Ads by Google Ads by Google

Talia Falemai talosaga Fono faateletelegese a latou siitaga

GAOTEOTE: E le o momoe le Fono o lea e galulue

Ua taunu’u i le Senate se fa’aaliga tu’usa’o mai le Taitaifono o le Komiti Fa’afoe a le Pulega o le Falemai a le LBJ, i lo latou taliaina o se talosaga a le Fono i le masina na te’a nei, e fa’ateletelegese ai la latou siitaga, ae se’i fa’atalitali i gaioiga a le Fono e pei ona tau sailia ai se fofo o lea faafitauli tau tupe ua feagai nei ma le falemai.

O lea mataupu na faalauiloa aloaia e le Taitaifono o le Komiti a le Soifua Maloloina/LBJ, Senatoa Galeai Tuufuli, i le maea ai o se la feiloaiga ma le tofa ia Va Moananu i le Aso Lulu na te’a nei.

“O lea ua faailoa aloaia mai e le taitaifono o le komiti faafoe a le falemai, lo latou taliaina lea o se talosaga sa tuuina atu e le Fono i le masina na tea nei, ina ia faateletelegese a latou siitiaga ua toe fuafuaina mo le masina lenei, se’i o latou tulimata’iina pea galuega a le Fono o loo faia,” o le saunoaga lea a Galeai i luma o le Senate i le taeao ananafi.

E lua ni pili tupe sa fa’aulu i luma o le Senate, i le taeao ananafi, e tu’uina atu ai se fesoasoani a le Fono mo le falemai.

O ia pili tupe e aofia ai le $1.6 miliona lea ua fa’amoemoe e faatupe mai i tupe na totoe o le tausaga tupe 2011, ma le isi pili tupe e $253,000 lea ua faamoemoe e fa’atupe mai i vaega tupe o le paketi o le tausaga faaletupe  2012, lea na te’ena e le kovana ina ua fa’asoasoa atu e le Fono mo nisi o Ofisa a le malo.

E ese mai i pili tupe ia na fa’aulu i le taeao ananafi, o le taeao nei lea ua fa’amoemoe e faitau fa’atolu ai le uluai pili tupe na fa’aulu e le Senate, e fa’asoasoa atu ai le aofaiga e $3 miliona e fesoasoani i galuega fa’atino a le falemai, ma o lea pili tupe o lo o fuafua e fa’atupe mai i le Teugatupe mo Taui o Tagata Faigaluega a le malo.

Saunoa le alii peresetene o le Senate ia Gaoteote P. Tofau i le aso ananafi e faapea, o le fuafuaga a le falemai o loo i ai, o a latou siitaga ia sa fuafua e faamalosia i le aso 25 Tesema 2011, ua faamoemoe e faamamaluina i le uluai lua vaiaso o le masina lenei, o le vaiaso fou lea, o le mafuaaga lea e tatau ai i le Senate ona faaulu se Iugafono e talosagaina ai le falemai ina ia faateletelegese le faamamaluina o a latou siitaga, peitai o le taimi lea na faailoa ai loa e Senatoa Galeai se la fesootaiga ma le taitaifono o le komiti faafoe a le falemai, lea ua faailoa mai ai lo  latou taliaina o le fautuaga a le fono ina ia faateletelegese a latou siitaga.

Saunoa Galeai, o se tulaga faanoanoa tele pe afai e vaavaai atu i le tulaga pagatia o loo i ai le malo i le itu tau tupe, e le gata ua aafia ai le falemai, o le ASPA ae ua oo lava foi i le kolisi tuufaatasi.

“Ua le malamalama le Fono pe o le a faapefea ona fai lenei malo, a maua tupe ona ave lea e totogi ai aitalafu ma isi mea ae ua le totogiina tupe sa faatulafono atu mo lala e tolu o le malo lea ua tulai mai ai tulaga pagatia nei,” o le saunoaga lea a Galeai.

“O le nofoaiga lenei a Togiola ma Faoa ua sipasipa ai faapenei le alu a le malo, o faafitauli  nei o loo tutupu mai, e le fou, o mea ua leva ona tutupu ae leai ma se galuega a le malo o loo fai i ai,” o le faasea lea a Galeai.

Na talosaga nisi Senatoa e tatau ona faanatinati se faaiuga a le maota ina ia vave foia le faafitauli o loo tulai mai i le falemai, peitai na saunoa Gaoteote, e le o faia galuega a le fono ona o le falemai, ae o loo fai ona o le alofa i le atunuu.

“E le o momoe le Fono, o lea e galulue, o loo fai ana galuega, e le faia foi mo le falemai ma lana taupulega ae o loo fai ona o le manatu alofa i le atunuu ma le tulaga pagatia ua i ai ona tagata,” o le saunoaga tuusao lea a le alii peresetene.

Ua i ai le fuafuaga a le Senate afai ae maea sa latou galuega fesoasoani mo le falemai, ona faasaga atu loa lea e saili se fesoasoani mo le Kolisi Tuufaatasi, lea foi ua maua ripoti i le tulaga pagatia ua oo i ai lana tautua ona o tulaga faaletonu i tupe.

O atugaluga o nisi o Senatoa ina ua tulai mai le mataupu i le kolisi tuufaatasi, nei avea le tulaga faaletonu tau tupe ua tulai mai ma itu e aafia ai aoaoga a le fanau aoga.