tali atu ai i le faasea a le aiga o Haleck, e uiga i le mataupu i le latou fanua i Ottoville.

O le aso 11 o Iulai sa tuu atu e le faamasinoga ia Salazar e tali ai i le faasea, peitai o lea ua toe suia i le aso 18 Iulai.

O i latou o lo o tagi i lenei mataupu e aofia ai Cathie Haleck-Paala, David Otto Haleck, Ernest Haleck ma Otto Vince Haleck, Jr, lea o lo o latou talosagaina Salazar, ina ia faatonu le malo o Amerika Samoa, e totogi atu tupe mo le vaomatua faasaoina o lo o i ai i le fanua, ma faatonu foi le Faamasinoga Maualuga a Amerika Samoa ina ia faaleaoga lana faaiuga sa tuuina mai i le aso 13 o Aokuso 2008 i le mataupu i le va o le malo o Amerika Samoa ma Haleck.

Na taua e Michelle Lo, le loia a le malo, ua toeititi lava maea ona faataoto e le itu tetee la latou tali, o le mafuaaga lea o le talosagaina o se isi vaiaso se tasi e toe tolopo ai, ina ia faamaea lelei mea o loo manaomia le faamaea, atoa ai ma le taliina o nisi o mataupu o loo fesiligia e le itu tetee.

Ina ua talia e le alii faamasino ia Emmet G. Sullivan le talosaga a le malo i le Aso Lua na te’a nei, sa ia taua ai e faapea, e tatau foi ona tali atu le itu tagi i le tali a le malo a’o le’i oo atu i le aso 18 Iulai lea ua faamoemoe e toe fofogaina ai lenei mataupu.

O le mataupu lenei na tofu atu i le faamasinoga i ni nai tausaga e lei mamao atu, ona o le fanua a le aiga o loo faaigoaina o le fanua i Naumati, lea e 23.25 eka le tele i Ottoville.

Na teena e le malo le talosaga a le aiga mo se pemita, e ui sa taumafai le malo e faatau mai le fanua lenei mai le aiga o Haleck i ni tausaga ua mavae atu

E tusa ai la ma faamaumauga a le faamasinoga o loo taua ai, na faaulu e le aiga o Haleck la latou tagi i le faamasinoga feterale, e fesiligia ai le faaiuga a le Failautusi a le Initeria e pei ona taliaina ai le tuuina atu o le latou fanua e le malo poo le faamasinoga foi, e aunoa ma se taui tau tupe e tuuina atu, ma o lea gaioiga a le Failautusi a le Initeria ua teena ai gaioiga tonu ma le sa’o e tatau ona faia.

O le talosaga la a le aiga o Haleck o loo i luma o le faamasinoga feterale, ia faia sana poloaiga faasaga i le Failautusi o le Initeria, ina ia faatonu le malo o Amerika Samoa, afai latou te le faatauina le fanua, ia totogi atu na o se vaega tupe, poo le tuuina atu foi lea o se pemita e faataga ai le atina’eina o lea fanua.

faaliliu Ausage Fausia