Ads by Google Ads by Google

Talia fa’amasinoga talosaga Siaumau Siaumau Jr

O ananafi na talia ai e le fa’amasinoga maualuga se talosaga na fa’aulu e le susuga a Siaumau Siaumau Jr, tauala atu i lana loia fautua o Michael M. White, ina ia solofua e le fa’amasinoga ni isi o talosaga na fa’aulu e le loia na ulua’i avea ma loia fautua a Siaumau Jr, ina ua fa’atoa amata mai iloiloga o lana mataupu.

 

E fa talosaga na fa’aulu e le loia muamua a Siaumau Jr o Tautai Aviata Fa’alevao, na talosaga le ali’i loia ia White e solofua.

 

O ia talosaga e aofia ai le talosaga e faapea: (1) sa le i lelei le mafaufau o Siaumau Jr i le taimi na ia fa’atinoina ai le solitulafono e pei ona tu’uaia ai o ia e le malo; (2) o le talosaga e fa’aleaoga ai le Komesina o Leoleo i lea vaitaimi; (3) solofua isi moliaga fa’asaga ia Siaumau Jr; (4) ma le talosaga e aua ai nei fa’aaogaina e le fa’amasinoga mau fa’amaonia a le malo o lo o lagolago ai tu’uaiga fa’asaga ia Siaumau Jr.

 

E leai se fa’atuiese a le loia mo le malo ia Mitzie Jessop fa’asaga i talosaga a le ua molia ma lana loia, ina ua fesiligia e le ali’i fa’amasino sili lagolago ia Lyle L. Richmond, i le taimi na valaau ai le mataupu a Siaumau Jr mo le iloiloina.

 

Na taua e White i le Samoa News e fa’apea, o talosaga na fa’aulu e le ulua’i loia a Siaumau Jr, e le fesoota’i ma taumafaiga o lo o ia taumafai ai ina ia fa’agasolo taualumaga o lenei mataupu ma fa’ai’uina loa i se taimi vave e mafai ai.

 

Sa ia taua fo’i e fa’apea, e i ai ana ia lava talosaga o lo o fuafua e fa’aulu i luma o le fa’amasinoga fa’asaga i le mataupu lenei, peita’i e tatau ona iloilo muamua talosaga tuai sa fa’aulu e le loia na ulua’i tula’i mo le ua molia.

 

I le mae’a ai ona iloilo e ali’i fa’amasino e le afioga i le ali’i ia Richmond ma ana fa’amasino lagolago ia Muasau Tasina Tofili ma Mamea Sala Jr o le talosaga a le itu tete’e, sa latou taliaina ai loa le talosaga ina ia fa’aleaoga e le fa’amasinoga ulua’i talosaga na fa’aulu e le loia sa tula’i mo Siaumau Jr.

 

O Siaumau Jr o lo o tu’uaia e le malo i le tele o moliaga mamafa e aofia ai le fasioti tagata i le tulaga muamua, fa’aoolima i le tulaga muamua, faapea ai moliaga o le umia o se aupega ma pulufana.

 

O ia moliaga na afua mai i le fa’alavelave lea na tagatavaleina ai le ali’i leoleo ia Det. Lt. Lusila Brown i le masina o Iulai 2010, i luma o le fale faamasino le tumau i Fagatogo.

 

Na taua e White e faapea, o lo o faagasolo pea feutanaiga ma le malo mo le faia o se maliliega aufa’atasi mautu e fa’ai’uina ai lenei mataupu, ma le fa’amoemoe e tatau ona fa’amautuina lea maliliega a’o le i o o atu i le masina o Novema 2014 lea o lo o fa’atulaga e le fa’amasinoga maualuga e fa’ataunu’u ai le fa’amasinoga autu o lenei mataupu.

 

O lo o taofia pea Siaumau Jr i le toese i Tafuna e aunoa ma se tupe na fa’atulaga e tatala ai o ia i tua, e fa’atali ai taualumaga o lana mataupu e pei ona fa’agasolo i luma o le fa’amasinoga i le taimi nei.