Ads by Google Ads by Google

Talia Tagata Fia Faigaluega - Tridents Seafood Alaska

E to’atolu tama’ita’i papalagi ae to’alua tama’ita’i Samoa o lo ua i o tatou laufanua, e faia fa’atalanoaga mo i latou ua talosaga e fia faigaluega mo le Kamupani I’a a le Trident Seafoods i Alaska ma Seattle, Uosigitone.

O se tala mai, “E matua sili fa’aafe atu le faigofie o galuega e faia e i tatou i luga o va’a, po’o fale gaosia ai le i’a i Alaska ma Uosigitone nai lo le tatou falei’a i’inei, i tulaga o mea faigaluega, puipuiga o tino mai le malulu ma le a’afia i le galuega a’o fa’atautaia ou tiute, ma le faigofie fo’i aua e le mamafa tele ni mea e tasi’i.”

O se molimau lea a se tasi o tama’ita’i sa galue muamua ai mo le 6 masina i lenei Kamupani, ona toe taliu mai lea faia le fale o si ona tina, ma toe tausi tasi lava o ia, lea ua toe manatu e fa’aauau, ona ua amatalia fo’i si ona aiga!

“Ou te le fiu e alu, aua ua ou iloa le aoga o le alu ai lea ituaiga o avanoa, e leai ni ata pili e popole e totogi, na’o le totogi mai o pili e tausi ai si o’u tina i’inei, ma ou tausaili e fia fai se fale lelei mo ia.” Ona o lea e le’i mae’a lelei le fale, o lea ua naunau ai o ia e toe tu’ua si ana tama i lona tina ae toe oso tasi lava i Alaska mo lea fa’amoemoe.

“O le taimi lava lenei e faia ai se filifiliga lelei mo tupulaga talavou ae le’i amatalia aiga, aua e leai se isi taimi e maua ai avanoa fa’apea, aua a alu atu fo’i i fafo e tele fo’i tupe e totogi ai fale ma uila ma suavai, e uma ane e tele atu le tupe fa’aalu nai lo tupe maua.”

O le aoga lea o le o atu o nisi sa o muamua ai, e faia mai a latou fa’amatalaga i mea sa o ai pe a mai, aua e tele lava fesili e le mafai ona tali mai e papalagi mo i tatou i’inei. I le totogi ua ofo mai e $7.75 i le itula, ae ua leai se totogi mo lou nofo ai ma fa’aaoga uma le suavai ma le eletise. O lau tupe fo’i e fa’aalu sa’o lava i le tusitupe ua taua’aoina e lou aiga e pei o teugatupe ta’ito’alua a oe ma lou tina po’o lou to’alua, ina ia tala e oe, toe tala fo’i e lou aiga mo latou pili.

Ua fautuaina, ia fa’amama fo’i lau ato, aua e le mo’omia lava le tele o ni lavalava, ae o lo’o lava fo’i ofu mo le saogalemu e mafai ona maua i nofoaga o galuega. O le tele o itula e mafai ona e galue ai pe a tele na’ua le i’a, e 18itula i le aso. Uma loa le 8 itula o le totogi ta’i itula, amata loa ona faitau le ta’i $11.35 i le itula ova taimi.

I le itula e tasi na amatalia ai le lesitala o tagata fia talosaga mo avanoa nei i le aso ananafi, ua silia ma le 60 i latou ua mae’a fa’atumu ma faia su’esu’ega tau le tagofia o vaila’au o’ona ma fuala’au fa’asaina. Leai ma se tasi na te’ena ona ua le agava’a i lea itu. Po’o le isi lua vaiaso, ua tatau ona maua mai le tali o lau talosaga e ala i le emeli.

O le isi lea ala e tatau ona e maua’a ai, ia e iloa lelei ua i ai sau emeli feso’ota’i mo mea uma lava tau lea galuega! O le ituaiga luiga lea ua i ai nei talosaga mo nei avanoa, ae ua finau mai, e te o’o ane pea i le faletalimalo Sadies by the Sea i Utulei, mo sou avanoa i Alaska i le tausaga fou. E totogi e oe lou pasese e o’o atu i Seattle Uosigitone, ae totogia e le Kamupani lou pasese mo Alaska mai Uosigitone. Manatua, o le toe aso lenei o lea avanoa, e leai se mea e faigata pe a i ai lou loto e te fia alu ai i lea avanoa!