Ua fa’aalia e ni isi o tagatanu’u o le itumalo o Manu’a lo latou talia ma le agaga fa’afetai o le fa’aiuga ua tu’uina mai e le Matagaluega o Fela’uaiga a le malo tele o Amerika (DOT), e pei ona toe fa’aopoopo ai isi aso e 30 e fa’aauau ai pea le tautua a le kamupani va’alele a Samoa, le Polenisia i laufanua o Manu’a.

Na taua e ni isi o le itumalo e aofia ai ma le ali’i faipule mai le Ofu ma Olosega ia Toeaina Faufano Autele e fa’apea, e ui e na o le 30 aso lea ua toe fa’aopoopo e lele ai le Polenisia mo Manu’a, o le itu taua o lo o i ai pea le fa’atanaga e fa’aauu ai lea auaunaga taua ma le aoga mo le itumalo.

“E matua mana’omia lava se va’alele na te tautuaina le va o Tutuila ma Manu’a, aemaise lava i taimi e tula’i mai ai ni fa’alavelave fa’afuase’i i tagata matutua poo fanau laiti foi i totonu o le itumalo, ae”, o le saunoaga lea a Mati Mauga o Fitiuta.

Na taua e le susuga Mauga e fa’apea, o se tasi o fa’afitauli tele e masani ona tula’i mai i lona aiga pe a fa’aletonu feoaiga i va’alele, o si ona tama matua o lo o tausi i le fale, e i ai taimi e fa’afuase’i ai ona tula’i mai lona gasegase, ma mana’omia ai le auina mai i Tutuila mo ana talavai.

O isi tagatanu’u o Manu’a sa latou fa’afetaia le toe taliaina o le isi talosaga mo le Polenisia, o se tamali’i faipisinisi i Manu’a, susuga Filiga Mapu, lea sa ia taua le aoga tele o le tautua a le Polenisia e mafai ai ona fesoasoani i le la’uina o oloa mo lana pisinisi i Manu’a, aemaise lava pe afai e leai ni malaga a le MV Sili e alu.

“E faalagolago tele soifua o tagata Manu’a i so o se auala o femalagaaiga, e le gata i le sami ae faapena foi i le ea, o le mafuaaga lena ua ou sapaia ai le faaiuga ua faia a le DOT e toe faaopoopo le isi 30 aso e malaga ai le Polenisia mo Manu’a, ona o lea ua maua ai se fesoasoani mo le itumalo”, o le saunoaga lea a Mapu.

Ae ui i le talia ai na o le 30 aso e malaga ai le va’alele mo Manu’a, na saunoa le afioga i le ali’i faipule ia Toeaina, e tatau ona galulue fa’atasi le malo ma le kamupani va’alele e talosaga i le DOT, mo se pemita e umi atu ina ia faa faigofie ma faaleleia atili ai le auaunaga a le Polenisia mo le itumalo.

Saunoa Toeaina e faapea, e le fou le faafitauli o lo o fetaia’i pea ma le itumalo, ae o le agaga faafetai i le malo, o le sapasapaia lea o taumafaiga a le Polenisia mo se avanoa e ofo atu ai lana tautua mo le itumalo.

E pei ona silafia e le atunu’u, o le masina o Setema 2014 na amata ai le tautua a le Polenisia mo Manu’a, ma fa’aauau mai ai lava seia oo mai i le taimi nei.

O lea auaunaga na mafai ona ua lagolago e le malo le talosaga a le kamupani va’alele mai Samoa, mo se fa’atanaga a le DOT e fa’aagafua ai ana tulafono feterale, ae fa’ataga ai le Polenisia  e le o se kamupani va’alele e i lalo o le Amerika, e lele i malae vaalele o lo o i lalo o le vaavaaiga a le vaega a le FAA a le malo tele.

I le ogatotonu o le masina o Fepuari 2015, sa talosagaina ai e le isi sui faipule mai Manu’a ia Vesi Talalelei Fautanu le taitaifono o le Komiti o Fela’uaiga a le maota o sui, tauala atu i le afioga i le Fofoga Fetalai o le maota o sui ia Savali Talavou Ale, ina ia fa’atulaga se iloiloga se’i fesiligia ai tulaga fa’aletonu i femalagaaiga mo le itumalo.

Saunoa Vesi e fa’apea, e le o lagona e le atunu’u tulaga pagatia o lo o lagona e tagata Manu’a, i le fa’aletonu pea lea o femalagaaiga i le tele o taimi, o isi taimi ua faaletonu femalagaaiga i le sami, o isi fo’i taimi ua fa’aletonu femalagaaiga i le ea.

Saunoa Vesi e fa’apea, e tatau ona saili e le malo se auala e foia ai le faafitauli o lo o fetaia’i ma Manu’a i tulaga tau femalagaaiga, ina ia mautinoa e le toe tula’i mai lenei fa’afitauli i le lumana’i.