Talia ma le agaga fa’afetai suafa ‘Poututasiomalo’

Sa tuai ona fa’ao’o mai se tali a lana afioga Epikopo Peter Brown, le taitai o le Ekalesia Katoliko Roma i Amerika Samoa, e tusa ai o le suafa Matai ‘Poututasi o Malotumau’ lea sa fa’ae’e ia te ia ma ua fa’asuafaina ai o ia, Fepuari 22, 2014 i le afio’aga o Sa’ilele i le suafa ‘Poututasiomalo’ o lea sa lomia ai pea le ulua’i vaega o lea tala e fa’ailo ai lea fa’aeaga taua sa faliu i ai le pa’ia o le Ekalesia Katoliko, i le matagaluega a Fagaitua Sa’ilele ma Masefau.

 

Sa fa’ailoa mai e lana afioga Epikopo Poututasiomalo e fa’apea, na ia asia le matagaluega i Sailele, Masefau ma Fagaitua, o se vaega masani o ana asiasiga i pule’aga uma ma e nofo ai i le fa’aiuga atoa o le vaiaso.

 

Sa ia saunoa e tusa o le matagofie o lea fo’i mafutaga, “O le matagofie le avea o Sa’ilele e leai se mea e natia ai, o ona matafaga ma le savili malu o lona ea, e toe fa’afouina ai le malosi, e tumau lea.”

 

Peita’i i lea mafutaga, i le ‘ava fa’atupu sa amatalia ai le feiloaiga, sa aofia potopoto i ai ta’ita’i o Ekalesia, o le mamalu i le saofa’iga o le pulega ali’i ma faipule o le afio’aga, fa’apea ma sui o le pulega a Sailele na tofusia i le ava fa’aaloalo o lea ali’itaeao.

 

I le mae’a ai o le Ava o Feiloa’iga, na saunoa ai le afioga le matua ia Togiola Tulafono o le ta’ita’i o le afio’aga, ma latou fa’ailoa mai, “Ua mae’a soalaupule fa’asuaga ma fofoga o le afio’aga nei, ma ua matou autasi, e fa’ae’e ia te oe le suafa “Poututasiomalo,” ae o le matou fa’aoloolo ma’au atu, pe talia e lau afioga le matou lea fa’aeaga?”, o le saunoaga lea a Epikopo Peter Brown i sana talanoa mai lata mai nei.

 

“Ua ou talia ma le agaga maulalo le fa’aeaga, ae o se ala fo’i, e auauna ai i le afio’aga o Sa’ilele ma ona tagata, ae maise le atunu’u atoa ma le Pule’aga Samoa Pago Pago.”

 

“E ui o lenei fa’aeaga sa fa’atino e le afio’aga ma le pulega i Sa’ilele o le Ekalesia Katoliko Roma, ae o le a ou tiu ai i la’u auaunaga i le Pule’aga Samoa Pago Pago, lea fa’ato’a amatalia mai le tausaga ua tuana’i la’u nofoa’iga.”

 

Sa fa’aauau lana tautalaga, “O lenei fo’i se avanoa lelei, o le a mafai ai ona aotelega ai le mana’oga fa’apitoa sa tima’i mai ai Pope Falanisisi, ia atoatoa la outou auaunaga fa’akerisiano e tautua nisi e to’atele.”

 

“O le taliaina o lenei suafa taua, ua ou iloa lelei fo’i ona tiute e ao ina fa’atino e auauna ai i tagata o le atunu’u, ia avea ma Leoleo Mamoe o le Aiga o le Atua. Ia avea a’u ma se tasi e afua mai ai manuia i le tino faapea ma le agaga i tagata o i ai le mana’omia. Ou te tatalo i le Atua, ia avea a’u o se papa malosi i taimi o fa’afitalu ma ia fa’ao’o maia le filemu i taimi leaga i ona tagata, e pei ona fa’ailo i lenei suafa matai.”

 

“Ia avea fo’i lenei avanoa, e fa’afetaia ai le tofa fetala’i i le afioga le Matua Togiola Tulafono ma le afioga le Sui Kovana Lemanu Mauga, ona o lenei fa’aeaga mai le saofa’iga a ali’i ma faipule o Sa’ilele ua fa’ae’e mai. Tau ina tatou tofu maua le soifua lagilelei ma malosi e auauna ai!” O sana fa’afetai lea sa ia fa’ailoa mai.

Comment Here