Ua fa’alauiloa aloaia e le afioga i le ali’i kovana ia Lolo Matalasi Moliga lona taliaina o le fuafuaga e fa’aa’upega Leoleo a le malo, ina ia mafai ai ona puipuia i latou a o fa’atino ai a latou tiute i le puipuia lea o le saogalemu o le atunu’u atoa.

Na taua e Lolo i le ripoti a le malo lea ua tauaao e le Fono Faitulafono o fa’apea, o le fa’ataunu’uina o lea fuafuaga e fa’avae mai lea i le pasia uma lea e leoleo o suega e moomia ina ia agava’a ai ona latou taulimaina a’upega.

O le manulauti o lo o fa’avae ai tiute tauave a le Komesina o Leoleo ma lana matagaluega e pei ona taua e le ali’i kovana, e le gata e fa’apitoa i le fa’amalosia o tulafono uma i le teritori, ae galulue fo’i mo le puipuia o le saogalemu o tagata lautele.

Ae o le fa’atupulaia ai o ni isi o fa’alavelave matuia e aofia ai ma le saoasaoa o le ulufale mai i le teritori o fualaau fa’asaina, ua taua ai e Lolo sona popolega ua i ai, ina ne’i a’afia atu ai ma Amerika Samoa i isi atunu’u o le lalolagi lea ua a’afia i faiga le alofa, ona o le a’afia o aia o tagata lautele atoa ai ma le to’atele o tagata mai isi atunu’u ua nonofo fa’asolitulafonoi o latou atunu’u.

O le valaau e fa’aa’upega na afua mai i le fa’alavelave lea na tagatavaleina ai le ali’i leoleo su’esu’e ia Det. Lt. Lusila Brown ia Iulai 2010, ina ua saunoa le Komesina o Leoleo sa i ai i lena taimi ia Tuaolo M. Fruean, ua alaga tatau ona fa’aa’upega leoleo mo le puipuia o latou soifua i le taimi e tutupu ai fa’alavelave matuia fa’apenei.

O lea moemitiga na atili ona fa’amalosia ina ua tula’i mai le Komesina ua fa’amavae ia William E. Haleck ma ia fa’alauiloa lona sauni e tu’uina se ata fa’ataoto i le ali’i kovana i le tausaga na te’a nei, mo le fa’aa’upegaina o leoleo, sosoo ai loa ma lona aumaia o fana le ituaiga o le .38 se 25 mai le Ofisa o Leoleo a Honolulu, e amata ai le fuafuaga e fa’aa’upega leoleo.

E ui ua fa’amavae Haleck mai le tofi komesina, ae sa ia taua i le Samoa News lona lagolagoina pea o le fuafuaga e fa’aa’upega leoleo, atoa ai ma lona fa’anaunauga, talosia o le finagalo fo’i lea o le afioga ia Save Liuato Tuitele lea ua tofia e avea ma komesina le tumau o leoleo i le taimi nei.

O i isi fuafuaga fa’ataoto mo le fa’aleleia atili o le tautua a le matagaluega o Leoleo faapea ai ma le Matagaluega o le Puipuiga o le Saogalemu Lotoifale, e aofia ai le isi vasega mo leoleo fou lea ua fa’amoemoe e faia a o le i mae’a le tausaga lenei, ina ia mafai ai ona fa’atumu ni isi o avanoa o lo o manaomia i totonu o le matagaluega, e aofia ai ni leoleo fa’aopoopo, leoleo mo le toese, leoleo mo le malae va’alele, leoleo mo le vaega Fuimu, fa’apea ai ma leoleopo tumaoti.

O le a toe fa’amalosia ai fo’i i le vasega mo leoleo fou auala uma e usitaia ai faiga fa’avae ma ta’iala a le matagaluega ua i ai, ina ia taofia ai le toe tula’i mai o ni isi fa’afitauli i le lumana’i, e pei o le fa’aulufale fa’asolitulafono o fualaau fa’asaina i le toese atoa ai ma le sosola soo i tua o pagota.